މަޖިލީހުގެ ދައުރު ދަންމާލައިގެން މަސައްކަތްކުރަމުންދަނީ އަވަސް އަރުވާލައިގެން ގާނޫނުތަކެއް ފާސްކުރުމަށްކަމަށް ރައްޔިތުންގެ މަޖިލީހުގެ ހިތަދޫ މެދު ދާއިރާގެ މެމްބަރު އިބްރާހިމް ނާޒިލް ވިދާޅުވެއްޖެއެވެ.
ބަންޑާރ ނައިބު އޮފީހުގެ ގާނޫނަށް ގެނެވޭ އިސްލާހާއި ގުޅޭގޮތުން މަޖިލީހުގެ ތަޅުމުގައި ވާހަކަދައްކަވަމުން ނާޒިލް ވިދާޅުވީ، މިއީ މި އަހަރުގެ ތެރޭގައި ތަސްދީކުރެވުނު ބިލަކަށް ގެނެވޭ އިސްލާހެއްކަމަށާއި ގިނަ ދުވަސްތަކެއް ނުވެ އިސްލާހުތަކެއް ގެނައުމަށް ބޭނުންޖެހިފައިވާކަމަށެވެ. އަދި ބިލުގައި ހިމެނޭ 16 މާއްދާއަކަށް އިސްލާހު ގެނެވިފައިވާކަމަށާއި އިތުރު ބައެއް އަކުރުތަކާއިއެކު ޖުމުލަ ގޮތެއްގައި ފާހަގަކުރެވިފައިވަނީ އިދާރީގޮތުން ބޭނުންވާ އިސްލާހުތަކެއްކަމަށެވެ.
ނާޒިލް ވިދާޅުވީ، އިސްލާހުތަކުގެ ތެރޭގައި ޑެޕިއުޓީ އެޓާރނީ ޖެނެރަލްގެ މަގާމު އައްޔަނުކުރުމާއި އިސްތިއުފާ ދިނުން އަދި މިގޮތަށް ހުރި އެހެނިހެން އިސްލާހުތައް ހުރިކަމަށެވެ. އަދި އެންމެ ފަހުން ކޮމިޓީގައި ބިލުގެ މަސައްކަތްތައް ކުރިއިރު ވަރަށް ފަސޭހައިން މަސައްކަތްތައް ނިންމާލެވުނުކަމަށާއި އޭޖީ އޮފީހާއިއެކު މަޝްވަރާކުރެވި ކޮމިޓީއިން އިއްތިފާގުވެ ބިލުގެ މަސައްކަތްތައް ނިންމާލެވުނުކަމަށެވެ.
މަޖިލީހަށް ހުށައެޅޭ ބިލުތައް އަވަސް އަރުވާލައިގެން ކުރިއަށް ގެންދާކަމަށް އިޝާރާތްކުރައްވާ މެމްބަރު ވިދާޅުވީ، މިއީވެސް ސަރުކާރުން ބޭނުންވެގެން އަވަސް އަރުވާލައިގެން ދައުރު ނިންމުމުގެ ކުރިން ނިންމަން ހިފާލި ބިލެއްކަމަށެވެ. ނަމަވެސް އެގޮތަށް ނިންމުމުން ޖެހިގެން އަންނަ ހަފްތާގައި ބިލަށް އިސްލާހުތައް ގެނައުމަށްޓަކައި އަނެއްކާވެސް މަޖިލީހަށް ހުށައެޅިގެންދާކަމަށެވެ.
ނާޒިލް ވިދާޅުވީ، މިގޮތަށް މި ދައުރުގައިވެސް އެކި ކޮމިޓީތަކުގައި މުހިންމު ބިލުތަކެއް ހުރިކަމަށާއި މަޖިލީހުގެ ޖަލްސާ ފަށަމުން ދައުރު ދަންމާލާ ވާހަކަތައް ދެކެވިފައިވާއިރު އެކަމުގެ ބޭނުމަކީވެސް މިގޮތަށް އަވަސް އަރުވާލައިގެން ބިލުތަކެއް ފާސްކުރުންކަމަށް ހިއްސާކުރެއްވިއެވެ. ނަމަވެސް މިހާރު ގެނައުމަށް ކަނޑައެޅި އިސްލާހު ފަދައިން އެހެނިހެން ބިލުތައްވެސް އިސްލާހު ކުރަންޖެހެނީ ކުއްލިއަކަށް ފާސްކުރުމުގެ ސަބަބުންކަމަށް މައުލޫމާތު ދެއްވިއެވެ.
މެމްބަރު ވިދާޅުވީ، ދައުރެއް ދަންމާލައިގެން ބޮޑެތި ގާނޫނުތައް އަވަސް އަރުވާލައިގެން ނިންމާލުމަކީ އެ މަސައްކަތްތައް އެންމެ ފުރިހަމައަށް ކުރިއަށް ގެންދެވޭނެ ގޮތް ނޫންކަމަށާއި މީގެ ކުރިން އަދި މި ދައުރުގައިވެސް ގިނަ ދުވަސްތަކެއްގެ މަތިން ބޮޑެތި މަސައްކަތްތްތަކެއް ކޮށްގެން ރަނގަޅު ގާނޫނުތަކެއް ފާސްކުރެވިފައިވާކަމަށެވެ. ނާޒިލް ވިދާޅުވީ، މިވަގުތު ކޮމިޓީގައި އޮތް ގެދޮރުވެރިޔާ ގާނޫނުވެސް އަވަސް އަރުވާލައިގެން ނިންމުން ބޭނުންތެރި ނޫންކަމަށެވެ. އަދި ފުރިހަމަ ނަތިޖާއެއް ނެރެވޭނީ ސްޓޭކް ހޯލްޑަރުންނާއި މަޝްވަރާކޮށްގެންނާއި ސަރުކާރުން ބޭނުންވާ ކަންކަމަށްވެސް ރިއާޔަތްކޮށްގެން މަސައްކަތްތައް ކުރިއަށް ގެންދިއުމުންކަމަށް ހިއްސާކުރެއްވިއެވެ.
