ލާމަރުކަޒީ ގާނޫނަށް ބަދަލުގެނެސް އެންމެ ރަނގަޅަށް އެކަމަށް މަސައްކަތް ކުރަން ވަގުތެއް ނެތް ކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އަހުމަދު އަޒާން މަރުޒޫގް ވިދާޅުވެއްޖެއެވެ.
ސަންގުޓީވީގެ ”ހަބަރަށްފަހު“ ޕްރޮގްރާމްގައި އަޒާން ވިދާޅުވީ މަޖިލީހަށް ބިލު ނާންނަ ކަމަށެވެ. އަދި މަޖިލިސް ބައްލަވާ ފަރާތްތަކަށްވެސް އެކަން ފެންނާނެ ކަމަށާއި، މަޖިލީހުގައި މަސައްކަތް ނެތް ކަން އެނގިވަޑައިގަންނަވާނެ ކަމަށެވެ. އަޒާން ވިދާޅުވީ މަޖިލީހުގައި ބިލެއް އެޖެންޑާކޮށްގެން ބަހުސް ކުރިއަށް ގެންދެވޭނީ ބަންޑާރަ ނައިބުގެ އޮފީހުން ބިލުތައް ފޮނުވައިގެން ކަމަށެވެ.
އަޒާން ވިދާޅުވީ މިހަފްތާ ތަންކޮޅެއް ރަނގަޅަށް ދިޔަ ކަމަށާއި، 2 ބިލެއް އައިސްފައިވާ ކަމަށެވެ. އެހެންނަމަވެސް ފާއިތުވި ދުވަސްތަކުގައި އެއްވެސް ބިލެއް ނައިސް، އެއްވެސް ކަމެއް ނެތި ހަމައެކަނި ކުއްލި މައްސަލަތަކަށް ބަހުސްކޮށްލައި، ގަރާރުތަކަށް ވާހަކަދައްކައި ކަންކަން ދިޔައީ އެމަގުން ކަމަށް މެމްބަރު ވިދާޅުވިއެވެ. އަޒާން ވިދާޅުވީ ބިލުތައް ލަސްވަނީ ކީއްވެކަން އެނގިވަޑައި ނުގަންނަވާ ކަމަށެވެ.
”ބަންޑާރަ ނައިބުގެ އޮފީހުގެ ބޭފުޅުންނަށް ބިލުތައް ތައްޔާރު ނުކުރެވެނީ ކަމަށްވެސް ވެދާނެ. އެކަމު ތި ވިދާޅުވި ގޮތަށް ނިސްބަތުން މަދު ބިލުތައް އަންނަލެއް. ކޮމިޓީތަކުގައިވެސް އޮންނާނީ ބިލުތައް އައިސްގެން ބިލުތަކާއި ގުޅޭ މަސައްކަތެއް ނޫންތޯ. ދެން ހުންނާނީ ސަފީރުންނަށް ރުހުން ދިނުމާއި މުވައްސަސާތަކަށް މީޙުން އައްޔަނު ކުރުމާއި، އެއީ މާ ބޮޑު މަސައްކަތްތަކެއް ނޫން، މަސައްކަތެކޭ ކިޔާ ވަރުގެ. އެހެންވީމާ މާ ބޮޑު މަސައްކަތެއް ނެތި މިދިޔައީ“
ލާ މަރުކަޒީ ގާނޫނުގެ ވާހަކައަށް އަލިއަޅުވާލައްވާ ދެއްކެވި ވާހަކަފުޅުގައި އަޒާން ވިދާޅުވީ ހަގީގަތައް ވިދާޅުވާ ނަމަ، ބިލެއް ހުށައަޅައިގެން އެންމެ ރަނގަޅަށް އެއަށް ވާހަކަދައްކާ، މެމްބަރުންގެ އަދި ރައްޔިތުންގެ މަސައްކަތާއި ހިޔާލާއި ލައިގެން ކަންކަން ކުރުމަށް ވަގުތުނެތް ކަމަށެވެ. މެމްބަރު ވިދާޅުވީ އެހެންނަމަވެސް ކަންތައްތައް ހިނގަނީ އެހެން ނޫން ކަމަށާއި، ބިލެއް ހުށައަޅައި އެއްދުވަސް ތެރޭގައި އެ ބިލު ފާސްކޮށް ތަސްދީގުވެސް ކުރާ ކަމަށެވެ.
މީގެއިތުރަށް މެމްބަރު ވިދާޅުވީ ރަނގަޅަށް އެ މައްސައްކަތް ކުރައްވާ ނަމަ އެކަމަށް ވަގުތު ބޭނުންވާނެ ކަމަށެވެ. އަދި އެބިލު މަޖިލީހަށް ނާންނަ ކަމަށާއި އަންނާނެ ކަންވެސް އެނގިވަޑައިނުގަންނަވާ ކަމަށްވެސް މެމްބަރު ވިދާޅުވިއެވެ.
