ކެނދިކުޅުދޫ، މެންގްރޫވް އައިލޭންޑް ގެ ގޮތުގައި ރައްޔިތުން އެދިވަޑައިގަންނަވާ ކޮންސެޕްޓަށް، އިކޯ ޓޫރިޒަމް ތަރައްޤީކުރުމަށް ސަރުކާރުން މަސައްކަތްކޮށްދެއްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.
ރައީސް މުއިއްޒު މިކަމުގެ ޔަޤީންކަންދެއްވީ، މިލަދުންމަޑުލު ދެކުނުބުރީގައި މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، ނ. ކެނދިކުޅުދޫ އަށް ވަޑައިގެން އެރަށުގެ ރައްޔިތުންނާ ބައްދަލުކުރެއްވުމަށް ކެނދިކުޅުދޫގައި ބޭއްވި ޖަލްސާގައި ވާހަކަފުޅު ދައްކަވަމުންނެވެ.
ރައީސް މުއިއްޒު ވިދާޅުވީ ރާއްޖޭގެ އެހެން ރަށްރަށުގައި ހުންނަ ގުދުރަތީ ރީތިކަމުގެ ފައިދާ އެރަށްރަށުންވެސް ބޭނުންވާނެ ކަމަށާއި އެ ހުރިހާ ކަމަކަށް ވިސްނާވަޑައިގެން، ހުރިހާ ރަށެއްގެ ރައްޔިތުންނަށް ފައިދާވާނެ ގޮތަކަށް ސަރުކާރުން އެކަމަށް ގޮތްތަކެއް ހޯއްދަވައިދެއްވާނެ ކަމަށެވެ.
ކެނދިކުޅުދޫއަށް އެ މަނިކުފާނު ވެވަޑައިގެންފައިވާ ވަޢުދުތައް މިއަހަރާއި އަންނަ އަހަރުގެ ތެރޭގައި ފުއްދަވައި ނިންމެވުމަކީ ޢަޒުމެއް ކަމަށާއި މިއަހަރު ތެރޭގައި ވަރަށް ގިނަ ރަށްރަށުގެ ތަރައްޤީގެ ކަންކަމުގެ ޢަމަލީ މަސައްކަތް ފެށިގެންދާނެކަން ފާހަގަކުރައްވައި އެ މަނިކުފާނު ވިދާޅުވީ 2026 ވަނަ އަހަރު ހުރިހާ ރަށަކަށް ވެވަޑައިގެންފައިވާ ވަޢުދުތަކުގެ އަމަލީ މަސައްކަތް ފެށިގެންދާނެކަމަށެވެ.
2027 އާއި 2028 ގައި ކުރިއަށްދާނީ ހުރިހާ މަސައްކަތެއް ނިންމުގެ މަސައްކަތް ކަމަށާއި، އިޤްތިޞާދީގޮތުން ދިމާވެފައިވާ ހުރިހާ ދަތިކަމަކުން އަރައިގަނެ، ދަރަނި ދެއްކުމުގައި ދަތިތަކެއް ދިމާނުވާނެ ގޮތަށް ޕްލޭންކުރެވި ރައްޔިތުންނަށް ވެވަޑައިގެންފައިވާ ވަޢުދުތައް ފުއްދުމަށް ކަންކަން ތަރުތީބުކުރައްވަމުން ގެންދަވާ ކަމަށް އެމަނިކުފާނު ވިދާޅުވިއެވެ.
