އުރީދޫގެ ނަން ބޭނުންކޮށްގެން ސްކޭމު ކޯލުތަކާއި އެސްއެމްއެސްތަކުގެ މައްސަލަ އާންމުވާތީ، އެކަމަށް ސަމާލުވުމަށް އުރީދޫއިން އިލްތިމާސްކޮށްފިއެވެ.
އުރީދޫގެ ނަމުގައި ސްކޭމު ކޯލު އަދި އެސްއެމްއެސްއެއް ލިބިއްޖެނަމަ، އަން ޓައިމް ޕާސްވޯޑް(އޯޓީޕީ) ނުވަތަ ބޭންކު މައުލޫމާތު ހިއްސާނުކުރުމަށް އިލްތިމާސްކޮށްފައެވެ. އަދި އެ އެސްއެމްއެސްތަކުން ފޮނުވާ ވާނުވާ ނޭންގޭ ލިންކުތަކަށް ނުފިތުމަށްވެސް އުރީދޫން ވަނީ އިލްތިމާސްކޮށްފައެވެ.
މީގެއިތުރުން، ސްކޭމް ކޯލެއް ނުވަތަ މެސެޖެއް ލިބިއްޖެނަމަ، ދިވެހި ފުލުހުންގެ ހިދުމަތުގެ ނަމްބަރު 3322111 ނުވަަތަ 3322112އަށް ރިޕޯޓުކުރެއްވުމަށްވެސް އުރީދޫއިން ވަނީ އެދިފައެވެ.
ދުނިޔެ ބަވަނަވެ، ޓެކްނޮލޮޖީގެ ތަރައްގީވަމުންދާވަރަކަށް، ސްކޭމްތަކުގެ މައްސަލަ އިތުރުވަމުންދާކަމީ ކަންބޮޑުވާންޖެހޭ ވަރަށް ބޮޑު މައްސަލައެކެެވެ. މި މައްސަލަތައް ރާއްޖޭގައި ހުއްޓުމެއްނެތި އިތުރުވަމުންދާއިރު، މިފަދަ މައްސަލަތަކާއި ދެކޮޅަށް މަސައްކަތްކުރުމަށްޓަކައި އާންމުންގެ ހޭލުންތެރިކަން ވަރަށް މުހިންމުއެވެ.
