ބ. އަތޮޅު ތުޅާދޫގައި ތަރައްގީ ކުރާ އެއާޕޯޓުގެ މަސައްކަތަށް އެއްވެސް ހުއްޓުމެއް ނައިސް، ޝެޑިއުލްއާއި އެއްގޮތަށް ކުރިޔަށް ގެންގޮސް ނިންމާލެވޭނެކަމުގެ ޔަގީންކަން ރައްޔިތުންނަށްދޭކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅުގެ ރަށްތަކަށް ކުރައްވަމުން ގެންސަވާ ދަތުރުގުޅުގައި މިއަދުގެ ދެވަނަ މަންޒިލެއްގެ ގޮތުގައި ވަޑައިގެންފައި ވަނީ ތުޅާދޫއަށެވެ.
މި ދަތުރުފުޅުގެ ތެރެއިން ސޮއި ކުރި ތުޅާދޫ އެއާޕޯޓުގެ މަޝްރުއޫގެ ސަބަބުން ރައްޔިތުންނަށްވާނެ ފައިދާތައް ފާހަގަކުރައްވައި ރައީސް ވިދަޅުވީ ޕްރޮޖެކްޓު އެއްވެސް ހުއްޓުމެއް ނައިސް ކުރިޔަށްދާނެކަމުގެ ޔަގީންކަން ދޭކަމަށެވެ. އަދި މި ދަތުރުފުޅުގައި އެއާޕޯޓަށް ބޭނުންވާ ބިން ހިއްކުމުގެ އަމަލީ މަސައްކަތް ވަނީ ފައްޓަވާ ދެއްވާފަ އެވެ.
ރައީސް ވިދާޅުވީ ސަރުކާރުގެ އަމާޒަކީ ކޮންމެ މަޝަރޫއުއަކުން ވެސް އޭގެ ފައިދާ ރައްޔިތުންނަށް ފުރިހަމަ ގޮތުގައި ލިބިގެން ދިއުން ކަމަށެވެ. އޭގެ ތެރޭގައި ހިމެނޭ ބިން ހިއްކުމުގެ މަސައްކަތާއި، މަގު ހެދުމުގެ މަސައްކަތް ފާހަގަކުރައްވައި ރައީސް ވިދާޅުވީ ޕްރޮޖެކްޓުތައް ފެށުމުގެ ކުރިން ކުރިޔަށް ގެންދަން ޖެހޭ އެސެސްމެންޓުތައް ލަސްތަކެއް ނައިސް ޝެޑިއުލްއާއި އެއްގޮތަށް ކުރިޔަށް ދާނެކަމަށެވެ.
ތުޅާދޫއަށް ދިމާވެފައިވާ ބޯހިޔާވަހިކަމުގެ ދަތިތަކުގެ ޝަކުވާތައް ލިބެމުން ދާތީ އެކަން ފާހަގަކުރައްވައި ރައީސް ވަނީ 100 ހައުސިން އެޅުމުގެ މަޝްރޫއު ކުރިޔަށް ގެންދާނެކަމަށް ވިދާޅުވެފަ އެވެ. ކުރީ ސަރުކާރުން ހަވާލު ކުރި ބޯހިޔާވަހިިކަމުގެ ޕްރޮޖެކްޓެއްގައި ވަރަށް ގިނަ މައްސަލަތައް ދިމާވެ، ޝަރުއީ މަރުހަލާގެ ނިންމުމެއް ވެސް އޮތުމާއި އެކު އޭގައި އެޅޭނެ މާބޮޑު ފިޔަވަޅެއް މިވަގުތު ނެތްކަމަށެވެ. އެހެންވެ ސަރުކާރުން އަމާޒު ކުރަނީ އައު 100 ފްލެޓު އެޅުމުގެ މަޝްރޫއުއެއް ކުރިޔަށް ގެންދިއުމަށް ބަޔަކާއި ހަވާލު ކުރުން ކަމަށެވެ.
އެ މަޝްރޫއުގެ ދަށުން ހައުސިން ޔުނިޓުގެ ނިންމުންތައް ނިންމާނީ، ރަށުގެ ރައްޔިތުން އެދޭ ގޮތަށްކަމަށް ރައީސް ވިދާޅުވި އެވެ. އަދި ރަށުން ބޭނުންވާ މިންގަނޑުތަކަށް ބަލައި، ގެޒެޓު ކުރެވިފައިވާ ގަވައިދުތަކާއި ފުށުނާރާ ހިނދެއްގައި ސަރުކާރުން އެކަމަކަށް އެއްބާރުލުން ދޭނެކަމަށް ރައީސް ވިދާޅުވި އެވެ.
މީގެއިތުރުން ބ. އަތޮޅަކީ ތަރައްގީ ގެނައުމުގައި ހާއްސަ އިސްކަމެއް ދޭ އެއް ސަރަހައްދުގެ ގޮތުގައި ވެސް ރައީސް ވިދާޅުވި އެވެ.
