ޒަކިއްޔާގެ މަރުގެ މައްސަލައިގައި ނޭޝަނަލް އިންޓެގްރިޓީ ކޮމިޝަނުން ތަހުގީގު ކުރުމަށްފަހު 7 އޮފިސަރެއްގެ މައްސަލަ ޕީޖީ އޮފީހަށް ފޮނުވާފައިވާއިރު، އޭގެ ތެރޭގައި ފުލުހުންގެ އިސްވެރިންތަކެއް ހިމެނޭކަމަށް މައުލޫމާތު ލިބިއްޖެއެވެ.
އިތުބާރު ހުރި މަސްދަރަކުން ”ސަންގަށް“ ކަށަވަރު ކޮށްދީފައިވާ ގޮތުގައި އެންއައިސީން ދައުވާކުރަން އެދުނު މީހުންގެ ތެރޭގައި ސީޕީ އިސްމާއިލް ނަވީންގެ އިތުރުން، ސީރިއަސް އެންޑް އޮގަނައިޒް ކްރައިމް ޑިޕާޓްމަންޓުގެ ހެޑު ޗީފް ސުޕްރިޓެންޑެންޓް އޮފް ޕޮލިސް ހަސަން ޝިފާއު، އަދި އޭސީޕީ މުޙައްމަދު ރިޔާޒު ހިމެނިވަޑައިގަންނަވައެވެ.
މީގެ އިތުރުންވެސް 4 އޮފިސަރެއްގެ މައްޗަށް ދައުވާކޮށްދިނުމަށް އެންއައިސީން އެދިފައިވެއެވެ.
އެކަމާ ގުޅޭގޮތުން ޕީޖީ އޮފީހުގެ އޮފިޝަލަކު ސަންގަށް ވިދާޅުވީ، މި މައްސަލައިގައި އެންއައިސީން ތަހުގީގު ކުރުމަށްފަހު 7 އޮފިސަރެއްގެ މައްސަލަ ޕީޖީ އޮފީހަށް ފޮނުވާފައިވާ ކަމަށާއި އަދި މި މައްސަލައިގައި ހުރި ތުހުމަތުތައް ދިރާސާ ކުރުމަށްފަހު، ދައުވާ ކުރުމާމެދު ޕީޖީ އޮފީހުން ވަރަށް އަވަހަށް ގޮތެއް ނިންމާނެކަމަށެވެ.
އެންއައިސީން ކޮށްފައިވާ ތުހުމަތުތަކުގެ ތެރޭގައި ރަސްމީ ވާޖިބު އަދާކުރުމުގައި ހިންގާ އެކަށީގެން ނުވާ ޢަމަލުތަކާއި، ރަސްމީ ހައިސިއްޔަތުގެ ނުވަތަ އެ ހައިސިއްޔަތުގެ ނުފޫޒު ނަހަމަގޮތުގައި ބޭނުންކުރުމާއި، ޢަދުލު އިންޞާފު ޤާއިމުކުރުމަށް ހުރަސްއެޅުމާއި އަދި ޤާނޫނު ހިންގުމަށް ހުރަސްއެޅުމާއި ދައުލަތުގެ އެހެނިހެން މަސައްކަތްތަކަށް ހުރަސްއެޅުން ހިމެނެއެވެ.
އެހެންކަމުން އެ ތުހުމަތުތައް ދިރާސާ ކުރުމަށްފަހު ދައުވާ ކުރެވެން ހުރި މައްސަލަތަކުގައި ޕީޖީ އޮފީހުން ދައުވާ ކުރާނެ ކަމަށާއި، ތަހުގީގު އިތުރަށް ފުރިހަމަ ކުރަންޖެހޭ މައްސަލައެއް ހުރިނަމަ އަނބުރާ ފޮނުވާލާނެކަމަށް އޭނާ ވިދާޅުވިއެވެ.
10 ސެޕްޓެމްބަރ 2024ގައި މަރުވެފައި އޮއްވާ ފެނުނު ޒަކިއްޔާގެ މައްސަލަގައި ގިނަ ކަންތައްތަކެއް އޭނާގެ އާއިލާއިންވެސް ވަނީ ތުހުމަތުކޮށްފައެވެ. މިއަދާ ހަމައަށް މަރުގެ ޙަޤީޤަތް ހޯދުމުގައި އެކަށީގެންވާ ތަޙްޤީޤެއް ހިންގިފައިވާ ކަމުގައި އާއިލާއިން ނުދެކޭ ކަމަށް އޭނާގެ އާއިލާއިން ބުނެފައިވެއެވެ.
ތަޙްޤީޤު މަރުޙަލާގައި ހަދާފައިވާ ބައެއް ގޯސްތައް ޚުދު މިނިސްޓަރުގެ އިތުރުން ޕޮލިސް ކޮމިޝަނަރ ވެސް ފާހަގަކޮށްފައިވާ ކަމަށް އޭނާގެ ވަކީލު ފާހަގަކޮށްފައިވެއެވެ. އެގޮތުން، އޮޓޮޕްސީ ނަހަދާ ދޫކޮށްލުމަކީ ރަނގަޅަށް ކުރެވުނު ކަމެއްނޫން ކަމާއި، އެއީ ތަޙްޤީޤު މަރުޙަލާގައި ހެދުނު ގޯހެއް ކަމަށް 26 ފެބްރުއަރީ 2025 ގައި ހޮޅުދޫ ރައްޔިތުންނާ ބައްދަލުކޮށް ދެބޭޅުން ދެއްކެވި ވާހަކަފުޅުގައިވެސް އެކަން ފާހަގަކުރެއްވި ކަމަށް ވަކީލުން ފާހަގަކުރެއްވިއެވެ.
ނިމުނު ޖުލައި މަހު ނ. އަތޮޅަށް ކުރެއްވި ދަތުރުފުޅުގައި ހޮޅުދުއަށް ވަޑައިގެން ރައީސް ޑރ. މުހައްމަދު މުއިއްޒު، ޒަކިއްޔާގެ އާއިލާ އާ ބައްދަލުކުރައްވާފައިވެއެވެ. އެ ބައްދަލުވުމުގައި ޒަކިއްޔާގެ އާއިލާއިން ވަނީ އޭނާގެ މަރުގެ ފުރިހަމަ ތަހުގީގެއް ހިންގުމަށާއި، އިންސާފު ގާއިމްކުރުމަށް ކުރެވެންހުރި ހުރިހާ ކަމެއް ކޮށްދިނުމަށް ރައީސްގެ އަރިހުގައި އެދިފައެވެ.
