2016 ވަނަ އަހަރު، މާލޭގެ ދެ ގޭންގެއްގެ ދެމެދުގައި ޖެހުނު މައްސަލައެއްގައި، ހިންގި ސިލްސިލާ މާރާމާރީތަކެއްގައި ތިން ގަޑިއިރު ތެރޭގައި ދެ ކުޑަކުއްޖަކު މަރާލި ހާދިސާ ވެގެން ދިޔައީ ގައުމަށް ސިހުން ގެނުވި ހާދިސާއަކަށެވެ. އެގޮތުން އުމުރުން 14 އަހަރުގެ ފާތިރު މުހައްމަދަށް ވަޅިން ހަމަލާދީ، އޭނާ މަރާލި ކުޑަކުއްޖާގެ މައްޗަށް މީގެ ކުރިން ޖުވެނައިލް ކޯޓުގައި ކުށް ސާބިތުވެފައިވާއިރު، އެ ކުއްޖާއަށް އެހީތެރިވުމުގެ ދައުވާ އުފުލި މ. ކުރިރުއްގޭ، އިރުފާން ރުޝްދީގެ މައްޗަށް ކުށް ސާބިތުނުވާކަމަށް ކްރިމިނަލް ކޯޓުން ހުކުމްކުރީ 10 އަހަރު ފަހުން މި މަހުގެ ތެރޭގައެވެ.
އެ މައްސަލައިގައި ކުޑަކުއްޖެއްގެ މަސްލަހަތު ހިމެނޭތީ، ކްރިމިނަލް ކޯޓުން ހުކުމް އާންމުކޮށްފައިނުވެއެވެ. އެހެންނަމަވެސް، ޕީޖީ އޮފީހުގެ މީޑިއާ އޮފިޝަލް ވަނީ އެ މައްސަލަ ސާބިތުނުވި ސަބަބުތައް ”ސަންގަށް“ ކިޔައިދީފައެވެ.
އިރުފާންގެ މައްޗަށް ދައުލަތުން އުފުލީ، ބިރު ދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާއެވެ. އެ ދައުވާ އުފުލީ 3 ޖޫން 2016 ވަނަ ދުވަހު އެހެން ކުޑަކުއްޖަކު ފާތިރުއަށް ހަމަލާދީ އޭނާ މަރާލިއިރު އެ ގޭ ސިޑި ކައިރީގައި ބަލަން ހުރި ކަމަށާއި، ހަމަލާދީ ނިމުމުން އެ ހަމަލާ ދިން ކުއްޖާ ގޮވައިގެން އެތަނުން ދިޔަ ކަމަށް ބުނެއެވެ.
އެ މައްސަލައިގެ ޝަރީއަތުގައި އިރުފާން ވަނީ ދިފާއީ ހެއްކެއްގެ ގޮތުގައި އޭނާގެ އަމިއްލަ ނަފްސު ހުށަހަޅައި، އަމިއްލަ ދިފާއުގައި ޝަރީއަތުގައި ވާހަކަ ދައްކައިފައެވެ. އޭނާ ބުނެފައިވަނީ، އެ މައްސަލައާ އޭނާއާ އެއްވެސް ގުޅުމެއް ނެތް ކަމަށާއި ދައުވާއަކީ ދޮގު ދައުވާއެއް ކަމަށާއި ފާތިރު މަރާލުމަށް އޭނާ އެއްވެސް ގޮތަކުން އެހީތެރިވެފައިނުވާނެ ކަމަށެވެ. އޭގެ އިތުރުން އޭނާ ބުނެފައިވަނީ، އެ ހާދިސާ ހިނގި ވަގުތުގެ ކުރިން ވެސް އަދި އޭގެ ފަހުން ވެސް އޭނާ ހުންނާނީ ކެފޭއެއްގެ ތެރޭގައި ކަމަށެވެ.
ދައުލަތުގެ ފަރާތުން ވީޑިއޯ އެންޑް އިމޭޖް އެނަލިސިސް ރިޕޯޓު ހުށަހެޅި ފުލުސް މީހާ ހެކިބަސް ދެމުން ބުނެފައިވަނީ، ހާދިސާ ހިނގި ގޭގައި ހުރި ޑީވީއާރުން ނަގާފައިވާ ފޫޓޭޖަށް ބެލުމުން، އިރުފާންއާ އެއްގޮތް ހަ ސިފައެއް ފާހަގަކުރެވުނު ކަމަށާއި ވީޑިއޯއިން ފެންނަ މީހާއަކީ އޭނާ ކަމަށް ބެލެވޭ ކަމަށެވެ.
ފާތިރަށް ހަމަލާދީ މަރާލި އަމަލު ހިންގި ކުއްޖާގެ މައްޗަށް ކުށް ސާބިތުވެފައިވާއިރު، އެ ކުއްޖާއާ ހަވާލާދީ، ހާދިސާ ހިނގި އިރު އެތަނުގައި އިރުފާން ހުރި ކަމަށް ދެ މީހަކު މީގެ ކުރިން ފުލުހުންނަށް ބަޔާން ދީފައިވެއެވެ.
