ފުލުހުންގެ ތަމްރީން ކޯސް ނިންމުމަށްފަހު ނިކުންނައިރު، އެންމެ އިސްކަމެއް ދޭން ވާނީ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށްކަމަށް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވެއްޖެއެވެ.
41 ވަނަ ޕޮލިސް އިނީޝިއަލް ޓްރެއިނިން ކޯސް ދަސްވެނިވެ ހިނގާލުމުގެ ރަސްމިއްޔާތުގައި ވާހަކަދައްކަވަމުން ނަވީން ވިދާޅުވީ ފުލުހުންގެ ތަމްރީން ކޯސް ނިންމުމަށްފަހު ނިކުމެވެނީ ޝަރަފްވެރި ޤައުމީ ޚިދުމަތަކަށްކަމަށާއި، މިއީ ހުށިޔާރު ޒިންމާދާރު ޒުވާން ފުލުހުންތަކެއް ޚިދުމަތައް ގުޅޭ ރެއެއްކަމަށެވެ.
ނަވީން ވަނީ ފުރިހަމަ ކުރި ތަމްރީނުން ބިނާ ކޮށްދެވުނު ޝަހްސިއްޔަތުން އަދުލުވެރިކަމާއި، އިންސާފުވެރިކަމާއިއެކު، ރައްޔިތުންނަށް ޚިދުމަތް ފޯރުކޮށްދިނުމަށް އިލްތިމާސް ކުރައްވާފައެވެ. ފުލުހުންގެ ނޫ ޔުނީފޯމަކީ ރައްޔިތުންގެ ސަލާމަތާއި ރައްކާތެރިކަމުގެ ރަމްޒެއްކަމަށާއި މިއީ އަދުލުވެރިކަމުގެ ރަމްޒެއްކަމަށް ކޮމިޝަނަރ އޮފް ޕޮލިސް ވިދާޅުވިއެވެ.
ތިޔަ އިހްތިޔާރުކުރީ ވަރަށް ބުރަ އެހާމެ ޒިންމާދާރު އަދި ގުރުބާނީތަކެއް އެކުލެވޭ މަގެއްކަން. ނަމަވެސް ހަނދާނުގައި ބަހައްޓަންވީ ތިޔަ ފަށަނީ ހަމައެކަނި ވަޒީފާއެއް ނޫންކަން. ތިޔަ ދެވެނީ ޤައުމީ ގޮވާލުމަކަށް އިޖާބަކަން. ތިޔަ ނިކުމެވެނީ ރައްޔިތުންގެ ސަލާމަތާއި ރައްކާތެރިކަމަށްޓަކައި ޝަރަފްވެރި ޤައުމީ ޚިދުމަތަކަށްކަން. އެކަމަށްޓަކައި އަޅުގަނޑުމެން އެންމެން ތިޔަ ފުލުހުންނަށްޓަކައި ފަހުރުވެރިވަން.
ކޮމިޝަނަރ އޮފް ޕޮލިސް ވިދާޅުވިއެވެ.
ފުލުހުންގެ ޔުނީފޯމަކީ އަމާނާތެއްކަމަށް ފާހަގަކޮށް، ޔުނީފޯމަށް ގަދަރު ކުޑަވާނެ އެއްވެސްކަމެއް ނުކުރުމަށް ސީޕީ ވަނީ ނަސޭހަތްތެރިވެވަޑައިގެންފައެވެ. އަދި ގައުމު ބަރޯސާ ވަނީ ހިތްވަރުގަދަ ހަރުދަނާ އަޒުމްވަރުގަދަ އަދުލުވެރި ފުލުހުންނަށްކަން ފާހަގަކުރެއްވިއެވެ.
މިއީ ފުލުހުންގެ ތަމްރީނެއްގައި އަންހެން ފުލުހަކަށް ކޯހުގެ ބެސްޓް އޯލް ރައުންޑް ލިބޭ ފުރަތަމަ ފަހަރެވެ. އެހެންކަމުން މިއީ ދިވެހި ފުލުހުންގެ މުވައްސަސާއަށް އުފާވެރި ރެއެއްގެ ގޮތުގައި ކޮމިޝަނަރ އޮފް ޕޮލިސް އިސްމާއިލް ނަވީން ވަނީ ފާހަގަކުރައްވާފައެވެ.
