ރާއްޖެއަށް ޑިޖިޓަލް ކުރިއެރުންތައް ބޭނުންވާކަމަކީ ފެންނަން އޮތް ހަގީގަތެއްކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ޑިޖިޓަލައިޒޭޝަންގެ ނަމުގައި ސަރުކާރުން މަސައްކަތްކުރަމުންދަނީ ރާއްޖޭގެ ވޯޓުލުމުގެ ނިޒާމަށް ބަދަލުތަކެއް ގެނެސް އީވޯޓިންގް ތައާރަފްކުރުމަށްކަމަށް ކުރީގެ ޔޫތު މިނިސްޓަރު އަހުމަދު މަހްލޫފް ތުހުމަތުކުރެއްވުމާއިއެކު މިނިސްޓަރ ސައީދުވަނީ އެ ވާހަކަތައް ދޮގުކުރައްވާފައެވެ. މިނިސްޓަރ ވިދާޅުވީ، ޑިޖިޓަލް ޓްރާންސްފޮމޭޝަންގެ މަގުސަދަކީ އީވޯޓިންގް ނިޒާމެއް ގާއިމުކުރުން ނޫންކަމަށެވެ.
މިނިސްޓަރ ވިދާޅުވީ، މޯލްޑިވްސް 2.0ގެ ދަށުން ކުރުމަށް ކަނޑައެޅިފައިވަނީ ކޮންމެހެންވެސް ބޭނުންތެރި މަސައްކަތްތަކެއްކަމަށާއި ރައީސް ޑރ މުހައްމަދު މުއިއްޒު އެ ހަގީގަތް ގަބޫލުކުރައްވާކަމަށެވެ.
ސައީދު ވިދާޅުވީ، ސަރުކާރުގެ ލީޑާޝިޕް ހަރުދަނާ ކުރުން ނޫނީ ޒިންމާދާރުކުރުމުގެ މަސައްކަތްތައް އަދި ދެމުންދާ ހިދުމަތްތަކުގެ ފެންވަރު ރަނގަޅުކުރުމަށް އެދުނު ނަމަވެސް ރާއްޖޭގެ ޑިޖިޓަލް މަސައްކަތްތައް ފުޅާކުރަންޖެހޭ ކަމަކީ ޔަގީން ކަމެއް ކަމަށެވެ. އެހެންކަމުން މިއީ އޮޅުވާލުންތަކަކަށް ބޭނުން ނުވާ ފެންނަން އޮތް ހަގީގަތެއްކަމަށް ފާހަގަކުރެއްވިއެވެ.
މަހްލޫފު ތުހުމަތުކުރެއްވިގޮތުން ސަރުކާރުން ކުރަމުންދާ މަސައްކަތްތަކަކީ 2028 ވަނަ އަހަރުގެ ރިޔާސީ އިންތިހާބުގެ ވޯޓުލާ ނިޒާމު އިލެކްޓްރޯނިކް ނިޒާމަކަށް ބަދަލުކުރުމެވެ. އޭނާ ވިދާޅުވީ، އެކަމާއި ދެކޮޅު ހައްދަވާކަަމަށެވެ. އަދި އެކަމުގެ ސަބަބުން ހައްގުތައް ހަނިވިގެންދާކަމަށް ސިފަކުރެއްވިއިރު މި މަސައްކަތްތަކުގައި އިސްކޮށް ފެނިގެންދާ ހޯމްލޭންޑް މިނިސްޓަރ އަލީ އިހުސާންވެސް މިކަން ދޮގުކުރައްވާފައިވާކަން ފާހަގަކުރެވެއެވެ.
