ސޯޝަލް މީޑިއާއަކީ މިހާރު ހަމައެކަނި މުވާސަލާތީ ވަސީލަތެއް ނޫނެވެ. އެއީ ޒުވާނުންގެ ވިސްނުމާއި، އުޅުމާއި، ދުނިޔެ ދެކޭ ގޮތް ބައްޓަންކުރުމުގައި ނުފޫޒުގަދަ ބާރަކަށް ވަނީ ވެފައެވެ. ކުރިން މީހުން ގުޅުވައިދޭ ވަސީލަތެއްގެ ގޮތުގައި ބޭނުންކުރެވުނު މި ޕްލެޓްފޯމް މިހާރު ވަނީ އެއަށް ވުރެ މާ ނުފޫޒުގަދަ އަދި މަތީ ހަރުފަތަކަށް އަރާފައިވާ އެއްޗަކަށް ފައެވެ. މިކަމުން އުފެދޭ މުހިންމު ސުވާލަކީ، ސޯޝަލް މީޑިއާއިން ދިވެހި ޒުވާނުން ކުރިއެރުވެނީ ހެއްޔެވެ؟ ނޫނީ ހިމޭންކަމާއެކު ފަހަތަށް ޖައްސަނީ ހެއްޔެވެ؟
ގިނަ ގޮތްގޮތުން ބަލާއިރު، ސޯޝަލް މީޑިއާގެ ފައިދާތައް ދެބަސްވެވެން ނެތް މިންވަރަށް ބޮޑެވެ. ދިވެހިރާއްޖެ ފަދަ ޖަޒީރާ ރަށްތަކެއްގެ މައްޗަށް ބެހިފައިވާ ގައުމެއްގައި، ސޯޝަލް މީޑިއާ ވެފައިވަނީ ރަށްރަށުގެ ދެމެދުގައިވާ ދުރުމިން ގުޅުވައިދޭ ފާލަމަކަށެވެ. އެކި ރަށްރަށުގައި ތިބި ޒުވާނުންނަށް އެކަކު އަނެކަކާ ގުޅުން ބަދަހިކުރުމުގެ ފުރުސަތު މި ވަސީލަތުން ފަހިކޮށްދެއެވެ. އިންސްޓަގްރާމް، ޓިކްޓޮކް، އަދި ފޭސްބުކް ފަދަ ޕްލެޓްފޯމްތަކުން ވަނީ ފަންނުވެރިކަމާއި، ޝުޢޫރު ފާޅުކުރުމާއި، އުނގެނުމަށް ވެސް ޖާގަ ހުޅުވައިދީފައެވެ. އާބާދީގެ ގާތްގަނޑަކަށް 72 އިންސައްތަ މީހުން ސޯޝަލް މީޑިއާ ބޭނުންކުރާ އިރު، 85 އިންސައްތައަށް ވުރެ ގިނަ މީހުންނަށް އިންޓަނެޓްގެ ޚިދުމަތް ލިބެއެވެ. މީގެ މާނައަކީ ދިވެހި ޒުވާނުން ކުރިން ދުވަހަކު ވެސް ނުވާ މިންވަރަށް ގުޅިލާމެހިފައިވާ ކަމެވެ. ދަރިވަރުންނާއި ކުރިއެރުމަށް މަސައްކަތްކުރާ ޒުވާނުންނަށް މި ޕްލެޓްފޯމްތަކުން ބައިނަލްއަގުވާމީ ޚިޔާލުތަކާއި ފުރުސަތުތަކުގެ ދޮރު ހުޅުވައިދެއެވެ. ކުރިން ވާސިލުވެވެން ނެތް ފުރުސަތުތަކެއް މިހާރު އަތް ފޯރާ ހިސާބަށް ގެނެސްދެއެވެ.
