ރައްޔިތުން ބޭނުންވާ ގޮތަށް މައްސަލަތައް ހައްލުކޮށް، މަޝްރޫއުތައް ހިންގައި އެ އުފަލުގައި ރައްޔިތުންނާއި އެކު އަބަދުވެސް ބައިވެރިވެވަޑައިގަންނަވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ބ. އަތޮޅުގެ ރަށްތަކަށް ކުރަައްވަމުން ގެންދަވާ ދަތުރުފުޅުގެ ތެރެއިން މިރޭގެ ބޮޑު ޖަލްސާ ކުރިޔަށް ގެންގޮސްފައި ވަނީ އެ އަތޮޅު ފުޅަދޫގަ އެވެ.
ރިޔާސީ އިންތިހާބުގެ ކެމްޕެއިނުގެ ތެރޭގައި ވެސް މި ރަށަށް ވަޑައިގެން ރައީސް ވަނީ، ރަށަށް ދިމާވެފައިވާ އެކި ދަތިތައް ހައްލު ކުރުމަށް ރައްޔިތުންނަށް ވައުދުވެވަޑައިގެނަފަ އެވެ. އެކަންކަން ފާހަގަކުރައްވައި ރައީސް ވިދާޅުވީ ކޮންމެ ރަށަކަށް ވެސް އެންމެ ބޮޑަށް ބޭނުންވެފައި ވަނީ އަސާސީ ހިދުމަތް ގާއިމުވެފައި އޮތުން ކަމަށެވެ. އޭގެ ތެރޭގައި ސިއްހީ ދާއިރާ ކުރިއެރުވުމަށް ކުރަން ޖެހޭ މަސައްކަތްތަކާއި، ތައުލީމީ ގޮތުން ފުރުސަތުތައް ހޯދައިދީ ވަސީލަތްތައް އިތުރު ކުރުމާއި ގުޅޭ ބައެއް ތަފްސީލުތައް ރައީސް ދެއްވި އެވެ.
ފުޅަދޫ ހިމެނޭ ގޮތަށް ބ. އަތޮޅަކީ ކުޅިވަރުގެ އެކި ދާއިރާތަކުން ބޮޑެތި ކުރިއެރުންތައް ހޯދާފައިވާ ސަރަހައްދަކަށް ވާތީ ފުރުސަތުތައް ހޯދައިދިނުމަށް ސަރުކާރުން އެކި މަސައްކަތްތައް ކުރައްވަމުން ގެންދަވާކަމަށް ރައީސް ވިދާޅުވި އެވެ. އެގޮތުން ރަށުގެ ފުޓަސަލް ދަނޑު ރަނގަޅު ފެންވަރެއްގައި ގާއިމު ކުރަން ޖެހޭއިރު، ކައުންސިލް މެދުވެރިކޮށް ބިން ހަމަޖެހިގެން ދިއުމާއި އެކު މަސައްކަތުގެ އަމަލީ ބައި ފެށިގެންދާނެކަމަށށް ރައީސް ވިދާޅުވި އެވެ.
ފުޅަދޫއަކީ ޓޫރިޒަމްގެ ދާއިރާ ކުރިއެރުވުމަށް ސަރުކާރުން ގިނަ މަސައްކަތްތައް ކުރަމުން ގެންދާއިރު ރަށުގެ ރައްޔިތުންގެ ހުރި ބައެއް ކަންބޮޑުވުންތަކަށް އިޝާރާތް ކުރައްވައި ރައީސް ވިދާޅުވީ އިންނަފުށި މެދުވެރިކޮށް ކައުންސިލާއި ރައްޔިތުންނަށް ރަނގަޅު އާމްދަނީއެއް ލިބޭނެ ގޮތް ވަރަށް އަވަހަށް މަގުފަހި ކުރެވިގެން ދާނެކަމަށެވެ.
އަޅުގަނޑުމެންގެ ހުރިހާވެސް ޝައުގެއް ހުރީ ރައްޔިތުން އެދޭ ގޮތަށް ހުރިހާކަމެއް ވެސް ކުރިޔަށް ގެންގޮސް ދިނުން.. އަޅުގަނޑުމެން މި ދެންނެވި ގޮތަށް ހަމަ ފެނާއި ނަރުދަމާގެ މަޝްރޫއުތައް ކުރިޔަށް ގެންދާނަން.. އެހެންވީމަ އަޅުގަނޑު މިދެންނެވި ކަންކަން ބާރު ސްޕީޑުގައި ހަމަ ކުރިޔަށް ގެންގޮސްދޭނަން..
ރައީސް ވިދާޅުވީ ކޮންމެ ރަށަކަށް ވެސް ދިމާވެފައިވާ އެންމެ ބޮޑެތި މައްސަލަތަކުގެ ތެރޭގައި ރަނގަޅު ފެނާއި ނަރުދަމާގެ ނިޒާމެއް ނެތުން ހިމެނޭ ކަމަށެވެ. އެހެންކަމުން އެ ހިދުމަތް ރަނގަޅު ގޮތުގައި ތަންފީޒު ނުކުރެވޭ ރަށްތަކުގައި، ފެނާއި ނަރުދަމާގެ މަޝްރޫއުތައް ސަރުކާރުން ބާރު ސްޕީޑުގައި ކުރިޔަށް ގެންދަވާނެކަމަށް ރައީސް ވިދާޅުވި އެވެ.
ރައީސް މުއިއްޒު ވިދާޅުވި ގޮތުގައި އެމަނިކުފާނުގެ މި ދަތުރުފުޅުތަކުގެ ބޭނުމަކީ ރައްޔިތުންނާއި ވީހާވެސް ގާތުން މަސައްކަތް ކުރުމެވެ. އެހެންކަމުން ރަށުގެ ރައްޔިތުންނާއި ކައުންސިލްތަކާއި ބައްދަލުކޮށް އެކަންކަން ވަގުތުން ހައްލު ކުރުމަށް އަޅަން ޖެހޭ ފިޔަވަޅު އަޅާކަމަށް ވިދާޅުވި އެވެ. އަދި ވިދާޅުވީ ވީހާވެސް ގިނައިން ރައްޔިތުންގެ ގާތަށް ދަތުރު ކުރުމަށް ބޭނުންވާކަމަށެވެ.
މިފަދަ ދެވަނަ ދަތުރެއް ގުޅެން ބޭނުން ވަނީ ރައީސް ވިދާޅުވި ގޮތުގައި ރަށުގައި ކުރިޔަށް ގެންދާ އެ ޕްރޮޖެކްޓެއް ނިމި، މަޝްރޫއު އިފްތިތާހު ކުރުމުގެ ރަސްމިއްޔާތަށެވެ.
