ޔޫތު ހެކަތޯންއިން ގައުމަށް ބޭނުންވަނީ ކޮންކަމެއްތޯ މަޝްވަރާކޮށް އެކަމަށް އީޖާދީ ގޮތެއްގައި ހައްލުތަކެއް ގެނެވޭނެ ޒުވާނުން ބިނާވެގެން ދާނެ ކަމަށް ޔޫތު މިނިސްޓަރ އިބްރާހިމް ވަހީދު (އަސްވާޑް) ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ޔޫތު ހެކަތޯން 2025 ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. އަދި އަދުގެ މުޖުތަމައުގައި، މި ވަގުތުގެ ހާލަތުގައި ގައުމަށް ބޭނުންވަނީ ކޮންކަމެއްތޯ މަޝްވަރާކޮށް އެކަމަށް އީޖާދީ ގޮތެއްގައި ހައްލުގެނައުމަކީވެސް ހާސިލްކުރަން ބޭނުންވާ ކަމެއް ކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ އަސްވާޑް ވިދާޅުވީ އުންމީދު ކުރި ވަރަށްވުރެ ގިނައިން މީހުން މި ހެކަތޯނުގައި ބައިވެރިވި ކަމަށެވެ. މަދު ދުވަސްކޮޅަކަށް މިފަހަރުގެ ހެކަތޯނަށް ހުޅުވާލި އިރު، ވަރަށް ރަނގަޅު ތަރުހީބެއް ލިބުނު ކަމަށް އަސްވާޑް ފާހަގަކުރެއްވިއެވެ. މިކަމުން ޒުވާނުންގެ ޝައުގުވެރިކަން މިކަމަށް ހުރި މިންވަރު އެނގިގެންދާ ކަމަށް އޭނާ ވިދާޅުވިއެވެ. މި ހެކަތޯނުގައި 24 އަހަރާއި 26 އަހަރާއި ދެމެދުގެ، ގިނަ އަދަދެއްގެ ޒުވާނުން ބައިވެރިވާކަން މިނިސްޓަރ ފާހަގަކުރެއްވިއެވެ.
އަސްވާޑް ވިދާޅުވީ މި ހެކަތޯނުން ދޭއް ނުވަތަ ތިން ކަމެއް ހާސިލްކުރަން ބޭނުންވާ ކަމަށެވެ. އޭގެތެރެއިން އެއްކަމަކީ ރާއްޖޭގެ އައިޓީ ދާއިރާއަށް ސިނކުޑިތައް ހުޅުވިފައިވާ ޒުވާނުން އެއްތަނަކުން ގިނައިން ބައްދަލުވުމެވެ. އެއްބަޔަކު އަނެއްބަޔަކާއި ގުޅިގެން މަސައްކަތްތަކެއް ކުރާނަމަ، ކުރިއަށް ދިއުމަށް ފަސޭހަވެގެން ދާނެ ކަމަށް އަސްވާޑް ވިދާޅުވިއެވެ.
މިނިސްޓަރ އަސްވާޑް ވިދާޅުވީ، ޒުވާނުން އުފައްދާ ޕްރޮޑަކްޓުތަކަށް މާލީ ބާރުވެރިކަން ލިބުން އެއީވެސް ދެކެން ބޭނުންވާ ވަރަށް ބޮޑު ހުވަފެނެއް ކަމަށެވެ. އަސްވާޑް ޔަގީންކަން ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުންނެވީ ހާއްސަކޮށް އައިޓީ ދާއިރާ، ޓެކް އިންޑަސްޓްރީ ކުރިއަށް ގެންދިއުމުގައި ބާރު ދުވެލީގައި މަސައްކަތް ކުރައްވަން ކަމަށެވެ.
އަދި ހަމައެއާއިއެކު ރާއްޖޭގައި ދާއިރާތަކަށް ތިބެފުޅުން ތި އުފައްދާ ޕްރޮޑަކްޓުތަކަށް މާލީ ބާރުވެރިކަން ލިބުން އެއީވެސް އަޅުގަނޑުމެން ދެކެން ބޭނުންވާ ވަރަށް ބޮޑު ހުވަފެނެއް.މިނިސްޓަރ ވިދާޅުވިއެވެ.
އަސްވާޑް ވިދާޅުވީ އައިޓީ ދާއިރާއަށް ރައީސް ސަމާލުކަން ދެއްވާ މިންވަރުގެ ހެއްކަކީ މޯލްޑީވްސް 2.0އަކީ އެމަނިކުފާނުގެ ދުރުވިސްނުމާއިއެކު ބަދަލުވަމުންދާ މަރުހަލާ ކަމަށެވެ. އެ މަރުހަލާގެ ހުރިހާވެސް ފައިދާއެއް ނެގޭނީ މިވަގުތުގައި އެ އިލްމު ތިބި ޒުވާނުންނަށް ކަމަށް މިނިސްޓަރ ވިދާޅުވިއެވެ. މޯލްޑިވްސް 2.0އަށް ގިނަ މަސައްކަތްތަކެއް ބަދަލުވެގެން ދާއިރު، ހުރިހާ ކަމެއްވެސް އޮންނާނީ ޑިޖިޓަލީ އެކަން ކުރެވޭނެ ގޮތަށް ކަމަށާއި، މިކަމުގެ ފައިދާ މުޖުތަމައުއައް ކުރާނެ ކަމަށް އަސްވާޑް ވިދާޅުވިއެވެ.