އެހެންނަމަވެސް، މި ފައިދާތަކުގެ ފަހަތުގައި ކަންބޮޑުވާން ޖެހޭ ކަންތައްތަކެއް ދަނީ ފެންމަތިވަމުންނެވެ. ނަފްސާނީ ދުޅަހެޔޮކަމަށް ސޯޝަލް މީޑިއާއިން ކުރާ ނޭދެވޭ އަސަރު ދުވަހެއް ދުވަހަކަށް ދަނީ ފާޅުވަމުންނެވެ. ރީތިކޮށް ޒީނަތްތެރިކޮށްފައިވާ ދިރިއުޅުމުގެ ވައްޓަފާޅިތަކާއި ހަގީގަތާ ނުގުޅޭ މިންގަނޑުތައް ތަކުރާރުކޮށް ފެނުމުން، އެކަކު އަނެކަކާ އަޅައިކިޔުމުގެ ސަގާފަތެއް އުފެދެއެވެ. ގިނަ ޒުވާނުންނަށް މީގެ ސަބަބުން އަމިއްލަ ނަފްސާ މެދު ހިތްހަމަނުޖެހުމާއި، ކަންބޮޑުވުމާއި، އަމިއްލަ ނަފްސަށް ކުރާ އިތުބާރު ދަށްވުމުގެ އިހުސާސްތައް ކުރެވެއެވެ. އޮންލައިންގައި ފުރިހަމަ ސޫރައެއް ދެއްކުމުގެ ޕްރެޝަރުގެ ފަހަތުގައި، ހަގީގީ ދިރިއުޅުމުގައި ކުރިމަތިވާ ފުން ތަކުލީފުތައް ފޮރުވިފައި ހުރެއެވެ. އެ ވާހަކަތަކަކީ ގިނަ ފަހަރަށް ދެކެވޭ ސް ވަހަކަތަކެއް ނޫނެެވެ.
ކަންބޮޑުވާން ޖެހޭ އަނެއް ކަމަކީ މާ ބޮޑަށް ސޯޝަލް މީޑިއާ ބޭނުންކުރެވޭ މިންވަރެވެ. ސޯޝަލް މީޑިއާ ޕްލެޓްފޯމްތައް ފަރުމާކޮށްފައި ހުންނަނީ ސަމާލުކަން ދަމައިގަނެ، ވީހާ ވެސް ގިނަ ވަގުތު އޮންލައިންގައި ހޭދަކުރުމަށް ބާރުއެޅޭ ގޮތަށެވެ. ރިޕޯޓުތައް ދައްކާ ގޮތުގައި ދިވެހިން ދުވާލެއްގެ މައްޗަށް ދެ ގަޑިއިރަށް ވުރެ ގިނައިން ސޯޝަލް މީޑިއާގައި ވަގުތު ހޭދަކުރެއެވެ. ޒުވާނުންގެ މެދުގައި މި ޢަދަދު އެއަށް ވުރެ ވެސް މަތިވާނެ ކަމަށް ބެލެވެއެވެ. ސްކްރީނުގައި ހޭދަކުރާ މި މާ ގިނަ ވަގުތުގެ ސަބަބުން، ހަގީގީ ދިރިއުޅުމުގައި ބާއްވާ މާނަހުރި ގުޅުންތައް ދަނީ މަދުވަމުންނެވެ. ނިދުމުގެ އާދަތަކަށާއި، ތަޢުލީމީ ނަތީޖާތަކަށާއި، ޒާތީ ގުޅުންތަކަށް ވެސް މީގެ ނޭދެވޭ އަސަރު ދަނީ ކުރަމުންނެވެ. ގާތް ގުޅުންތަކާއި އެއްބައިވަންތަކަމަށް މަޝްހޫރު މުޖުތަމަޢެއްގައި، މި ބަދަލު އަންނަނީ ލޮލަށް ނުފެންނަ ގޮތަށް ނަމަވެސް ވަރަށް ފުންކޮށެވެ.
