ރައީސުލް ޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ކުޅުދުއްފުށި ރީޖަނަލް ހޮސްޕިޓަލަށް ޒިޔާރަތްކުރައްވައިފިއެވެ.
ސާޖިދާގެ މި ދަތުރުފުޅަކީ ކުޅުދުއްފުށި ހޮސްޕިޓަލުގެ 43 ވަނަ އަހަރީ ދުވަހުގެ ޚާއްސަ ރަސްމިއްޔާތުގައި ބައިވެރިވެވަޑައިގަތުމަށް ކުރައްވާ ދަތުރުފުުޅެކެވެ.
މި ޒިޔާރަތުގައި އެކަމަނާ ވަނީ ކުޅުދުއްފުށީ ރީޖަނަލް ހޮސްޕިޓަލްގެ އެކި ޑިޕާޓްމަންޓުތަކަށް ޒިޔާރަތްކުރައްވައި، ސިއްހީ ދާއިރާގައި މަސައްކަތްކުރައްވާ ފަރާތްތަކާއި އިސްވެރިންނާ ބައްދަލުކުރައްވާފައެވެ.
އޭގެ އިތުރުން އެ ހޮސްޕިޓަލުން ފޯރުކޮށްދޭ ޚިދުމަތްތަކުގެ އެންމެ ފަހުގެ މަޢުލޫމާތު ވެސް އެކަމަނާ ވަނީ ހޯއްދަވާފައެވެ. އަދި ހޮސްޕިޓަލަށް މިހާރު ކުރިމަތިވެފައިވާ ގޮންޖެހުންތަކާ ބެހޭ ގޮތުން ސުވާލުކުރައްވާ، ބައެއް ބަލި މީހުންނާ ބައްދަލުކުރައްވާ އެމީހުންގެ ހާލު އެކަމަނާވަނީ ބައްލަވާލައްވަފާއެވެ.
ސާޖިދާގެ މި ދަތުރުފުޅުގައި ކުޅުދުއްފުށީ ރީޖަނަލް ހޮސްޕިޓަލަށް 43 އަހަރު ފުރުމުގެ މުނާސަބަތުގައި ބޭއްވުމަށް ހަމަޖެހިފައިވާ ރަސްމިއްޔާތުގައި އެކަމަނާ ބައިވެރިވެވަޑައިގަތުމަށް ވަނީ ހަމަޖެހިފައެވެ.
ސާޖިދާގެ މިދަތުރުފުޅުގައި ކުޅުދުއްފުށި ރީޖަނަލް ހޮސްޕިޓަލުގެ 43 ވަނަ އަހަރީދުވަހުގެ ޖަލްސާގައި ބައިވެރިވެވަޑައިގަންނަވާނެއެެވެ. އެޖަލްސާގައި ހޮސްޕިޓަލުގެ ތަރައްޤީއަށް އެކި ގޮތްގޮތުން އެހީތެރިކަން ފޯރުކޮށްދީފައިވާ ފަރާތްތަކުގެ އަގު ވަޒަންކުރުމާއި 10 އަހަރާއި 20 އަހަރު އަދި 30 އަހަރު ހޮސްޕިޓަލަށް ޚިދުމަތްކުރައްވާފައިވާ ފަރާތްތަކުގެ އަގުވަޒަން ކުރުމަށްވެސްވަނީ ހަމަޖެހިފައެވެ.
