މެލޭޝިއާގައި އަވަހާރަވި ދިވެހި ޢިލްމުވެރިޔާ ޝައިޚް އިބްރާހީމް ފަރީދުގެ ހަނދާނުގައި ރާއްޖޭގައި މިސްކިތެއް ބިނާކުރުމަށް ޚިދުމަތް ޖަމިއްޔާއިން ނިންމައިފިއެވެ. މި މަޝްރޫޢަށް އެހީތެރިކަން ފޯރުކޮށް ދިނުމުގެ ފުރުސަތު ޚިދުމަތް ޖަމިއްޔާއިން ވަނީ ހުޅުވާލާފައެވެ.
މި މަޝްރޫޢު ފެށުމުގެ ކުރިން، ޚިދުމަތް ޖަމިއްޔާއިން ވަނީ ބަންގްލަދޭޝްގައި ޝައިޚް ފަރީދުގެ ހަނދާނުގައި މިސްކިތެއް ބިނާކުރުމަށް ފަންޑް ރެއިޒް ކޮށްފައެވެ. އެ މަޝްރޫޢަށް ބޭނުންވާ 760،000 ރުފިޔާ މިހާރު ވަނީ ހަމަވެފައެވެ. ބަންގްލަދޭޝްގައި ބިނާކުރާ މިސްކިތަކީ 455 މީހުންގެ ޖާގައިގެ 250 އަކަމީޓަރުގެ މިސްކިތެކެވެ.
ރާއްޖޭގައި ޝައިޚް ފަރީދުގެ ހަނދާނުގައި މިސްކިތެއް ބިނާކުރުމަށް ނިންމީ ގިނަ ބައެއްގެ އެދުމުގެ މަތިންނެވެ. މި މަޝްރޫޢާ ގުޅޭގޮތުން އިސްލާމިކް މިނިސްޓަރ ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ މިއީ ވަރަށް ރަނގަޅު ނިންމުމެއް ކަމަށާއި، ޝައިޚްގެ ހަނދާނެއް ރާއްޖޭގައި ހުރުން މާ އައުލާކަން ބޮޑު ކަމަށެވެ.
އިސްލާމިކް މިނިސްޓްރީން މި މަޝްރޫޢަށް ފުރިހަމަ އެއްބާރުލުން ދޭނެ ކަމަށް ޑރ. ޝަހީމް ވަނީ ވިދާޅުވެފައެވެ. އަދި މިސްކިތުގައި އިސްލާމީ ޢިލްމުގެ ލައިބްރަރީއަކާއި ޤުރުއާން ކިޔަވައިދޭ ކްލާސްރޫމްތައް ހިމެނުމަށް ހުށަހަޅުއްވައިފައިވެއެވެ. މީގެ އިތުރުން، މިސްކިތް ބިނާކުރާނެ ތަނެއް ހަމަޖެއްސުމާއި މާލީ އެހީތެރިކަންވެސް ފޯރުކޮށްދެއްވާނެ ކަމަށް އިސްލާމިކް މިނިސްޓަރ ވަނީ ވިދާޅުވެފައެވެ.
ޝައިޚް އިބްރާހީމް ފަރީދަކީ ދިވެހިރާއްޖޭގެ ނަންހިނގާ ޢިލްމުވެރިއެކެވެ. އެމަނިކުފާނު އަވަހާރަވީ މެލޭޝިއާގައި ހުންނަވަނިކޮށެވެ. ޝައިޚްގެ ހަނދާނުގައި މިސްކިތެއް ބިނާކުރުމަކީ އެމަނިކުފާނުގެ ޢިލްމީ އަދި ދީނީ ޚިދުމަތްތަކަށް ޝުކުރުވެރިވުމުގެ ގޮތުން ކުރެވޭ މަސައްކަތެއް ކަމުގައި ޚިދުމަތް ޖަމިއްޔާއިން ބުނެފައިވެއެވެ.
