ޕާކިސްތާނާއި އިންޑިއާއިން ހަމަލާ ބަދަލުކުރުންތައް ހުއްޓާލުމަށް އެއްބަސްވެއްޖެއެވެ.
ބައިނަލްއަގުވާމީ ނޫސްތަކުން ރިޕޯޓުކުރާގޮތުން އިންޑިއާ އަދި ޕާކިސްތާނުންވެސްވަނީ އަނެއް ގައުމުން ހަމަލާތަކެއް ދީ އިތުރަށް ކަންކަން ގޯސްނުކުރާ ހާލަތުގައި މަސްލަހަތު ގެއްލިގެންދާ ފަދަ އަަމަލުތަކެއް ނުހިންގާނެކަމަށް ބުނެފައެވެ. މި މައުލޫމާތު މީޑިއާތަކަށް ތިލަކޮށްފައިވަނީ ދެ ގައުމުންވެސް މިސައިލުތަކެއް ބޭނުންކޮށްގެން ހަމަލާ ދީފައިވަނިކޮށެވެ. މިއީ ޕަހަލްގަމްގައި ދިން ޓެރަރިސްޓު ހަމަލާއަށްފަހު އެންމެ ބޮޑަށް ހޫނުވެގެންދިޔަ ފުރުސަތުކަން ފާހަގަކުރެވެއެވެ.
ޕާކިސްތާނުގެ ފޮރިން މިނިސްޓަރުވަނީ އިންޑިއާއިން އިތުރު ހަމަލާތަކެއް ނުދޭނަމަ މަސްރަހު ފިނިކުރުމަށް އެގައުމުން އެއްބާރުލުން ދޭނެކަމަށް ބުނެފައިވެއެވެ. ނަމަވެސް އިންޑިއާއިން އެއްވެސް ހަމަލާއެއް ދީފި ހާލަތެއްގައި އެކަމަށް ޖަވާބުދޭނެކަމަށްވެސް ފާހަގަކޮށްފައިވެއެވެ. އިސްހާގް ޑަރް ވިދާޅުވީ، މިކަން އެމެރިކާގެ ސެކެޓްރީ އޮފް ސްޓޭޓް މާކް ރޫބިއޯއަށްވެސް އަންގަވާފައިވާކަމަށެވެ. އަދި މިހާތަނަށް ރައްދުތަކެއް ދީފައިވަނީ ކެތްތެރިކަން ކޮޅުންލައިގެން ދިއުމުގެ ސަބަބުންކަމަށް ބުނެފައިވެއެވެ.
އިންޑިއާގެ ވިންގް ކޮމާންޑަރު ޔޯމިކާ ސިންގް މީޑިއާތަކަށް މައުލޫމާތު ދިން ގޮތުން އިތުރަށް މައްސަލަ ގޯސްނުކުރުމަށް އެ ގައުމުން އަހައްމިއްޔަތު ދެއެވެ. ނަމަވެސް އެކަން ކުރެވޭނީ އެ އުސޫލުގެ މަތިން ޕާކިސްތާނުންވެސް އަމަލުކޮށްގެންކަމަށް ބުނެފައިވެއެވެ.
ދެ ގައުމުންވެސް މައްސަލަ ގޯސްނުކުރާނެކަމުގެ އިޝާރާތްތަކެއްކޮށްފައިވާއިރު ޕާކިސްތާނުގެ އެއްގަމުން ހަރަކަތްތެރިވާ ސިފައިން ހަމަލާއެއް ދިނުމަށް ތައްޔާރުވަމުންދާކަމަށް ފެނިގެންދާ ފަދަ ގޮތަކަށް އަމަލުކުރާ މަންޒަރުތައް ފެނިފައިވާކަމަށްވެސް ބައެއް ނޫސްތަކުން ރިޕޯޓުކުރެއެވެ.
އެމެރިކާ އަދި އެހެނިހެން ގައުމުތަކުންވަނީ އިންޑިއާ އާއި ޕާކިސްތާނަށްވެސް މަސްރަހު ފިނިކުރުމަށްޓަކައި މަސައްކަތްތައް ކުރުމަށް އިލްތިމާސްކޮށްފައެވެ. އެމެރިކާގެ ސެކެޓްރީ އޮފް ސްޓޭޓްގެ ފަރާތުން މީޑިއާތަކަށް މައުލޫމާތު ދިން މަންދޫބަކު ހާމަކުރިގޮތުން އެ ގައުމުންވަނީ މައްސަލަ އިތުރަށް ގޯސްނުކުރުމަށް އިރުޝާދު ދީފައެވެ. އަދި ބިނާކުރަނިވި މަޝްވަރާތަކެއް ކުރިއަށް ގެންދިއުމުގައި އެ ގައުމުން އެއްބާރުލުން ދޭނެކަން ހިއްސާކޮށްފައިވާކަންވެސް ހާމަކުރިއެވެ.
އިންޑިއާގެ ފޮރިން ސެކެޓްރީ ވިކްރަމް މިސްރީ މީޑިއާތަކަށް މައުލޫމާތު ދީފައިވާގޮތުން ދެ ގައުމުންވެސްވަނީ ހަމަލާ ބަދަލުކުރުންތައް ހުއްޓާލުމަށް އެއްބަސްވެފައެވެ. ދެ ގައުމުން މި އެއްބަސްވުން ގާއިމުކޮށްފައިވަނީ އަސްކަރިއްޔާގެ ވެރިންގެ ދެމެދު ކުރެވުނު މުއާމަލާތްތަކަކަށްފަހުކަމަށް ބުނެފައިވާއިރު އަދިވެސް ކުރިއަށް އޮތް ދުވަސްތަކުގެ ތެރޭގައި އިތުރު މުއާމަލާތްތަކެއް ކުރިއަށް ގެންދިއުމަށް ކަނޑައެޅިފައިވާކަންވެސް ހާމަކުރިއެވެ.
