”މޯލްޑިވްސް 2.0“ ގެ މަސައްކަތް ނިމުމުން ސަރުކާރު މުވައްޒަފުންގެ ތިންބައިކުޅަ އެއްބައި ވަޒީފާ އަދައިކުރާނީ ގޭގައި ތިބޭ އުސޫލުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މިރޭ ވިދާޅުވެއްޖެއެވެ.
މޯލްޑިވްސް 2.0 ސަމިޓްގައި ރައީސް ވިދާޅުވީ މި ސަމިޓަކީ ވަރަށް އުންމީދީ ދަތުރެއް ކަމަށެވެ. މި ގައުމުގެ މުސްތަގުބަލު ބައްޓަން ކުރުމުގައި ވަރަށް މުހިންމު މަސައްކަތްތަކެއް ފަށާފެށުމެއް ކަމަށެވެ. މިދިޔަ އދ. ގެ އާއްމު މަޖިލީހުގައި ރާއްޖެއަކީ 2040 ވަނަ އަހަރު އަންނަން ވާއިރަށް ތަރައްގީ ވެފައިވާ ގައުމަކަށް ހައްދަވަން ބޭނުންވެވަޑައިގަންނަވާ ކަމުގައި ވިދާޅުވި ކަމަށް ރައީސް ފާހަގަކުރެއްވިއެވެ. ރައީސް ވިދާޅުވީ އެ ރާސްތާއަށް ދާން ބަލާއިރު މިގައުމުގައި ރަނގަޅުކުރަން ޖެހޭ ވަރަށް ގިނަ ކަންތައްތަކެއް ހުރި ކަމަށް ވިދާޅުވިއެވެ.
ރައީސް ވިދާޅުވީ މިކަމުގެ ތެރެއިން ގައުމުގެ އެކި މައްސަލަތައްވެސް ހައްލުކުރަން ހުރި ކަމަށެވެ. އަދި ގައުމުގައި ހުރި ނުރަނގަޅު އާދަތަކާއި އެހެންގޮސް ވަށާޖެހޭ ގޮތެއްގައި ގައުމު ތަރައްގީކުރުމަކީ މާނަހުރި ގޮތެއްގައި ކަންކަން ކުރުން ކަމަށް ރައީސް ވިދާޅުވިއެވެ. އަދި މިރޭ ސަރުކާރުން ފެށި ޑިޖިޓަލައިޒޭޝަން މަސައްކަތް ކުރިއަށް އޮތް ތިން އަހަރުގެ ތެރޭ ނިންމައިލުމަކީ އަމާޒު ކަަމަށެވެ.
މި ތަސައްވުރާއިއެކު ކުރިއަށް ދާއިރު ސަރުކާރުގެ އޮފީސްތަކުގައި ތިބެގެން މަސައްކަތް ކުރާ މުވައްޒަފުންގެ އަދަދު ވަރަށް ބޮޑުތަކުން ކުޑަ ކުރެވިގެންދާނެ ކަމަށް ރައީސް ވިދާޅުވިއެވެ.
”މިތަނުގައި ކަނޑަނޭޅި ނަމަވެސް އަޅުގަނޑުގެ އުއްމީދަކީ 2028ވަނަ އަހަރު ފެށޭއިރު ދައުލަތުގައި މިހާރު ހިދުމަތުގައި މަސައްކަތް ކުރަމުންދާ ގާތްގަނޑަކަށް 49،000 މުވައްޒަފުންގެ ތެރެއިން ތިން ބައިކުޅަ އެއްބައި މުވައްޒަފުން ކަނޑައެޅޭ ވަކި އުސޫލެއްގެ ތެރެއިން ވޯކް ފްރޮމް ހޯމް، ގޭގައި ތިބެގެން ހަމަ ގާނޫނީ އުސޫލުގެ ތެރެއިން އެބޭފުޅުންނަށް މިންގަނޑު ތަކެއްގެ ތެރެއިން މަސައްކަތްކުރެވޭގެ ގޮތެއް ހޯދައިދިނުން. ހަފްތާއަކު 30 ގަޑިިރު ނުވަތަ ކަނޑައެޅޭ ވަކި ގަޑިއިރެއްގައި ވަގުތު ހަމަކުރަން އޮފީހަށް އައުން އޭގެތެރޭގައި ހިމެނޭގޮތަށް، ކޮންމެހެން އޮފީހަށް އަންނަން ޖެހޭ ހިދުމަތްތެރިން ތިބޭނެ. މިސާލަކަށް ސިއްހީ ހިދުމަތްތެރިން، މިހެން ގޮސް ވަކި ފަރާތްތަކެއް ތިބޭނެ ކޮންމެހެން އަންނަންޖެހޭނެ ތައުލީމީ ދާއިރާ“
ރައީސް ވިދާޅުވީ ދައުލަތުގައި މިހާރު ހިދުމަތުގައި މަސައްކަތް ކުރަމުންދާ ގާތްގަނޑަކަށް 49،000 މުވައްޒަފުންގެ ތެރެއިން ތިން ބައިކުޅަ އެއްބައި މުވައްޒަފުން ގޭގައި މަސައްކަތްކުރާ ގޮތަށް ބަދަލުކުރުމުން ހާސިލްކުރެވޭ އެތައް ކަމެއް އެބަހުރި ކަމަށެވެ. އޭގެތެރޭގައި މުޅި ސަރުކާރުގެ އޯވަރހެޑް ކޮސްޓު ކުޑަކުރެވޭ ކަމަށާއި، އެހެންނަމަވެސް މިކަމުން އެފިޝަންސީ ދަށް ނުވާނެ ކަމަށް ރައީސް ވިދާޅުވިއެވެ. މިކަމުގެ ސަބަބުން ދެފުއްފެންނަ ވަރު އިތުރު ވެގެންދާނެ ކަމަށް ވިދާޅުވިއެވެ.
ރައްޔިތުންގެ ހައްގުތައް މަތިވެ، މީގެއިތުރަށް މާލެ ފަދަ ކާރޫބާރޫ ބޮޑު ތަންތަނުގެ ޓްރެފިކް އެތައް ތަނަކުން ކުޑަކުރެވި، ތޮއްޖެއްހުން ބޮޑުތަކުން ކުޑަ ކުރެވިގެންދާނެ ކަމަށް ރައީސް ވިދާޅުވިއެވެ. ރައީސް ވިދާޅުވީ މިކަމަކީ ވަރަށް ދެކިވަޑައިގަންނަވަން ބޭނުންފުޅުވާ ދުވަހެއް ކަމަށާއި އެކުގައި މަސައްކަތް ކޮށްފި ނަމަ ކާމިޔާބު ވާނެ ކަމަށެވެ.
