ގްރޭޓަރ މާލޭގެ ސަރަޙައްދުގައި ހިންގާ ކެފޭ، ރެސްޓޯރެންޓް ހޮޓާފަދަ، ޢާންމުންނަށް ކާބޯތަކެތީގެ ޚިދުމަތްދޭ ތަންތަނުންދޭ ”ޓޭކްއަވޭ“ ގެ ޚިދުމަތް ދަންވަރުގެ ވަގުތުތަކުގައި ދިނުން، އެޗްޕީއޭއިން މަނާކޮށްފިއެވެ.
ކޯވިޑް-19 އާއި ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު ނެރުނު ނޫސްބަޔާނުގައިވަނީ، އޭޕްރީލް 2 ވާ ބުރާސްފަތި ދުވަހުގެ 12:00 އިން ފެށިގެން ވަކިގޮތެއް އަންގަންދެން، މާލެއާއި، ވިލިމާލެއާއި، ހުޅުމާލޭގައި ހިންގާ ކެފޭ، ރެސްޓޯރެންޓް ހޮޓާފަދަ، ޢާންމުންނަށް ކާބޯތަކެތީގެ ޚިދުމަތްދޭ އެންމެހައި ތަންތަނުންދޭ ”ޓޭކްއަވޭ“ ގެ ޚިދުމަތް ދިނުން މެންދަމު 12:00 އިން، ހެނދުނު 6:00 އަށް މެދުކަނޑައިލުމަށް އަންގާފައެވެ.
މީގެ އިތުރުން އެޗްޕީއޭއިންވަނީ، މާލެއާއި، ވިލިމާލެއާއި، ހުޅުމާލޭގައި ހިންގާ އެންމެހައި ފިހާރަތަކުން، ރޭގަނޑު 11:00 އިން، ހެނދުނު 6:00 އާއި ދޭތެރޭ އެއްވެސް ޚިދުމަތެއް ފޯރުކޮށްނުދިނުމަށާއި، މި ތިން ރަށުގައި ހިނގަމުންދާ ޢިމާރާތްކުރުމުގެ އެންމެހައި މަސައްކަތްތައް، ހަވީރު 17:00 އިން ހެނދުނު 6:00 އަށް މެދުކަނޑައިލަން އަންގާފައެވެ.
