މިމަހުގެ 10 ވަނަ ދުވަހުގެ ރޭ މޯލްޑިވްސް ކަސްޓަމްސް ސަރވިސްއިން އަތުލައިގަތް 26 މިލިއަން ރުފިޔާގެ މަގުމަތީ އަގެއް ހުރި 18 ކިލޯގެ މަސްތުވާތަކެތީގެ ޝިޕްމެންޓާ ހަވާލުވާން ދިޔަ 35 އަހަރުގެ ބިދޭސީ ފިރިހެނާ ފުލުހުންގެ ބަންދުން ދޫކޮށްލައިފިއެވެ.
ބެންގަލޫރު މަގުން ރާއްޖެއައި ފްލައިޓެއްގައި ރާއްޖެ އެތެރެކުރަން އުޅުނު މި މަސްތުވާތަކެތި ހުރީ ޕްލާސްޓިކް ގަސްޕޮޓްތަކެއްގައި ފޮރުވާފައެވެ. މި މައްސަލައިގައި ހައްޔަރުކުރެވުނު ބިދޭސީމީހާއަކީ އެ ތަކެއްޗާ ހަވާލުވުމަށް ކަސްޓަމްސްއަށް ގޮސް ހުރި މީހާއެވެ.
ފުލުހުންނާ ބުނި ގޮތުގައި، ފުލުހުންގެ ތަޙުޤީޤަށް ހޯދުނު ހެކިތަކުން، މަސްތުވާތަކެތި އެތެރެކުރި ފަރާތްތަކާއި މުދާ ކްލިއަރ ކުރަން ދިޔަ ބިދޭސީމީހާއާ ދެމެދު ގުޅުމެއް އޮތްކަން ސާބިތުނުވާތީ، އޭނާ ވަނީ ދޫކޮށްލާފައެވެ.
މި މައްސަލައާ ގުޅޭގޮތުން ކަސްޓަމްސްއިން ހާމަކޮށްފައިވަނީ އެ އިދާރާއިން އަތުލައިގަންނަ މަސްތުވާތަކެއްޗާއި، އެ ތަކެއްޗާ ހަވާލުވާން އަންނަ ފަރާތްތައް ހަވާލުކުރަނީ މޯލްޑިވްސް ޕޮލިސް ސަރވިސްއާ ކަމަށެވެ.
ފުލުހުން ގެންދަނީ މި މައްސަލަ އިތުރަށް ތަޙުޤީޤު ކުރަމުންނެވެ.