އެ ދެ މީހުން ސިއްރު ހެކީންގެ ގޮތުގައި ދައުލަތުން ހުށަހެޅިނަމަވެސް، އެ ދެ މީހުން ވެސް ކޯޓަށް ހާޒިރުވެފައި ނުވެއެވެ. ފުލުހުންގެ ބަންދުގައި ބަހައްޓައިގެން އެ މީހުން ހާޒިރުކުރުމަށް ވެސް ދައުލަތުން މަސައްކަތް ކުރިއެވެ. ނަމަވެސް، އެގޮތަށް ވެސް އެ މީހުން ހާޒިރުނުކުރެވުމުން، ހާދިސާ ހިނގި ތަނުގައި އިރުފާން ހުރި ކަމަށް ބުނެ އެ މީހުން ކުރިން ދީފައިވާ ބަޔާންތަކަށް ރިއާއަތްކޮށްގެން ކުރިއަށް ގެންދަން ދައުލަތުން ޝަރީއަތުގައި އެދުނެވެ.
އެގޮތަށް ދައުލަތުން އެދުނީ ހެއްކާ ބެހޭ ގާނޫނުގެ 118 ވަނަ މާއްދާ އާއި 119 ވަނަ މާއްދާގެ ދަށުންނެވެ. އެ ދެ މާއްދާގައި ވެސް ބަޔާންކުރަނީ އިވުނު ކަމަށް ބުނާ ހެކި ބަލައިގަނެވޭނެ ހާލަތްތަކަށް ވާއިރު، އިވުނުކަމަށް ބުނާ ހެކީގެ ގޮތުގައި ހުށަހެޅޭނީ، އެ ހެކިބަހުގައި ވަކި ކަމެއް ކުރި ކަމަށް ނުވަތަ ވަކި އެއްޗެއް ބުނިކަމަށް ހަވާލާދޭ މީހާއަކީ އެ މާއްދާގައި ބުނާ ހާލަތަކަށް ފެތޭ މީހަކަށް ވާނަމައެވެ. ހުކުމުގައި ފާހަގަކުރި ގޮތުގައި މި ހާދިސާގައި އެ މީހަކީ ފާތިރު މަރާލުމުގެ ކުށް ސާބިތުވެފައިވާ ކުޑަކުއްޖާއެވެ.
މައްސަލަ ބެއްލެވި ގާޒީ ފާހަގަކުރެއްވީ، އެ ދެ ސިއްރު ހެކީންގެ ބަޔާނަށް ރިއާއަތްކޮށްދޭން ދައުލަތުން އެދުނީ އެ ދެ މީހުން ހާޒިރުނުކުރެވިގެން ކަމެވެ. އަދި އެ ހެކިބަހުގައި ކިޔައިދިން ކަމަށް ހަވާލާދޭ މީހާގެ ހާލަތަށް ބަލައިގެން ނޫން ކަމެވެ. އެހެންކަމުން، ހެއްކާ ބެހޭ ގާނޫނުގެ އެ ދެ މާއްދާގެ ދަށުން އެ ދެ ހެކީން ބަލައިގަނެވޭނެ ކަމަށް ނުފެންނާތީ އެ މައްސަލައިގައި އެ ދެ މީހުންގެ ބަޔާނަށް ރިއާއަތްކުރެވޭނެކަމަށް ގަބޫލުނުކުރެވޭކަމަށް ގާޒީ ވަނީ ނިންމަވައިފައެވެ.
ހާދިސާގެ ވާގިއާތައް ދެން ހުރި ހެކިތަކުން ސާބިތުވާނަމަވެސް، އިރުފާންއާ ގުޅުވާލެވޭ ކަމެއް ދައުލަތަށް ބުނެނުދެވޭ ކަމަށް ގާޒީ ވަނީ ނިންމަވައިފައެވެ.
އެގޮތުން، ދައުލަތުން ހުށަހެޅި ވީޑިއޯ އެންޑް އިމޭޖް އެނަލިސިސް ރިޕޯޓުގައި، އިރުފާންގެ ހަ ސިފައެއް ދިމާވާކަމަށް ބަޔާންކޮށްފައިވީނަމަވެސް، އެ ހަ ސިފައަކީ ބަދަލު ގެނައުމުގެ ފުރުސަތު އޮތް އާންމު ސިފަތަކެއް ކަމަށާއި ހާއްސަ ސިފަތަކެއް ނޫން ކަމަށް ގާޒީ ވަނީ ނިންމަވައިވައެވެ. ހާއްސަ އެއްވެސް ސިފައެއް ބުނެނުދެވޭއިރު، އާންމު ސިފަތަކެއްގެ މައްޗަށް އެކަނި، އިތުރު އެއްވެސް ގުޅުވާލެވޭ ހެއްކެއް ނެތި އެއީ މިވެނި މީހެއް ކަމަށް ނުނިންމޭނެ ކަމަށް ހުކުމުގައިވެއެވެ.
އެހެންކަމުން، އެއީ އިރުފާންކަން އެނގެން ނެތުމުން، ދައުވާގެ މާއްދީ ރުކުން ސާބިތުނުވާ ކަމަށް ކަނޑައަޅާފައިވެއެވެ. އަދި އޭނާގެ މައްޗަށް އެކަށީގެންވާ ޝައްކެއް ނެތް މިންވަރަށް ކުށް ސާބިތުނުވާ ކަމަށް ކަނޑައަަޅާފައިވެއެވެ.
