އީޕީއޭގެ ބާރުތައް އެންވައިރަމެންޓު މިނިސްޓްރީއަށް ނެގުމަކީ ތިމާވެށި ރައްކައުތެރިކުރުމުގެ ދާއިރާގައި ފަހަތަށް އެޅޭ ފިޔަވަޅެއްކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެއެވެ.
އީއައިއޭ ގަވައިދަށާއި އީޕީއޭގެ ނަމަށް ބަދަލުތައް ގެނެސްފައިވުމާއިއެކު ސޯޝަލްމީޑިއާ މެދުވެރިކޮށް އާންމުކުރެއްވި މެސެޖެއްގައި ފައްޔާޒް ވިދާޅުވީ، ސަރުކާރުން އީޕީއޭ އުވާލުމަށް ނިންމައި އެންވައިރަމެންޓު މިނިސްޓްރީގެ ދަށަށް އެތަނުގެ ބާރުތައް ގެނެސްފައިވުމަކީ ތިމާވެށި ރައްކައުތެރިކުރުމުގެ ދާއިރާގައި ފަހަތަށް އެޅުނު ފިޔަވަޅެއްކަމަށެވެ. އޭނާ ވިދާޅުވީ، އެކަމުގެ ސަބަބުން ތަރައްގީ ގެނައުމާއި ވެށި ހިމާޔަތްކުރުމުގެ ދާއިރާ ދެމެދު ހަމަތަކެއް ގާއިމުކުރުމުގެ މަސައްކަތްތައްވެސް މިސްރާބުން ނެއްޓިގެންދާކަމަށެވެ.
އޭނާ ވިދާޅުވީ، އިދާރީ މަސައްކަތްތައް ހަރުދަނާކުރުމަށް އަބަދުވެސް ޖާގަ އޮންނައިރު އީޕީއޭގެ މިނިވަންކަން ނަގާލުމަކީ ކަންބޮޑުވާ މައްސަލައެއްކަމަށެވެ. އަދި މިއީ ސަރުުކާރުގެ ފަރާތުން ފެންނަމުންދާ ޗެކް އެންޑް ބެލެންސްގެ ނިޒާމުގެ ބާރު ކަނޑުވާލުމުގެ އުސޫލާއި ދިމާވާ އަމަލެއްކަމަށާއި ކުރަމުންދަނީ ރައީސްގެ އަތް މައްޗަށް ދައުލަތުގެ ބާރުތައް އެއްކުރުމުގެ މަސައްކަތްތައްކަމަށް އިޝާރާތްކުރެެއްވިއެވެ.
މިކަމުން ތިމާވެއްޓަށް ގެއްލުންތަކެއް ލިބިގެންދިއުމުގެ ފުރުސަތު އޮތްކަން ސާފުއިރު ކުއްލި ގޮތެއްގައި އުސޫލުތަކާއި ގަވައިދުތަކަށް ބޮޑެތި ބަދަލުތަކެއް ގެނައުމުގެ ސަބަބުން އިންވެސްޓަރުންގެ އިތުބާރު ނެތިގެންދިއުމުގެ ފުރުސަތުވެސް އޮތްކަމަށް ހިއްސާކުރެއްވިއެވެ. އެހެންކަމުން މިހާރުވެސް ދަތިތައް ކުރިމަތިވެފައިވާ ރާއްޖޭގެ އިގްތިސާދު ހީނަރުވެގެންދާ ދުވެލި އަވަސްވުމުގެ މައްސަލަ ދިމާވުންވެސް އެކަށީގެންވާކަމަށް ފާހަގަކުރެއްވިއެވެ.
