މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މަސައްކަތްތައް ޑިޖިޓަލައިޒް ކުރުމަކީ ކުންފުންޏަށް ޒަރޫރީ ކަމެއް ކަމަށް އެމްޑީ އަދި ސީއީއޯ އިބްރާހީމް ޝަރީފް ވިދާޅުވެއްޖެއެވެ.
ޝަރީފް މިހެން ވިދާޅުވީ، އެމްއޭސީއެލްގެ މަސައްކަތްތައް ޑިޖިޓަލައިޒްކުރުމުގެ ގޮތުން އިފްތިތާހުކުރި ’ސިނެކްސް ޕްރޮގްރާމް‘ ލޯންޗުކުރުމުގެ ރަސްމިއްޔާތުގައި ވާހަކަ ދައްކަވަމުންނެވެ.
ހުޅުލެ އައިލެންޑް ހޮޓެލްގައި ބޭއްވި މި ރަސްމިއްޔާތުގައި ޝަރީފް ވިދާޅުވީ، އެމްއޭސީއެލްގެ މަސައްކަތްތަކަކީ ވަކި ވަގުތަކަށް ނިންމަން ޖެހޭ މަސައްކަތްތަކަށް ވާތީ، ޑިޖިޓަލައިޒޭޝަނަކީ ވަރަށް ބޭނުންވެފައިވާ ކަމެއް ކަމަށެވެ. އުންމީދަކީ ކުރާ މަސައްކަތްތައް އެއްކޮށްލައިގެން ޑިޖިޓަލައިޒްކޮށް، އެކަށީގެންވާ ގޮތަށް ގުޅިގެން މަސައްކަތް ކުރެވޭނެ ނިޒާމެއް ގާއިމުކުރުން ކަމަށް ޝަރީފް ފާހަގަކުރެއްވިއެވެ. މިގޮތުން، ރައީސް ޑރ. މުއިއްޒު އިފްތިތާހުކުރެއްވި ’މޯލްޑިވްސް 2.0‘ ގެ ވިސްނުމަށް ޝަރީފް ޝުކުރު އަދާކުރެއްވިއެވެ.
އެމްއޭސީއެލްގެ ބޮޑުކަން ފާހަގަކުރައްވައި ޝަރީފް ވިދާޅުވީ، ކުންފުނީގައި ގާތްގަނޑަކަށް 6000 މީހުން މަސައްކަތް ކުރާ ކަމަށާއި، މިއީ ރީޖަންގެ ހުރިހާ ތަނެއް ނުލައި ހުރި އަދަދު ކަމަށެވެ. އެހެންކަމުން، ކުންފުންޏަށް ވަރަށް ބޮޑު ޑިޖިޓަލް ނީޑެއް އެބައޮތް ކަމަށް ޝަރީފް ވިދާޅުވިއެވެ.
”އަޅުގަނޑުމެން ކުރާ މަސައްކަތް ތަކަކީ ވަރަށް ޓައިމަށް ކުރަންޖެހޭ މަސައްކަތްތަކެއް،“ ޝަރީފް ވިދާޅުވިއެވެ.
ސިނެކްސް ޕްރޮގްރާމްގެ މައިގަނޑު މަގުސަދުތަކުގެ ތެރޭގައި ޑިޖިޓަލް ސްކިލިންގ، ރީ-ސްކިލިންގ، އަދި ކުދި އަދި މެދުފަންތީގެ ވިޔަފާރިތަކަށް (އެސްއެމްއީސް) ބާރުވެރިކަން ދިނުމާއި އެހީތެރިވުން ހިމެނޭ ކަމަށް ޝަރީފް ވިދާޅުވިއެވެ.
މާލީ ގޮތުން މަސައްކަތް ޑިޖިޓަލައިޒް ކުރުމުގެ ގާބިލްކަން އެމްއޭސީއެލްއަށް ހުރި ނަމަވެސް، ރައީސްގެ މޯލްޑިވްސް 2.0 ލޯންޗްކުރެއްވުމާއެކު، ދިވެހިރާއްޖޭގެ ޑިޖިޓަލް ދާއިރާގައި މަސައްކަތްކުރާ އެސްއެމްއީތަކާ ގުޅިގެން މަސައްކަތް ކުރިއަށް ގެންދިއުމަށް ކުންފުނިން ބޭނުންވީ ކަމަށް ޝަރީފް ވިދާޅުވިއެވެ.
މިފަދަ ވިޔަފާރިތަކާއެކު ދިގު މުއްދަތަށް މަސައްކަތްކުރުމުގެ ފުރުސަތު ލިބުމަކީ އުފާކުރައްވާ ކަމެއް ކަމަށް ޝަރީފް ވިދާޅުވިއެވެ. މިގޮތުން، އެސްއެމްއީތަކުގެ ގާބިލްކަން އިތުރުކޮށް، ގައުމީ ފެންވަރުގައި ޑިޖިޓަލް ތަރައްގީއަށް އެމްއޭސީއެލް އިން ދެމުންދާ އެއްބާރުލުން މި ޕްރޮގްރާމްގެ ދަށުން އިތުރުވެގެންދާނެ ކަމަށް ލަފާކުރެވެއެވެ.