މީގެ އިތުރުން، ސައިބަރ ބުލީ ކުރުމާއި ދޮގު މަޢުލޫމާތު ފެތުރުން އިތުރުވުމަކީ ވެސް ސީރިއަސް ނުރައްކާތަކެކެވެ. ގެއްލުންދެނިވި ކޮންޓެންޓް ހަލުވިކަމާއެކު ފެތުރެއެވެ. ދިވެހިރާއްޖެ ފަދަ ކުޑަ މުޖުތަމަޢެއްގައި، މީގެ އަސަރު ވަރަށް ޒާތީ ގޮތެއްގައި ކުރެއެވެ. އެންމެ ޕޯސްޓެއް ނުވަތަ ކޮމެންޓެއްގެ ސަބަބުން ވެސް އަބުރު ގެއްލި، ނަފްސާނީ ދުޅަހެޔޮކަމަށް އަސަރުކޮށް، ދިގު މުއްދަތަކަށް ދެމިގެންދާ ނޭދެވޭ ނަތީޖާތައް ނުކުމެދާނެއެވެ. ރަނގަޅު ހޭލުންތެރިކަމާއި ޑިޖިޓަލް ޒިންމާދާރުކަން ނެތި، ސޯޝަލް މީޑިއާ ފައިދާ ހުރި އެއްޗަކަށް ވުމުގެ ބަދަލުގައި ގެއްލުންދެނިވި އެއްޗަކަށް ބަދަލުވުމަކީ ވަރަށް ފަސޭހަ ކަމެކެވެ.
ސޯޝަލް މީޑިއާ އެ އެއްޗެއް ގޮތުގައި ބަލާއިރު، އެއީ މައްސަލައެއް ނޫނެވެ. އެއީ ވަސީލަތެކެވެ. ފައިދާ ވެސް އަދި ނުރައްކާ ވެސް އެކުލެވިގެންވާ ވަސީލަތެކެވެ. އެހެންނަމަވެސް، އަޅުގަނޑު ދެކޭ ގޮތުގައި ދިވެހި ޒުވާނުންގެ މެދުގައި މިހާރު ފެންނަ ބޭނުންކުރުމުގެ ވައްޓަފާޅިން ދައްކައިދެނީ ނުރައްކާތެރި ހަމަނުޖެހުމެއް އޮތް ކަމެވެ. ބޭނުންކުރާ މިންވަރު އިތުރުވާ ވަރަކަށް، އޭގެ ނުފޫޒު ވެސް ދަނީ ބޮޑުވަމުންނެވެ. މިކަމުގެ ޒިންމާ އެޅެނީ ހަމައެކަނި ޒުވާނުންގެ ބޮލުގައެއް ނޫނެވެ. ބެލެނިވެރިންނާއި، މުދައްރިސުންނާއި، ސިޔާސަތު ކަނޑައަޅާ ފަރާތްތަކުން ވެސް ދުޅަހެޔޮ ޑިޖިޓަލް އާދަތައް ބިނާކުރުމަށް ބާރުއެޅުމުގެ ޒިންމާ ނަގަން ޖެހެއެވެ.
ދިވެހިރާއްޖެ ދަނީ ބަދަލުވަމުންނެވެ. އަދި ޒުވާނުން ވެސް ދަނީ ބަދަލުވަމުންނެވެ. ގޮންޖެހުމަކީ ސޯޝަލް މީޑިއާ ދޫކޮށްލުމެއް ނޫނެވެ. ގޮންޖެހުމަކީ އެއީ ގެއްލުމުގެ ވަސީލަތަކަށް ވުމުގެ ބަދަލުގައި ކުރިއެރުމުގެ ވަސީލަތެއްގެ ގޮތުގައި ބޭނުންކުރެވޭކަން ކަށަވަރުކުރުމެވެ. ސަބަބަކީ، ސަމާލުކަން ނުދީ ދޫކޮށްލައިފި ނަމަ، އަޅުގަނޑުމެން ގުޅުވައިދޭ މި ޕްލެޓްފޯމް، ހަގީގަތުގައި މުހިންމު ކަންކަމާ އަޅުގަނޑުމެން ވަކިކުރާ ވަސީލަތަކަށް މަޑުމަޑުން ބަދަލުވުމަކީ ދުރުކަމަކަށް ނުވާތީއެވެ.
