ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އާއި ޖަޕާނުގެ މަޝްހޫރު ކުންފުނި ހިޓާޗީއާ ދެމެދު އޮތް ގުޅުމުގެ ސަބަބުން ރާއްޖޭގެ ރައްޔިތުންގެ ތަރައްގީއަށް ވަރަށް ރަނގަޅު ބަދަލުތަކެއް އައިސްފައިވާ ކަމަށް އެސްޓީއޯގެ މެނޭޖިންގ ޑިރެކްޓަރ ޝިމާދު އިބްރާހީމް ވިދާޅުވެއްޖެއެވެ.
އެސްޓީއޯއާއި ހިޓާޗީގެ ޕާޓްނަރޝިޕަށް 25 އަހަރު ފުރުން ފާހަގަކުރުމަށް ބޭއްވި ހަފްލާގައި ވާހަކަ ދައްކަވަމުން ޝިމާދު ވިދާޅުވީ، މި ގުޅުމަކީ އިތުބާރާއި އިހުތިރާމުގެ މައްޗަށް ބިނާވެފައިވާ ވަރުގަދަ ގުޅުމެއް ކަމަށެވެ.
ޝިމާދު ފާހަގަކުރެއްވި ގޮތުގައި، ހިޓާޗީން ބާޒާރަށް އަލަށް ތައާރަފު ކުރާ އުފެއްދުންތައް މާ ގިނަ ދުވަހެއް ނުވެ އެސްޓީއޯ މެދުވެރިކޮށް ރާއްޖޭގެ ބާޒާރަށް ތައާރަފު ކުރެއެވެ. މީގެ އިތުރުން، ހިޓާޗީއާއެކު ކުރީގެ އެމްޑީންނާއި އިސްވެރިން ކުރެއްވި މަސައްކަތްތަކުގެ ސަބަބުން ކުންފުނީގެ މަސައްކަތް އިތުރު ހަރުފަތަކަށް ގެންދިއުމަށް ދިމާވި ގޮންޖެހުންތައް ފަހި ފުރުޞަތުތަކަށް ބަދަލުކުރެވިގެން ދިޔަކަން ޝިމާދު ފާހަގަކުރެއްވިއެވެ.
ހިޓާޗީއާއެކު މަސައްކަތް ކުރުމަށް ހިތްވަރުދިން ސަބަބުތަކާ ގުޅޭގޮތުން ކުރީގެ އެމްޑީންނާއި އިސްވެރިންނާއެކު މަޝްވަރާ ކުރެވުނު ކަމަށް ޝިމާދު ވިދާޅުވިއެވެ. އެބޭފުޅުންގެ ޖަވާބަކަށްވީ، ހިޓާޗީއަކީ ކުރިއަރާފައިވާ ފަންނުވެރިކަމާއި، އީޖާދީ ހިޔާލުތަކާއި، ދުނިޔޭގެ ގޮންޖެހުންތަކަށް ހައްލުތައް ހޯދުމުގެ ގާބިލުކަމާއި، ހަކަތައިގެ އަގުތައް ދަށްކުރުމާއި އަދި އިންޖިނިއަރިންގގެ ފުރިހަމަކަން ލިބިފައިވާ ކުންފުންޏެއް ކަމަށެވެ. އަދި ހިޓާޗީގެ ހުރިހާ ޕްރޮޑަކްޓަކީވެސް، ހަކަތައިގެ ލޭބަލްތައް ޖަހައިފައިވާ ތަކެއްޗަށް ވުމުން އެކަމަށް އުފާކުރައްވާ ކަމަށްވެސް ޝިމާދު ވިދާޅުވިއެވެ.
ޝިމާދު އިތުރަށް ވިދާޅުވީ، ހިޓާޗީއަކީ ސިނާއީ ތަޖުރިބާ އާއި އެ ތަޖުރިބާތައް ހިއްސާކުރާ ކުންފުންޏެއް ކަމަށެވެ. ހިޓާޗީ އާއި އެސްޓީއޯގެ ގުޅުމުގެ ސަބަބުން ރާއްޖޭގެ ރައްޔިތުންގެ ތަރައްގީއަށް ވަރަށް ބޮޑަށް އެހީތެރިވެފައިވާ ކަމަށް އޭނާ ވިދާޅުވިއެވެ.
ހިޓާޗީގެ ސަބަބުން ރާއްޖޭގެ މުޖުތަމައުއަށްވެސް އެދެވޭ ރަނގަޅު ބަދަލުތަކެއް އައިސްފައިވާކަން ފާހަގަކުރައްވައި، ”އުންދީމާއި، އިތުބާރާއި ކޮންފިޑެންސް ލިބިގެންދިޔަ“ ކަމަށް ޝިމާދު ވިދާޅުވިއެވެ. އެސްޓީއޯ އާއި ހިޓާޗީގެ ޕާޓްނަޝިޕްގެ ސަބަބުން ރާއްޖެއަށް އުންމީދީ ބަދަލުތަކެއް އަންނާނެ ކަމުގެ ޔަގީންކަން ޝިމާދު ވަނީ ދެއްވާފައެވެ.
