މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފައިވާ ގޮތުގައި މޭ މަހުގެ ފަހު ހަފްތާގައި ޓެކްސްގެ ގޮތުގައި ދައުލަތަށް 1.3 ބިލިއަން ރުފިޔާއަށްވުރެ އިތުރު އަދަދެއް ލިބިފައިވެއެވެ.
މީރާއިން އާންމުކޮށްފައިވާ ތަފާސްހިސާބުތަކަށް ބަލާއިރު، މޭ މަހުގެ 25 އިން 31 އަށް ލިބުނު އާމްދަނީގެ ތެރެއިން އެންމެ ބޮޑު އަދަދެއް ލިބިފައިވަނީ ޓުއަރިޒަމް ދާއިރާއިން ނަގާ ޖީއެސްޓީގެ ގޮތުގައެވެ. މިގޮތުން ޓުއަރިޒަމް ޖީއެސްޓީގެ ގޮތުގައި 669.11 މިލިއަން ރުފިޔާ ލިބިފައިވާއިރު، އާންމު ޖީއެސްޓީގެ ގޮތުގައި 261.55 މިލިއަން ރުފިޔާ ލިބިފައިވެއެވެ.
މި މުއްދަތުގައި ކޯޕަރޭޓް އިންކަމް ޓެކްސްގެ ގޮތުގައި 2.12 މިލިއަން ރުފިޔާ ލިބިފައިވާއިރު، ނޮން ރެސިޑެންޓް ވިތްހޯލްޑިންގް ޓެކްސްގެ ގޮތުގައި 2.44 މިލިއަން ރުފިޔާ ލިބިފައިވެއެވެ. އަދި ގްރީން ޓެކްސްގެ ގޮތުގައި 121.54 މިލިއަން ރުފިޔާ ލިބިފައިވާކަން ފާހަގަކުރެވެއެވެ.
މީގެއިތުރުން، ޑިޕާޗާ ޓެކްސްގެ ގޮތުގައި 92.73 މިލިއަން ރުފިޔާއާއި އެއަރޕޯޓު ޑިވެލޮޕްމެންޓު ފީގެ ގޮތުގައި 93.72 މިލިއަން ރުފިޔާ ލިބިފައިވެއެވެ. އަދި ފަތުރުވެރިކަމުގެ ދާއިރާގެ ބިމު ކުލީގެ ގޮތުގައި 396،623 ރުފިޔާ ލިބިފައިވާއިރު، އެހެނިހެން ޓެކްސްތަކާއި ފީގެ ގޮތުގައި 31.14 މިލިއަން ރުފިޔާ ލިބިފައިވާކަން މީރާގެ ތަފާސްހިސާބުތަކުން ދައްކައެވެ.
މި ތަފާސްހިސާބުތަކުން ދައްކާގޮތުގައި މޭ މަހުގެ ފަހު ހަފްތާގައި ދައުލަތަށް ލިބުނު އާމްދަނީގެ ބޮޑު ބައެއް ހިއްސާކުރަނީ ފަތުރުވެރިކަމުގެ ދާއިރާއިން ލިބޭ އާމްދަނީއެވެ.
