ހައްޖަށް ދާން ޖާގަ ލިބޭ މީހުންގެ ލިސްޓު އާންމު ކުރެވޭނެ ނިޒާމެއް ގާއިމްކުރުމުގެ މަސައްކަތްކުރަމުންދާކަމަށް އިސްލާމިކް މިނިސްޓަރ ޑރ އަހުމަދު ޝަހީމް ވިދާޅުވެއްޖެއެވެ.
ޑރ ޝަހީމް މިހެން ވިދާޅުވީ މިއަދުގެ ރައްޔިތުންގެ މަޖިލީހުގައި ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ކުރެއްވި ސުވާލަކަށް ޖަވާބުދެއްވުމަށެވެ. މީކާއީލް ސުވާލުކުރެއްވީ، ވީހާވެސް ދެފުށް ފެނަނަ، ކޯޕްޝަނަށް ޖަގާ ނޯންނާނެހެން ހައްޖަށް ދާން ފައިސާ ދައްކާފައިވާ ފަރާތްތަކުގެ ލިސްޓް އާންމުކުރުމުގެ ވިސްނުން ގެންގުޅުންވަންތޯއެވެ. އަދި ހައްޖު ކޯޕަރޭޝަންގެ އެމްޑީގެ އާއިލާ ބޭފުޅުން އެހީތެރިންގެ ގޮތުގައި ގަނޑުކޮށް ހައްޖަށް ވަޑައިގެންތޯއެވެ.
ޑރ ޝަހީމް ވިދާޅުވީ އަބަދުވެސް މަސައްކަތް ކުރަނީ ކޮރަޕްޝަނާއި ދެކޮޅަށްކަމަށެވެ. މޯލްޑިވްސް ހައްޖު ކޯޕަރޭޝަންގެ މަސައްކަތްތައް ދެ ފުށް ފެންނަ ގޮތަކަށް ބެހެއްޓުމަކީ އަމާޒުކަމަށް ޑރ ޝަހީމް ވިދާޅުވިއެވެ. ހައްޖަށް ދާން ޖާގަ ލިބޭ މީހުންގެ ލިސްޓު އާންމު ކުރެވޭނެ ނިޒާމެއް ރާއްޖޭގައި ގާއިމްކުރުމުގެ މަސައްކަތް ކުރަމުންދާކަމަށް ޑރ ޝަހީމް ވިދާޅުވިއެވެ.
ހައްޖުގެ އަގު ކުޑަކުރުމުގެ މަސައްކަތްވެސް ކުރަމުންދާކަމަށާއި، މިއީ ހައްޖު ކޯޕަރޭޝަންގެ ތަސައްވުރުކަމަށް ފާހަގަކޮށް މިނިސްޓަރު ވިދާޅުވީ އިސްލާމިކް މިނިސްޓްރީއިން މިއަހަރު ބިނާކުރުމަށް މަސައްކަތްކުރަމުންދާ އަލްގާފް ބިލްޑިންތައް ނިމުމުން، އެ ބިލްޑިންތަކުން ނިމޭ ނަފާގެ ވަކި އިންސައްތައެއް ދިވެހި ރައްޔިތުންނަށްޓަކައި ހައްޖުގެ އަޅުކަމަށް ވަގުފު ކުރުމަށް މިދަނީ މަޝްވަރާކުރަމުންކަމަށެވެ. މިކަމަށް ބޭނުންވާ ވަރަށް ގިނަ ގުނަ ގާނޫނުތަކެއް އެބަހުރިކަމަށް ޝަހީމް ވިދާޅުވިއެވެ.
ޝަހީމް ވިދާޅުވީ ރާއްޖެއަކީ ހައްޖުގެ އަޅުކަމުގައި ފާހަގަކޮށްލެވޭ ގައުމެއްކަމަށެވެ. އަދި އެކަމަށްޓަކައި ރާއްޖޭގައި އޮންނަނީ ވަރަށް ރަނގަޅު ނިޒާމެއްކަމަށް ފާހަގަކުރެއްވިއެވެ. އެގޮތުން ދުރާލާ ހައްޖަށް ފައިސާ ދައްކާ، ހައްޖަށް ދެވޭނެ އަހަރު އެނގިފައި އޮންނަކަން ޝަހީމް ފާހަގަކުރެއްވިއެވެ.
