ރާއްޖެއަށް ވަގަށް އެތެރެ ކުރަން އުޅެނިކޮށް، މިދިޔަ އޭޕްރިލް މަހު ހިފެހެއްޓި 13 މިލިއަނަށް ވުރެ ގިނަ ސިނގިރޭޓު އެމްޕީއެލް ބަނދަރުން ގެއްލުނު މައްސަލައިގެ ތަހުގީގަށް، މިހާތަނަށް 19 މީހަކު ފުރުން މަނާކޮށް، އެމީހުންގެ ޕާސްޕޯޓު ހިފަހައްޓާފައިވާކަމަށް ފުލުހުން ބުނެފިއެވެ.
40 ފޫޓުގެ ދެ ކޮންޓެއިނަރެއްގައި ހުރި 1،360 ކޭސް ސިނގިރޭޓު ގެއްލިފައިވާކަމުގެ މައުލޫމާތު މީޑިއާތަކަށް ފެންމަތިވީ އޮކްޓޯބަރު މަހުގެ ކުރީކޮޅުގައެވެ.
މި މައްސަލައާ ގުޅިގެން ފުލުހުން ވަނީ މަޝްހޫރު ދެ ވިޔަފާރިވެރިއަކު ހިމެނޭ ގޮތަށް ޖުމްލަ ނުވަ މީހަކު ހައްޔަރުކޮށްފައެވެ. އެގޮތުން، މި އަމަލު ރާވައި ފަންޑު ކުރިކަމުގެ ތުހުމަތު ކުރެވޭ އެޕޯލޯ ކުންފުނީގެ ވެރިޔާ މުހައްމަދު ވަހީދު (ދިގަލި) އާއި ލޮޓަސްގެ ވެރިޔާ އަހުމަދު އާރިފް (އާއްޓޭ) ހިމެނެއެވެ.
މީގެ އިތުރުން ކަސްޓަމްސްގެ އިސް މުވައްޒަފެއްކަމަށްވާ ޒިވާރު އިސްމާއިލް އާއި މިފްކޯގެ އިންޖިނިއަރިން އެންޑް ޕްރޮޖެކްޓްސް ޑިޕާޓުމެންޓުގެ ޖެނެރަލް މެނޭޖަރުގެ މަގާމުގައި ހުރި މުއާޒު އަލީ ވެސް ހައްޔަރުކޮށްފައިވެއެވެ.
ފުލުހުން ބުނި ގޮތުގައި، މި މައްސަލައިގައި ހައްޔަރުކުރި މީހުންގެ ތެރެއިން އާއްޓޭ، މުއާޒް، ޒިވާރު، އެމްޕީއެލްގެ މުވައްޒަފެއްކަމަށްވާ އަހުމަދު ފިރުޝާން، ދޯނީގެ ކެޕްޓަން އާދަމް ވަހީދު، ހަސަން އަބްދުއްރަހްމާން އަދި ދިގަލި ވެސް ވަނީ ޝަރީއަތް ނިމެންދެން ބަންދުކޮށްފައެވެ. މީގެއިތުރުން، ތަހުގީގަށް 19 މީހެއްގެ ޕާސްޕޯޓް ހިފަހައްޓައި ފުރުން މަނާކޮށްފައިވާއިރު، މާލެ، ހުޅުމާލެ އަދި ތިލަފުށީގެ 21 ތަނަކާއި 5 އުޅަނދެއް ބަލާފާސްކޮށްފައިވާކަމަށް ފުލުހުން ހާމަކުރެއެވެ.
ފުލުހުންގެ ތަހުގީގުން ހޯދި ހޯދުންތަކަށް ބަލާއިރު، ސިނގިރޭޓް ހުރި ދެ ކޮންޓެއިނަރު ވަގަށް ނަގައިފައިވަނީ ވަރަށް ރޭވުންތެރިކަމާއެކުއެވެ.
އެގޮތުން، އެ ދެ ކޮންޓެއިނަރާއި އެއްގޮތަށް ދެ ކޮންޓެއިނަރު ތައްޔާރުކުރުމަށްފަހު، އެމްޕީއެލް ޓާމިނަލުގައި ހުރި ސިނގިރޭޓް ކޮންޓެއިނަރު ނެރެ، އޭގެ ބަދަލުގައި އެއާއި އެއްގޮތަށް ތައްޔާރުކުރި ކޮންޓެއިނަރު ދޯންޏެއްގައި ޓާމިނަލަށް ގެންގޮސް ބަހައްޓާފައިވެއެވެ. އަދި، މި ވައްކަމަށް ބޭނުންކުރި ދޯނީގެ ނަމާއި ރަޖިސްޓްރީ ނަންބަރުވެސް ބަދަލުކޮށްފައިވާކަން ތަހުގީގަށް ފާހަގަކުރެވިފައިވާކަމަށް ފުލުހުން ބުނެއެވެ.
ސިނގިރޭޓް ހުރި ދެ ކޮންޓެއިނަރު ތިލަފުށްޓަށް ގެންގޮސް ހަލާކުކޮށްލާފައިވާކަން ވެސް ފުލުހުންގެ ތަހުގީގުން ހޯދިފައިވެއެވެ. އެ ކޮންޓެއިނަރުތަކުގެ ބައިތައް، ފުލުހުންގެ ބަލާފާސްކުރުމުގެ ތެރެއިން، ތިލަފުށީގެ ސައިޓެއްގައި ހުއްޓައި ވަނީ ހޯދައިފައެވެ. މި މައްސަލައިގެ ތަހުގީގު އިތުރަށް ކުރިއަށްދާކަމަށް ފުލުހުން ވަނީ ހާމަކޮށްފައެވެ.
