އިންޑިއާ ސަރުކާރުން ރާއްޖެއަށް ހިމަބިހި ވެކްސިންގެ 20،000 ޑޯސް ހަދިޔާކޮށްފިއެވެ.
ރާއްޖޭގައި ހުންނަ އިންޑިއާގެ އެމްބަސީން ބުނީ، އިންޑިއާއިން ރާއްޖެއަށް މެދުކެނޑުމެއް ނެތި ދެމުންދާ އެހީތެރިކަން އަދިވެސް ދެމިއޮތް ކަމަށެވެ. އެގޮތުން އިއްޔެ ރާއްޖެއަށް އެމްއާރް ވެކްސިން ނުވަތަ ހިމަބިހި ވެކްސިންގެ 20،000 ޑޯސް އާއި ތިން ޓަނުގެ އިތުރު މެޑިކަލް ސަޕްލައި ހަދިޔާކޮށްފައިވާ ކަމަށް އެމްބަސީން ބުންޏެވެ.
ހެލްތު މިނިސްޓްރީގައި އިއްޔެ ބޭއްވި ރަސްމިއްޔާތެއްގައި އިންޑިއާއިން ހަދިޔާކުރި ވެކްސިނާ ހަވާލުވެވަޑައިގަތީ ހެލްތު މިނިސްޓަރު ގީލާ އަލީއެވެ. އިންޑިއާގެ ފަރާތުން އެ ތަކެތި ހަވާލުކޮށްދެއްވީ ރާއްޖޭގައި ހުންނަވާ އެ ގައުމުގެ ސަފީރު ޖީ. ބަލަސުބްރަމާނިއަމްއެވެ.
އެ އެހީއަކީ ރާއްޖޭގައި ހިމަބިހި އިތުރުވަމުންދާތީ އެ ބަލި ކޮންޓްރޯލުކުރުމަށް ސަރުކާރުން ކުރަމުންދާ މަސައްކަތަށް އެހީވުމުގެ ގޮތުން ހަދިޔާކުރި ތަކެތި ކަމަށް އިންޑިއާ އެމްބަސީން ބުންޏެވެ.
އޭގެ އިތުރުން، ރާއްޖެއަކީ އިންޑިއާއިން އަވަށްޓެރި ގައުމުތަކަށް އިސްކަންދޭ ނެއިބާހުޑް ފަސްޓް ޕޮލިސީގެ ދަށުން ހާއްސަ ދަރަޖައެއް ދޭ ގައުމެއް ކަމަށް ވެސް އިންޑީއާ އެމްބަސީން ބުންޏެވެ.
ދެ ގައުމުގެ ރައްޔިތުންނަށް ވެސް ފައިދާވާނެ ފަދަ ކަންކަމުގައި ރާއްޖޭގެ ސަރުކާރާއެކު މަސައްކަތްކުރުމުގައި ދެމި އޮންނާނެކަމުގެ ޔަގިންކަން ވެސް އެމްބަސީން ވަނީ ދީފައެވެ.
