ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ދައުވަތަކަށް ސްރީލަންކާގެ ރައީސް އަނުރާ ކުމާރާ ދިސަނަޔަކަ، ރާއްޖެ ވަޑައިގަންނަވާނެކަމަށް ރައިސުލްޖުމްހޫރިއްޔާގެ އޮފީހުން ވިދާޅުވެއްޖެއެވެ.
ސްރީލަންކާގެ ރައީސް ރާއްޖެ ވަޑައިގަތުމަށް ހަމަޖެހިފައިވަނީ އަންނަ ހޯމަ ދުވަހުއެވެ. އެމަނިކުފާނު ރާއްޖެ ވަޑައިގަންނަވަނީ 3 ދުވަހުގެ މުއްދަތަކަށެވެ.
މިއީ ސްރީލަންކާގެ ރައީސް އަނުރާ ކުމާރާ ދިސަނަޔަކަ މަޤާމާ ހަވާލުވެވަޑައިގެންނެވިފަހުން ދިވެހިރާއްޖެއަށް ކުރައްވާ ފުރަތަމަ ފުރަމާނަ ދަތުރުފުޅެވެ.
މި ދަތުރުގައި ދިވެހިރާއްޖެއާ ސްރީލަންކާއާ ދެމެދު މަތީފަންތީގެ މަޝްވަރާތައް ކުރިއަށްގެންދެވޭނެކަމަށް ރައީސް އޮފީހުން ބުނެފައިވެއެވެ. އެގޮތުން ދެ ގައުމުގެ ދެމެދުގައި ގުޅުން ބަދަހިކުރެވޭނެ ދާއިރާތަކާއި، ދޭދޭ މުހިންމު ދާއިރާތަކުން މަޝްވަރާތައް ކުރިއަށްގެންދާނެއެވެ.
މި ދަތުރުފުޅު ދިމާވަނީ ދިވެހިރާއްޖެއާއި ސްރީލަންކާއާ ދެމެދު ހާރިޖީ ގުޅުން ޤާއިމުކުރިތާ 60 އަހަރު ފުރޭ މުނާސަބާއާއިކަން ފާހަގަކޮށްލެވެއެވެ. ދިވެހިރާއްޖެއާ ސްރީލަންކާއާ ހާރިޖީ ގުޅުން ޤާއިމުކުރީ 26 ޖުލައި 1965 އަހަރުއެވެ.
