ސަރުކާރުން ތައްޔާރުކޮށްފައިވާ ޑިޖިޓަލް އައިޑެންޓިޓީ ބިލުގެ ޑްރާފްޓަށް ހިޔާލު ހޯދުމުގެ މަސައްކަތްތައް ފައްޓައިފިއެވެ.
ދާހިލީ ސަލާމަތާއި ފަންނިއްޔާތާއި ބެހޭ ވުޒާރާއިން އާންމުކޮށްފައިވާ ބަޔާނެއްގައި ބުނެފައިވާގޮތުން އެ މިނިސްޓްރީންވަނީ މޯލްޑިވްސް 2.0 މަޝްރޫއުގެ ދަށުން ތައްޔާރުކޮށްފައިވާ ޑިޖިޓަލް އައިޑެންޓިޓީ ބިލުގެ ޑްރާފްޓަށް ހިޔާލު ހުށައެޅުމުގެ ފުރުސަތު މި މަހުގެ 15 ވަނަ ދުވަހުގެ ނިޔަލަށް ހުޅުވާލާފައެވެ.
އެ ވުޒާރާއިން ބުނެފައިވާގޮތުން މި ބިލާއި ގުޅޭޣޮތުން ލިބޭ ހުރިހާ ހިޔާލެއް އާންމުކުރާނެއެވެ. އަދި މިގޮތުގެ މަތިން ކުރިއަށް ގެންދިއުމަށް ނިންމާފައިވަނީ ހާމަކަން ބޮޑު ގޮތެއްގައި މަސައްކަތްތައް ކުރިއަށް ގެންދިއުމަށްކަމަށް ފާހަގަކޮށްފައިވެއެވެ. އެ ވުޒާރާއިން ބުނެފައިވާގޮތުން މި ބިލުގެ މަގުސަދަކީ ރާއްޖޭގެ ޑިޖިޓަލް އިންފްރާސްޓްރަކްޗާ ހަރުދަނާކުރުމަާއި ރައްޔިތުންނާއި ފޯރުކޮށްދޭ ހިދުމަތްތައް މިހާރަށްވުރެ ހަލުވިކަމާއިއެކު ދިނުމުގެ މަގު ފަހިކުރުމެވެ. އެހެންކަމުން ބިލާއި ގުޅޭގޮތުން ހިޔާލު ހޯދުމަކީ ސަރުކާރުގެ ޑިޖިޓަލް ޓްރާންސްފޮމޭޝަން މަސައްކަތްތަކުގެ ތެރޭގައި ރައްޔިތުންގެ ޝާމިލުވުން އިތުރުކުުމަށްޓަކައި އެޅޭ މުހިންމު ފިޔަވަޅެއްގެ ގޮތުގައި ފާހަގަކޮށްފައިވެއެވެ.
މި ޕްރޮޖެކްޓަކީ 5 އަހަރު ދުވަހުގެ މުއްދަތަށް ކުރިއަށްގެންދާ މަޝްރޫއެކެވެ. މީގެ ދަށުން ނެޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ، ކޮމިއުނިކޭޝަން އޮތޯރިޓީ އޮފް މޯލްޑިވްސް، ޑިޕާރޓްމަންޓް އޮފް ނެޝަނަލް ރަޖިސްޓްރޭޝަން އަދި ލޯކަލް ގަވަމަންޓް އޮތޯރިޓީގެ ޚިދުމަތްތަކަށް އިންޤިލާބީ ބަދަލުތަކެއް އަންނާނެކަމަށް ބުނެފައިވެއެވެ.
ޑިޖިޓަލް މޯލްޑިވްސް ޕްރޮޖެކްޓުގެ ދަށުން ކުރިއަށްގެންދާ މަސައްކަތްތަކުގެ ތެރޭގައި ޑިޖިޓަލް އައިޑެންޓިޓީ ނިޒާމެއް ގާއިމުކުރުމާއި، ސަރުކާރުގެ ހިދުމަތްތައް އޮންލައިންކޮށް ފޯރުކޮށްދިނުމުގެ ޕްލެޓްފޯމެއް ތަރައްގީކުރުން ހިމެނެއެވެ.
