ބޭ އޮފް ބެންގާލްގައި އުފެދުނު ތޫފާން ”ޑިޓުވާ“ މިހާރު ދަތުރުކުރަމުންދަނީ ރާއްޖެއާއި ދުރަށް ކަމަށް ގައުމީ މޫސުމާއި ބެހެ އިދާރާ (މެޓް) އިން ބުނެފިއެވެ. ރާއްޖޭގެ ރައްޔިތުންގެ ކަންބޮޑުވުން ބޮޑުވެފައިވާ މި ތޫފާނުގެ ނުރައްކާ މިހާރު ރާއްޖެއަށް ކުޑަވެފައިވާ ކަމަށް މެޓުން ވަނީ ހާމަކޮށްފައެވެ.
މެޓުން ދެއްވި އެންމެ ފަހުގެ މައުލޫމާތުގައިވާ ގޮތުން، ތޫފާން ”ޑިޓުވާ“ މިހާރު ހުރީ ހއ. ކެލާގެ އިރުއުތުރުން ގާތްގަނޑަކަށް 876 ކިލޯމީޓަރު ދުރުން، ސްރީލަންކާގެ އުތުރު އައްސޭރިފަށުގައެވެ. މި ތޫފާން ދަތުރުކުރަމުންދަނީ އުތުރުހުޅަނގުއުތުރަށް، އިންޑިއާގެ އިތުރު ޓަމިލްނާޑޫ، ޕޫޑޫޗެރޫ އަދި އަންދްރަ ޕްރަދޭޝްގެ ދެކުނު އައްސޭރި ފަށާއި ދިމާއަށް ކަމަށް މެޓުން ބުނެއެވެ. މިއީ ރާއްޖެއާއި ދުރަށް ދަތުރުކުރާ މިސްރާބެކެވެ.
މެޓުން ބުނެފައިވާ ގޮތުގައި، މި ތޫފާނާއި ގުޅިގެން ހުދު ސަމާލު ނެރުވުނީ މެޓު އޮފީހުގެ އެލާޓް ދަރަޖަ ކުރެވިފައިވާ ސަރަހައްދަށް ތޫފާން ވަނުމުންނެވެ. ތޫފާން ރާއްޖެއާއި ދުރަށް ދަތުރުކުރަމުންދިޔަ ނަމަވެސް، ކުރިއަށް އޮތް 24 ގަޑިއިރުވެސް ދެކުނާއި މެދުރާއްޖެތެރޭގެ އެކި ހިސާބަށް ވިއްސާރަކުރުމާއިއެކު ގުގުރާނެ ކަމަށް މެޓުން ލަފާކުރެއެވެ. މޫސުން ރަނގަޅުވާނެ ކަމަށް ލަފާކުރެވެނީ އަންނަ އަންގާރަ (ޑިސެމްބަރު 2) ފެށިގެންނެވެ.
ތޫފާން ”ޑިޓުވާ“ގެ ސަބަބުން އެންމެ ބޮޑު ގެއްލުމެއް ލިބިފައިވަނީ ސްރީލަންކާއަށެވެ. ލަންކާގެ އެކި ހިސާބުތަކަށް ބޯކޮށް ވާރޭވެހި ބޮޑެތި ގެއްލުންތަކެއް ލިބިފައިވާއިރު، ބޮޑު ސަރަހައްދެއްގައި ވަނީ ފެން ބޮޑުވެފައެވެ. ތޫފާނުގެ ސަބަބުން ސްރީލަންކާގައި ފެންބޮޑުވެ، ބިންގަނޑު ކަނޑައިގެން ދިއުމުގެ ހާދިސާތަކުގައި 56 މީހަކު މަރުވެ، އަދި 21 މީހަކު ވަނީ ގެއްލިފައެވެ. މިއީ މި ސަރަހައްދަށް ދިމާވި ވަރަށް ބޮޑު ޤުދުރަތީ ކާރިސާއެކެވެ.
