ގެދޮރުވެރިޔާ މަޝްރޫއުގެ ދަށުން 4،000 ފްލެޓުތަކުގެ ހައްގުވެރިންގެ ތެރެއިން ގިނަ ބަޔަކަށް ފްލެޓް ހަވާލުކުރުން ލަސްކުރަމުންދާކަމަށް ބުނެ ރައްޔިތުންގެ މަޖިލީހަށް ހުށައެޅި ގަރާރު ބޭރުކޮށްލައިފިއެވެ.
ގަރާރާއި ދެކޮޅަށް 40 މެންބަރުން ވޯޓުދެއްވިއިރު، ގަރާރު ބަލައިގަނެ ކޮމިޓީ މަރުހަލާގައި ދިރާސާ ކުރަން ޖެހޭކަމަށް ވޯޓު ދެއްވީ އެންމެ 11 މެންބަރުންނެވެ.
މިއީ ކެންދޫ ދާއިރާގެ މެންބަރު މައުރޫފް ޒާކިރު ހުށައެޅުއްވި ގަރާރެކެވެ.
މި ގަރާރުގައި ވަނީ ކުރީގެ ރައީސް އިބްރާހީމް މުހައްމަދު ސޯލިހުގެ ވެރިކަމުގައި ރައްޔިތުންނަށް ބޯހިޔާވަހިކަން ކަށަވަރުކޮށްދިނުމަށް، ދޭން ނިންމި ފްލެޓުތަކާއި ގޯތިތައް އޭގެ ހައްގުވެެރިންނަށް ހަވާލު ކުރުން އިންތިހާއަށް ލަސްވެފައިވާކަމަށެވެ. އެގޮތުން ދި ގިރާވަރުފަޅާއި ގުޅީފަޅު އަދި ހުޅުމާލެ ފޭސް ތިނެެއްގެ އިތުރުން އުތުރުތިލަފަޅު ހިއްކުމުގެ ބަދަލުގައި ފުށިދިއްގަރު ފަޅަށް އިސްކަން ދީގެން އެ މަސައްކަތް ކުރަމުން ދިޔުމުގެ ސަބަބުން އެތައް ބަޔަކު ބޯހިޔާވަހިކަމުގެ ހައްގުން މަހުރޫމްވަމުންދާ ކަމަށެވެ.
އީސުލްޖުމްހޫރިއްޔާ މުހައްމަދު މުއިއްޒު ވެރިކަމަށް ވަޑައިގަތުމުގެ ކުރިން މި މަޝްރޫއުތަކާއި ގުޅިގެން ދެއްކެވި ވާހަކަވެސް ބަދަލުވެފައިވާކަމަށް ފާހަގަކުައްވާ ގަރާރުގައި ވަނީ، އެގޮތުން ކުރީ ސަރުކާރުން އެއްވެސް ރައްޔިތަކަށް ދީފައިވާ ފްލެޓެއް ގޯއްޗެއް އެ ދިން ތަނަކު ދެއްވާނެކަމަށް ވިދާޅުވިކަމަށެވެ. ނަމަވެސް އަމަލު ކުރައްވަމުން ގެންދަވަނީ ވައުދުވެވަޑައިގެންނެވި ގޮތަށް ނޫންކަމަށް ގަރާރުގައިވެއެވެ.
އެގޮތުން މިދިޔަ ސަރުކާރުން ކަނޑައެޅި 4000 މީހުންގެ ތެރެއިން 585 މީހަކަށް ފްލެޓު ނުލިބޭނެކަން މި ސަރުކާރުން އަންގާފައިވާ ކަމަށް އެ ގަރާރުގައި ބުނެފައިވެއެވެ. އަދި ސަރުކާރާއެކު އެއްބަސްވުމެއް ހަދައި ފްލެޓު ކަނޑައަޅައި ލިޔުން ދީފައިވާ މީހުންގެ އަތުން ޝަރުއީ ކޯޓެއް މެދުވެރިކޮށް މެނުއީ ފްލެޓު އަތުނުލެވޭނެކަމަށްވެސްވެއެވެ.
މީގެ އިތުރުން ގަރާރުގައި ވަނީ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން ޝަރުތު ހަމަވި 13763 މީހުންގެ ތެރެއިން ފުރަތަމަ ފްލެޓު ލިބުނު މީހުން ނަގާފައި ދެން ތިބި 9763 މީހުންނަށް ފްލެޓު ދިނުމަށްޓަކައި އިންޑިއާގެ އެލްއޯސީ މެދެވެރިކޮށް ފައިސާ ހަމަޖައްސައިގެން އިންޑިއާގެ ކޭޕީއައިއެލް (އެންބީސީސީ) އާ އަޅަން ހަވާލުކުރި 6000 ފްލެޓާއި އެޕޯލޯ ކުންފުންޏާ އަޅަން ހަވާލުކުރި 1000 ފްލެޓުގެ މަސައްކަތް ކުރިއަށް ނުދާކަމަށެވެ.
މިދިޔަ ސަރުކާރުން އިއުލާނުކުރި ބިންވެރިޔާ އަދި ގެދޮރުވެރިޔާގެ ދެވަނަ ސްކީމުގައި ފްލެޓަށް އެދި ހުށަހެޅި 21،347 މީހުންނާއި ގޯއްޗަށް އެދި ހުށަހެޅި 19،347 މީހުންގެ ނަންތަކާއެކު ގެޒެޓު ކޮށްފައިވީ ނަމަވެސް އެ ފޯމުތައް އިވެލުއޭޓު ކުރުމުގެ މަސައްކަތް މި ސަރުކާރުން ކުރަމުން ނުދާކަން ވެސް އެ ގަރާރުގައި ފާހަގަކޮށްފައިވެ އެވެ.
