ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ 4000 ހައުސިންގ ޔުނިޓުގެ އެއްބަސްވުމުގެ ދަށުން ދައްކަންޖެހޭ މަހު ކުއްޔާއި މެއިންޓަނަންސް ފީ މީލާދީ މަހެއްގެ 10 ވަނަ ދުވަހު ކުރިން ބަރާބަރަށް ދައްކާނަމަ 100 އިންސައްތައިގެ ސަބްސިޑީގެ މަންފާ ލިބޭނެކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފިއެވެ.
އެފްޑީސީން ހުޅުމާލޭގެ ދެވަނަ ފިޔަވަހީގައި ތަރައްގީކޮށްފައިވާ 4000 ހައުސިންގ ޔުނިޓު ލިބޭ ފަރާތްތައް ހައުސިންގ މިނިސްޓްރީން ކަނޑައެޅުމާއި ގުޅިގެން އެފްޑީސީން އާންމުންނަށް މައުލޫމާތު ފޯރުކޮށްދިނުމުގެ ސެޝަނެއް ކުރިޔަށް ގެންދިޔަ އެވެ. އެ ބައްދަލުވުމުގައި ހިއްސާ ކުރި ބައެއް މައުލޫމާތުތަކުގައި އޮޅުންއެރުންތަކެއް ހުރުމުން، ސައްހަ ނޫން ވާހަކަތަކެއް ފެތުރެމުން ދާތީ އެކަން އެފްޑީސީން ވަނީ ސާފުކޮށްދީފައެވެ.
އެ ކޯޕަރޭޝަނުން ނެރުނު ބަޔާނޔގައި ބުނީ 4000 ހައުސިންގ ޔުނިޓުގެ އެއްބަސްވުންތަކަކީ އިސްލާމީ ޝަރީއާގެ ހަމަތަކާއި އެއްގޮތްވާ ގޮތުގެ މަތިން އެކުލަވާލެވިފައިވާ އެއްބަސްވުމެއް ކަމަށެވެ. އެހެންކަމުން އެ އެއްބަސްވުމުގެ ދަށުން ދައްކަންޖެހޭ މަހު ކުއްޔާއި މެއިންޓަނަންސް ފީ އެ މަހެއްގެ 10 ވަނަ ދުވަހު ކުރިން ދައްކައިފިނަމަ 100 އިންސައްތައިގެ ސަބްސިޑީގެ މަންފާ ލިބިގެންދާނެކަމަށް ވަނީ ބުނެފަ އެވެ.
އެހެންނަމަވެސް މަހުގެ 10ވަނަ ދުވަހަށްވުރެ ފަހުން މަހު ކުލި ދައްކާ ހާލަތުގައި ސަބްސިޑީގެ އިންސައްތައަށް ބަދަލުތަކެއް އަންނާނެ ކަމަށް އެފްޑީސީން ވަނީ ބަޔާންކޮށްފައެވެ.
އެގޮތުން އަންނާނެ ބަދަލުތަކުގެ ތެރޭގައި:
-
މަހުގެ 16ގެ ކުރިން މަހު ކުލި ދައްކައިފިނަމަ 75 އިންސައްތަ ސަބްސިޑީގެ މަންފާ
-
މަހުގެ 21ގެ ކުރިން މަހު ކުލި ދައްކައިފިނަމަ 50 އިންސައްތަ ސަބްސިޑީގެ މަންފާ
-
މަހުގެ 26ގެ ކުރިން މަހު ކުލި ދައްކައިފިނަމަ 25 އިންސައްތަ ސަބްސިޑީގެ މަންފާ
-
މަހުގެ 26ގެ ފަހުން މަހު ކުލި ދައްކައިފިނަމަ، ދައްކަންޖެހޭނީ ސަބްސިޑީގެ މަންފާ ނުހިމަނާ މަހުކުލި
އެފްޑީސީން ބުނެފައިވަނީ އެއްބަސްވުމުގެ ދަށުން މަހު ކުއްޔާއި، ސަބްސިޑީ މަހުގެ ނިޔަލަށް ނުދައްކައިފިނަމަ، އެ ފައިސާ ދެއްކުމަށް އެދި އެފްޑީސީއިން ކުއްޔަށް ހިފާ ފަރާތައް ލިޔުމުން 30 ދުވަހުގެ ނޯޓިހެއް ފޮނުވުމުގެ އިހްތިޔާރު ލިބިގެން ދާނެ ކަމަށެވެ.
މަހު ކުއްޔާއި މެއިންޓަނަންސް ފީގެ ގޮތުގައި ދައްކަން ޖެހޭ އަދަދު:
2 ކޮޓަރީގެ އެޕާޓްމެންޓް
- ކުލި: 7000 ރުފިޔާ
- މެއިންޓެނަންސް ފީ: 1000 ރުފިޔާ
3 ކޮޓަރީގެ އެޕާޓްމެންޓް
- ކުލި: 9000 ރުފިޔާ
- މެއިންޓެނަންސް ފީ: 1500 ރުފިޔާ
ސެކިއުރިޓީ ޑިޕޮސިޓްގެ ގޮތުގައި ދައްކަން ޖެހޭ އަދަދު:
2 ކޮޓަރީގެ އެޕާޓްމެންޓް: 15000 ރުފިޔާ
3 ކޮޓަރީގެ އެޕާޓްމެންޓް: 25000 ރުފިޔާ
4000 ހައުސިންގ ޔުނިޓްގެ މަޝްރޫޢުގެ އެއްބަސްވުންތަކުގައި ސޮއިކުރުމުގެ މަސައްކަތް މިޙާރު ވަނީ ފަށާފައެވެ. މި މަޝްރޫޢުގެ ދަށުން އިމާރާތްކުރެވޭ ”ދޯދި ޓަވަރު“ އަދި ”އުދަރެސް ޓަވަރު“ ތަކުގެ ސްޓްރަކްޗަރަލް މަސައްކަތްތައް ވަނީ ފުރިހަމަކުރެވިފައެވެ. މިހާރު ކުރިއަށްދަނީ ފިނިޝިންގ މަސައްކަތްތަކެވެ. އުދަރެސް ޓަވަރުތަކުގެ 80 އިންސައްތައިގެ މަސައްކަތް ވަނީ ނިމިފައިވާއިރު، ދޯދި ޓަވަރުތަކުގެ 86 އިންސައްތައިގެ މަސައްކަތް ވަނީ ނިމިފައެވެ.
