ގެސްޓްހައުސްއެއްގައި މީހަކު މަރުވެފައި އޮއްވާ ފެނިއްޖެއެވެ.
މާފަންނުގައި ހުރި ގެސްޓު ހައުސްއެއްގައި މަރުވެފައި އޮއްވާ ފެނުނީ އުމުރުން 45 އަހަރުގެ ދިވެހި ފިރިހެނެކެވެ.
ފުލުހުން މީޑިއާތަކަށް ފޮނުވި މެސެޖުގައި މާފަންނުގައި ހުންނަ ގެސްޓްހައުސެއްގައި ދިވެއްސަކު މަރުވެފައި އޮތް ކަމުގެ މައުލޫމާތު ލިބިފައިވަނީ މިއަދު ހަވީރު 5:51 ހާއިރު ކަމަށެވެ.
މަރުވެފައި އޮއްވައި ފެނުނީ އޯސަނިކްވިލާ / ހއ. މޮޅަދޫ، އުމުރުން 45 އަހަރުގެ އިބްރާހީމް ނަޢީމެވެ.
ނަޢީމްގެ މަރާ ގުޅިގެން ބަލަންޖެހޭ ކަންކަން ބަލަމުން އަންނަ ކަމަށް ފުލުހުން ބުންޏެވެ.
ނަމަވެސް އިތުރު ތަފުސީލެއް ފުލުހުން ނުދެއެވެ.