މައުރޫފް ވިދާޅުވީ ބޯހިޔާވަހިކަމުގެ މައްސަލައަކީ މުޖުތަމައުގެ ތެރޭގައި ހުރި ގިނަ މައްސަލަތަކެއްގެ ފެށުންކަމަށެވެ. ބޯހިޔާވަހިކަމަށް ހަރަދު ކުރަން ނުޖެހޭ އާއިލާއެއް މާލޭގައި ނެތްކަމަށް ވިދާޅުވިއެވެ. މިކަންކަމުގެ ސަބަބުން ރާއްޖޭގައި ރައްޔިތުންނަށް މިނިވަންކަމާއިއެކު ހިތްހަމަޖެހުން ހޯދެން ނެތްކަމަށް ފާހަގަކޮށް މައުރޫފް ވިދާޅުވީ، މި މައްސަލަތަކަށް ހައްލު ހޯދުމަށް މިދިޔަ ސަރުކާރުން ގިނަ މަސައްކަތްތަކެއް ފަށާފައިވާކަމަށެވެ. ބަހާލެވިގެން ވަށާ ޖެހޭ ސިޔާސަތެއްގެ ދަށުން ގިނަ މަސައްކަތްތަކެއް ކުރެއްވުމުގެ ސިޔާސަތުތަކެއް ކަނޑައެޅިކަމަށްވެސް އޭނާ ވިދާޅުވިއެވެ.
އެގޮތުން ހުޅުވާލި ފުރުސަތުގައި އެތައް ހާސް ރައްޔިތުންނެއް ބޯހިޔާވަހިކަމަށް ކުރިމަތިލީކަމަށާއި، އަދި ބޯހިޔާވަހިކަން ކަށަވަރުކޮށްދިންކަމަށްވެސް މައުރޫފް ވިދާޅުވިއެވެ. އެހެން ނަމަވެސް މި ސަރުކާރުން ވެރިކަމަށް އައިސް މިކަންކަން ގަނޑުބަނޑު ކޮށްފައިވާކަމަށް ވިދާޅުވިއެވެ. ރައީސުލްޖުމްހުރިއްޔާ ޑރ މުހައްމަދު މުއިއްޒު ވަނީ އެމްޑީޕީގެ ސަރުކާރުން ހިންގި ބޯހިޔާވަހިކަމުގެ އެއްވެސް މަޝްރޫއަކަށް ބަދަލު ނުގެންނާނެކަމަށް ވިދާޅުވެފައިކަމަށާއި، ނަމަވެސް ކަން ހިނގައިދިޔައީ މިހެން ނޫންކަމަށް މައުރޫފް ވިދާޅުވިއެވެ.
މީގެ ކުރިންވެސް މައުރޫފް ވަނީ މިކަމާއި ގުޅިގެން ވާހަކަދައްކަވާފައެވެ. އެގޮތުން މައުރޫފް ވަނީ ރައްޔިތުންގެ މަޖިލީހަށް އެމްޑީޕީގެ މެންބަރުން ކުއްލި މައްސަލަތައް ހުށައެޅުމުން ކޮންމެސް ހުއްޖަތެއް ދެއްކުމަށްފަހު އެ މައްސަލަތައް ބޭރު ކުރާކަމުގެ ކަންބޮޑުވުން ފާޅުކޮށްފައެވެ. 4،000 ފްލެޓުގެ މައްސަލައިގައި ހުށައެޅި ކުއްލި މައްސަލައަށްވެސް އަމަލުކުރީ މިހެންކަމަށް މައުރޫފް ވިދާޅުވިއެވެ.
މައުރޫފް ވިދާޅުވީ ވެފައިވާ އެއްބަސްވުމެއް އުވާލެވޭނީ ކޯޓަށް ގޮސްގެން އެކަނިކަމަށާއި، ނަމަވެސް މި ސަރުކާރުން އެހެން ހުރި އެތައް ފްލެޓު އެއްބަސްވުތަކެއް ގާނޫނާއި ހިލާފަށް ބާތިލްކޮށްފައިވާކަމަށެވެ. މިކަމުގައި ސަރުކާރާއި ދެކޮޅަށް އިހުތިޖާޖު ކުރުމަށް މައުރޫފް ގޮވާލެއްވިއެވެ.
މި ސަރުކާރުން ފްލެޓުތަކުން ނަގާ ކުލިވެސް ބޮޑު ކޮށްފައިވާކަމަށް މައުރޫފް ވިދާޅުވިއެވެ. އަދި މައުރޫފް ވިދާޅުވީ ފްލެޓުތައް ލިބުން ފަރާތްތަކުން ފްލެޓަށް ފައިސާ ދައްކަން ވާނީ ކުލި ދެއްކުމަށް އެއްބަސްވެފައިވާ އަދަދުންކަމަށެވެ. މި ސަރުކާރުން ރައްޔިތުންގެ ބޯހިޔާވަހިކަމަށްވީ ހުރިހާ ވައުދެއް ވަނީ ބޮލާލާ ޖަހާފައިކަމަށާއި، ވަމުންދަނީވެސް ދޮގު ވައުދުތައްކަމަށް މައުރޫފް ވިދާޅުވިއެވެ.
