އަލްގާފް ބިލްޑިންތަކާއިއެކު، އިސްލާމީ ގިނަ ކަންތައްތަކަށް މިލިއަނުން މާލީ އެހީތެރިކަން ލިބިގެންދާނެކަމަށް އިސްލާމިކް މިނިސްޓަރ ޑރ ޝަހީމް އަލީ ސައީދު ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހަށް ޑރ ޝަހީމް ވަނީ ހާޒިރުކޮށްފައެވެ.
އެމްޑީޕީގެ ޕީޖީ ލީޑަރު އަހުމަދު ނާޒިލް ސުވާލުކުރެއްވީ، ދައުލަތުގެ ބަޖެޓުގެ އިތުރުން މިސްކިތްތައް ބިނާކުރުމަށް ބޭނުންވާ ފައިސާ ހޯދުމަކީ 2024 ވަނަ އަހަރުގެ އެކްޝަން ޕްލޭންގައި އިސްލާމިކް މިނިސްޓްރީއިން ހިމަނާފައިވާ ކަމަކަށްވާތީ އެކަމާއި ގުޅޭ ގޮތުންނެވެ. އެގޮތުން ކިހާ ފައިސާއެއް ލިބިފައިވޭތޯއާއި، އެ ފައިސާ ހޯދިއްޖެނަމަ ކިތައް މިސްކިތް މަރާމާތުކޮށްފިތޯއެވެ. މިސްކިތްތަކުގެ މަރާމާތަށް ޖުމްލަ ގޮތެއްގައި ކިހާ ފައިސާއެއް ހަރަދު ކުރެވިފައިވޭތޯވެސް ސުވާލުކުރެއްވިއެވެ.
ޑރ ޝަހީމް ވިދާޅުވީ މިސްކިތޔްތައް މަރާމާތު ކުރުމަށް ބޭނުންވާ ފައިސާގެ ދެގުނަ އިތުރުކުރުމަކީ ސަރުކާރުގެ ވައުދެއްކަމަށެވެ. މިއީ ރައީސުލްޖުމްހުރިއްޔާ ޑރ މުހައްމަދު މުއިއްޒުގެ ރިޔާސީ ވައުދެއްކަމަށް ވިދާޅުވިއެވެ. މީގެ ކުރިން އެއްވެސް އަހަރަކު މި މަސައްކަތަށް ހާއްސަކޮށްފައި ނުވާވަރުގެ ބަޖެޓެއް، ރައީސް މުއިއްޒު މިކަމަށްޓަކައި ހަމަޖެއްސެވިކަމަށް ޝަހީމް ފާހަގަކުރެއްވިއެވެ.
ރާއްޖޭގައި 800 އެއްހާ މިސްކިތް ހުރިއިރު، މިތަންތަން މަރާމާތު ކުރުމަށްޓަކައި އިތުރަށް ފައިސާ ބޭނުންވާނެކަމަށް ފާހަގަކޮށް ޑރ ޝަހީމް ވިދާޅުވީ، އަމާޒަކީ އަލްގާފް ބިލްޑިންތައް ގާއިމް ކުރުންކަމަށެވެ. އެތަނުން އެތައް މިލިއަން ރުފިޔާއެއްގެ އާމްދަނީ ލިބޭނެކަމަށް ޑރ ޝަހީމް ފާހަގަކުރެއްވިއެވެ. އެގޮތުން 80 މިލިއަނެއްހާ ރުފިޔާ އިސްލާމީ ފަންޑަށް މި ބިލްޑިންތަކުން ވަންނާނެކަމަށް ވިދާޅުވިއެވެ. އަލްގާފް ބިލްޑިންތައް އެޅުމުގެ ހުރިހާ ކަންތައްތަކެއް ވަނީ ހަމަޖެހިފައިކަމަށް ޑރ ޝަހީމް ވިދާޅުވިއެވެ.
މިއާއިއެކު މި ފައިސާގެ ސަބަބުން އިސްލާމީ ގިނަ ކަންކަމަށް މާލީ އެހީ ލިބިގެންދާނެކަމަށް ވިދާޅުވިއެވެ.
