މަސްތުވާތަކެތީގެ މައްސަލައަކާއި ގުޅިގެން ބ. ކަމަދޫއިން 2 މީހަކު ފުލުހުން ހައްޔަރުކޮށްފިއެވެ.
މިކަމާއި ގުޅިގެން ފުލުހުން މައުލޫމާތު ދެމުން ބުނެފައިވަނީ، 2025 ޖުލައި 2 ވަނަ ދުވަހު، ކަމަދޫ ޕޮލިސް ޕޯސްޓުން އޮޕަރޭޝަނެއް ހިންގިއިރު، މަސްތުވާތަކެތި ގެންގުޅެ، އެ ތަކެތީގެ ވިޔަފާރިކުރާކަމަށް ތުހުމަތުކުރެވޭ މައްސަލައާ ގުޅިގެން ކަމަދޫ ގެއެއް ބަލާފާސްކުރިކަމަށެވެ. އަދި ބަލާފާސްކުރުމުގެ ތެރެއިން މަސްތުވާތަކެތިކަމަށް ޝައްކުކުރެވޭ އެއްޗެއް ހުރި ރަބަރު ޕެކެޓެއް ފެނިފައިވާކަމަށް ފުލުހުން ބުނިއެވެ.
މި އޮޕަރޭޝަނުގައި މަސްތުވާތަކެތި ގެންގުޅެ، އެތަކެތި ވިޔަފާރިކުރި ކަމުގެ ތުހުމަތުގައި ހައްޔަރުކުރެވުނީ 2 މީހުންކަމަށްވާއިރު، އެ ދެ މީހުންނަކީ، ބ. ކަމަދޫ / ސުވާސާގެ، ޢަލީ ރިޔާޟު ޙަސަން (53އ) އާއި ބ. ކަމަދޫ / ފެންފިޔާޒުގެ، އާމިނަތު ފަރީޝާ (42އ) އެވެ.
މި މައްސަލައާއި ގުޅިގެން ހައްޔަރުކުރެވުނު 2 މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރެވުމުން، އެ ދެ މީހުން 30 ދުވަހަށް ބަންދުކުރުމަށް ވަނީ އަމުރުކޮށްފައެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެެވެ.
