ވެލާނާ އިންޓަނޭޝަނަލް އެއާޕޯޓު ހުޅުމުގެ މުނާސަބަތުގައި މާލެ ވަށައިގެން 16 ސަރަހައްދު އަދި އެއާޕޯޓުގެ 3 ސަރަހައްދުން ހަވާއަރުވަން ނިންމައިފިއެވެ.
ދިވެހިރާއްޖެއަށް މިނިވަންކަމަށް 60 އަހަރު ފުރޭ ދުވަހަކީ، 2025 ޖުލައި 26 ވާ ހޮނިހިރު ދުވަސްކަމަށްވާއިރު، އެ ދުވަހުގެ މުނާސަބަތުގައި ވެލާނާ އިންޓަނޭޝަނަލް އެއާޕޯޓު ހުޅުވުމަށް ވަނީ، އެ ދުވަހުގެ ރޭގަނޑު 8:00 ޖަހާއިރު ހަމަޖެހިފައެވެ.
މިކަމާއި ގުޅިގެން އެމްއެންޑީއެފްއިން މައުލޫމާތު ދެމުން ބުނެފައިވަނީ، ގްރޭޓާ މާލެ ސަރަހައްދުގެ ކަނޑުގެ 16 ސަރަހައްދަކާއި އެއާޕޯޓު ކައިރިން 3 ސަރަހައްދަކުން ހަވާއަރުވާނެކަމަށެވެ. އަދި މި ހަވާއެރުވުމުގެ ދިގުމިނަކީ 6 މިނިޓުކަމަށް އެމްއެންޑީއެފްއިން ހާމަކޮށްފައިއެވެ. މިއީ، ރާއްޖޭގެ ތާރިހުގައި އެންމެ ބޮޑު ސަރަހައްދެއްގައި ހަވާ އަރުވާ އެންމެ ފުރަތަމަ ފަހަރެވެ.
މީގެއިތުރުން، ހަވާއެރުވުން ފެށުމަށް ހަމަޖެހިފައިވާ ވަގުތަކީ، 2025 ޖުލައި 26 ވަނަ ދުވަހުގެ ރޭގަނޑު، އެއާޕޯޓު ހުޅުވުމުގެ ރަސްމިއްޔާތުގެ ތެރެއިން، 8:30 ގައެވެ.
މިކަމާއި ގުޅިގެން އެމްއޭސީއެލްއިން ބުނެފައިވަނީ، ވީއައިއޭ އައު ޓާމިނަލް ހުޅުވުން ފާހަގަކުރުމުގެ ގޮތުން އަރުވާ ހަވާ ވެގެންދާނީ ތާރީހީ ހަވަޔަކަށް ކަމަށެވެ. އަދި މިއީ، ހައިރާންވާނެ ފަދަ ހަވާއެރުވުމެއްކަމަށްވެސް އެމްއޭސީއެލްއިން ވަނީ ފާހަގަކޮށްފައެވެ.
ހަވާއެރުވުމުގެ އިތުރުން، ޑްރޯން ޝޯއެއްވެސް ބޭއްވުމަށް ވަނީ ހަމަޖެހިފައެވެ.
