ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ގެ މެންބަރު ކަމަށް ދެބޭފުޅެއްގެ ނަން ރައީސް ޑރ މުޙައްމަދު މުއިއްޒު ހުށަހަޅުއްވައިފިއެވެ.
އެ މަޤާމަށް އައްޔަނު ކުރެއްވުމަށް ރައީސް ފޮނުއްވަވާފައިވަނީ މުހައްމަދު ފާރިސް ތޯހާ، ހ. ސޯސަން އަދި މ. ޕޮޕީ، މުހައްމަދު ޝަފީގް މަހްމޫދުގެ ނަމެވެ. އެއީ އެޗްއާރްސީއެމްގެ ދެ މެންބަރެއްގެ ދައުރު އަންނަ ސެޕްޓެމްބަރު މަހުގެ 8ށް ހަމަވާތީއެވެ. އެއީ އެޗްއާރްސީއެމްގެ ނައިބު ރައީސް މޫމިިނާ ވަހީދު އަދި މެންބަރު އާމިނަތު ޝިފާތު އަބްދުއްރައްޒާގުގެ މެންބަރުކަމުގެ ދައުރެވެ.
އަންގާރަ ދުވަހުގެ ޖަލްސާގައި ރައީސް ހުށަހެޅުއްވި ނަންތައް ރައްޔިތުންގެ މަޖިލީހުގެ ރިޔާސަތުން ތަޅުމުގައި އިއްވުމަށްފަހު، އެ ނަންތައް ދިރާސާކުރުމަށް ހިއުމަން ރައިޓްސް އެންޑް ޖެންޑާ ކޮމިޓީއަށް ވަނީ ފޮނުވާފަ އެވެ.
އެޗްއާރްސީއެމްގެ މެމްބަރުކަމަށް ކުރިމަތިލުމަށް ފުރަތަމަ ހުޅުވާލީ ޖޫން މަހުގެ 24 ވަނަ ދުވަހުއެވެ. އޭގެ ފަހުން ޖުލައި މަހުގެ 16 ވަނަ ދުވަހުވެސް ހުޅުވާލަފައިވެއެވެ.
އެޗްއާރްސީއެމްއަކީ ދިވެހިރާއްޖޭގައި އިންސާނީ ހައްގުތައް ހިމާޔަތްކޮށް ކުރިއެރުވުމަށް މަސައްކަތްކުރާ މުހިންމު މުއައްސަސާއެކެވެ. މި މުއައްސަސާގެ މަސައްކަތްތައް އިތުރަށް ހަރުދަނާވެ، އިންސާނީ ހައްގުތަކާ ގުޅޭ މައްސަލަތަކަށް އިތުރު ސަމާލުކަމެއް ދެވޭނެ ކަމަށް ވަނީ ފާހަގަކޮށްފައެވެ.
