ގައުމުގެ ހާލަތު މިހާރު އޮތީ ނުރައްކާތެރި ހިސާބެއްގައިކަމަށް އެމްޑީޕީގެ ޗެއާޕާސަން އަދި ކުރީގެ އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވިއެވެ.
އެކްސްގައި ކުރެއްވި ޕޯސްޓެއްގައި ފައްޔާޒް ވިދާޅުވީ މިއަދު މިދެކޭ ގާނޫނުއަސާސީއާއި، މި ހައްގުތައް ލިބިގެން ދިޔައީ މީގެ 21 އަހަރު ކުރިން ކަމަށެވެ. އަދި އެ ހައްގުތައް ލިބިގެންދިޔައީ ދިވެހިންގެ ތެރެއިން ގިނަ ބަޔަކު ތޮށިގަނޑު ފަޅާލާފައި ނުކުމެ ކުރި އިހުތިޖާޖާއި އަޑުއުފުލުންތަކުގެ ނަތީޖާއެއްގެ ގޮތުން ކަމަށްވެސް ފައްޔާޒް ވިދާޅުވިއެވެ.
އޮގަސްޓް 12، އަދި 13 ވަނަ ދުވަހުގެ ހަނދާން އާ ކުރަނީ، އެ ދުވަހުގެ ނުރައްކާތެރި ހާލަތާ ކުރިމަތިލައި، އެ ހާލަތުގެ މައްޗަށް ކުޅިފަސް ހޯދުމުގައި ބައިވެރިވެވަޑައިގެންނެވި ހުރިހައި ބޭފުޅުންނަށް ހައްގު ޝުކުރާއި ތައުރީފު އަރިސްކޮށް އެ ބޭފުޅުންގެ މަތިން ހަނދާންކުރަމުން ކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ އޭގެ 21 އަހަރު ފަހުން އަނެއްކާވެސް، ގައުމުގެ މިސްރާބު ހުރީ އޭރުގެ ހާލަތަށް ކަމަށެވެ. އެ ދުވަހުގެ ހަރަކާތުން ހިތްވަރު ލިބިގަނެ، މިއަދާއި މާދަމާ ސަލާމަތްކުރުމަށް، މިއަދުގެ ހާލަތަށް އެކަށޭނޭ، އަދި ނަތީޖާ ނެރެވޭނޭ އުސޫލަކުން މަސައްކަތް ކުރަންޖެހޭ ކަމަށް ފައްޔާޒް ވިދާޅުވިއެވެ.
ގާނޫނުއަސާސީ އަށް 18 އަހަރު ފުރިގެން ދިޔައިރު އެކަމާއި ގުޅޭ ގޮތުން ފައްޔާޒް ވަނީ ޝުއޫރުތަކެއް ފާޅުކޮށްފައެވެ. ގާނޫނުއަސާސީން ހޯދައިދިން ހައްގުތައް ކަށަވަރު ނުވާކަމަށް އެމްޑީޕީން އަންނަނީ ބުނަމުންނެވެ.
