އެއް ކޮޓަރީގެ ފުލެޓު ލިބިފައިވާ ފަރާތްތަކަށްވެސް ދެން ހުޅުވާލާ ބޯހިޔާވަހިކަމުގެ ސްކީމުގައި ފުލެޓަށް އެދެވޭގޮތަށް އުސޫލަށް ބަދަލު ގެނެސްފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ގަލޮޅުގެ ރައްޔިތުންނާއި ބައްދަލުކުރައްވާ ރައީސް ވިދާޅުވީ އެމަނިކުފާނުގެ މަގްސަދަކީ ރައްޔިތުންނާއި ގާތުން ބައްދަލުވެ، ރައްޔިތުން ބޭނުންވާ ކަންކަމުގެ ފުރުސަތު ރައްޔިތުންނަށް ދީ އެކަންކަމަށް ވީ އެންމެ ފުރިހަމައަށް އިޖާބަދެއްވާ އެކަން ކޮށްދިނުން ކަމަށެވެ.
މިއަދާއި ހަމައަށް އައިއިރު ރައީސް ވިދާޅުވީ މާލޭގެ ގިނަ އަވަށްތަކައި ބައްދަލުކުރެވިގެން ދިޔައިރު، ބިނާކުރަނިވި ހިޔާލުތަކެއް ހުށައަޅާފައިވާ ކަމަށެވެ.
ރައީސް ވިދާޅުވީ ރައްޔިތުން ވަނީ ލިޔުމުންނާއި އަދި އަމިއްލަ ކަންކަމާއި ގުޅޭ ގޮތުންވެސް ވާހަކަތައް ހިއްސާކުރައްވާފައި ކަމަށެވެ.
ރައީސް ވިދާޅުވީ މިއިން ކޮންމެ ކަމަކަށް ވެސް ވަރަށް އީޖާބީ ގޮތެއްގައި ގާނޫނާއި ގަވާއިދާއި އުސޫލުތަކުގެ ތެރެއިން ކޮށްދެވެން ހުރި ކޮންމެ ކަމެއް ސަރުކާރުގެ ތެރެއިން ކޮށްދިނުމަކީ އެމަނިކުފާނުގެ ވާޖިބެއް ކަމަށެވެ.
ރައީސް ވިދާޅުވީ އެކަން އެގޮތަށްކޮށްދެއްވާނެ ކަމަށާއި މިއަދާއި ހަމައަށް އައިރުވެސް އައިސްފައިވާ ހުރިހާ ރިކުއެސްޓުތަކަށް ރައްޔިތުން ބޭނުންވާ ގޮތަށް ކަންކަން ކޮށްދިނުމަށް މަސައްކަތް ފައްޓަވާފައިވާ ކަމަށެވެ.
ރައީސް ވިދާޅުވީ ކުރިން 1 ކޮޓަރީގެ ފުލެޓުގައި އުޅެމުންދާ ފަރާތްތަކަށްވެސް ދެން ހުޅުވާލާ ސްކީމުގައި ފުލެޓަށް އެދެވޭގޮތަށް އުސޫލަށް ބަދަލު ގެނެސްފައިވާ ކަމަށެވެ.
ރައީސް ވިދާޅުވީ އެފަރާތްތަކުން އެ ފުލެޓު ދޫކޮށްލަން ޖެހޭނެ ކަމަށެވެ. މިއީ ރައްޔިތުންގެ ބައްދަލުވުންތަކުން އެފަރާތްތަކުން އެދިފައިވާ ހިޔާލުތަކަށް ރިއާޔަތްކޮށް ނިންމާފައިވާ ގޮތެއްކަމަށް ރައީސް ފާހަގަކުރެއްވިއެވެ.
ރައީސް ވިދާޅުވީ ރައްޔިތުން އިތުރު ކަމެއްގެ ގޮތުގައި މަސާޖް ޕާލަރ ތަކުގެ ވާހަކަތައް ވެސް ފާހަގަކުރެއްވި ކަމަށެވެ. ރައްޔިތުން އެކަމުގެ ކަންބޮޑުވުން ހިއްސާކުރިއިރު، އިމިްރޭޝަނުންނާއި ފުލުހުން އެކަމަށް ހާއްސަ ފޯކަސްއެއް ދީގެން މިހާހިސާބަށް އައިއިރު 52 މަސާޖް ޕާލަރެއް ބަންދުކޮށްފައިވާ ކަމަށް ރައީސް ވިދާޅުވިއެވެ.
ރައީސް ވިދާޅުވީ މި މައްސަލައާއި ގުޅިގެން އަމިއްލައަށް 28 ތަނެއް ބަންދުކުރި ކަމަށެވެ. ރައީސް ވިދާޅުވީ ކުޑަ ދުވަސްކޮޅެއްގެ ތެރޭގައި ވަރަށް ރަނގަޅަށް މަސައްކަތްތައް ރައްޔިތުންގެ ހިޔާލާއިއެކު ކުރެވެމުން ނަތީޖާ ވަރަށް ރަނގަޅު ކަމަށެވެ.
