އެމްޑީޕީގެ ޗެއާޕާސަންގެ މަގާމު ހުސްވެފައިވާތީ، އެ މަގާމަށް ވަގުތީ ޗެއާޕާސަނަކު އައްޔަންކުރުމަށް ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި، ދިއްދޫ ދާއިރާގެ ކުރީގެ މެންބަރު އަބްދުﷲ ވަހީދުގެ ނަން ފާސްނުވެ، މަގާމަށް މީހަކު ހޮވުމެއްނެތި މަޖިލިސް ނިންމައިލައިފިއެވެ. ވަހީދުގެ ނަން ފާސްނުވީ އެންމެ ވޯޓަކުން ކަމަށް މައުލޫމާތު ލިބެއެވެ.
ވަގުތީ ޗެއާޕާސަންގެ މަގާމަށް ވަހީދު ކުރިމަތިލެއްވިއިރު، އައްޑޫ ހިތަދޫ އުތުރު ދާއިރާގެ ކުރީގެ މެމްބަރު މުހައްމަދު އަސްލަމް ވެސް ވަނީ މި މަގާމަށް ޝައުގުވެރިކަން ފާޅުކުރައްވާފައެވެ. ނަމަވެސް، ޕާޓީގެ ގަވާއިދުގައި ވަގުތީ ޗެއާޕާސަންކަމަށް ހޮވާ މީހަކީ ގައުމީ މަޖިލީހުގެ އިންތިހާބީ މެންބަރަކަށް ވާންޖެހޭތީ، ގައުމީ މަޖިލީހުގެ މެންބަރަކަށް ނުވާ އަސްލަމަށް މި ފުރުސަތު ވަނީ ގެއްލިފައެވެ.
ވަހީދު ވަގުތީ ޗެއާޕާސަންކަމަށް އައްޔަންކުރަން ފެނޭތޯ ގައުމީ މަޖިލީހުގެ މެންބަރުންގެ މެދުގައި ނެގި ވޯޓުގައި، ބައްދަލުވުމަށް ހާޒިރުވި 95 މެންބަރުންގެ ތެރެއިން ވަހީދަށް ލިބުނީ 47 ވޯޓެވެ. ވަހީދުގެ ނަން ފާސްވުމަށް 48 ވޯޓު ބޭނުންވިއިރު، އެންމެ ވޯޓެއް މަދުވެގެން އޭނާގެ ނަން ފާހެއްނުވިއެވެ. މި ނަތީޖާއާއެކު ވަހީދު އެ މަގާމަށް ހޮވިފައެއް ނުވެއެވެ.
ވަހީދުގެ ނަން ފާސްނުވުމާ ގުޅިގެން، އޭގެ ފަހުން އަސްލަމްގެ ނަން ހުށަހެޅުމަށް މަސައްކަތްކުރުމުން މަޖިލީހުގެ މަސްލަހަތު ވަރަށް ބޮޑަށް ގޯސްވެ، ހޫނުވެގެން ދިޔައެވެ. މައުލޫމާތު ލިބޭގޮތުގައި ގައުމީ މަޖިލިސް ވަރަށް ބޮޑަށް ހޫނުވެ، ނިޒާމު ގެއްލިފައިވާތީ، ޗެއާޕާސަނަކު ހޮވުމެއްނެތި ބައްދަލުވުން މެދުކަނޑާލަން ޖެހުނެވެ.
އެމްޑީޕީގެ ޗެއާޕާސަންގެ މަގާމު ހުސްވީ، ކުރިން އެ މަގާމުގައި ހުންނެވި ފައްޔާޒް އިސްމާއިލް، މިދިޔަ ނޮވެމްބަރު މަހުގެ 23 ވަނަ ދުވަހު އިސްތިއުފާ ދެއްވުމާ ގުޅިގެންނެވެ. ފައްޔާޒް އިސްތިއުފާ ދެއްވީ 2026 ވަނަ އަހަރު ބާއްވާ ޕާޓީގެ ރިޔާސީ ޕްރައިމެރީގައި ވާދަކުރެއްވުމަށެވެ. އޭނާ ވަނީ ރިޔާސީ ޓިކެޓަށް ޝައުގުވެރިކަން ހުރި ފަރާތްތަކަށް ކެމްޕެއިން ކުރުމުގައި ހަމަހަމަ ފުރުސަތު ދެއްވުމުގެ ގޮތުން މަގާމުން ވަކިވެވަޑައިގެންފައެވެ.
