އީގަލް ހިލްސް މަޝްރޫއުއަށް ފާޑުކިޔުމާ ގުޅިގެން ދިވެހީންތަކެއް ޔޫއޭއީއަށް ނުވަދެވޭގޮތަށް ބްލެކްލިސްޓްކުރިކަމުގެ މައުލޫމާތު ލިބިފައި ނެތް ކަމަށް ސަރުކާރުގެ ތަރުޖަމާނު މުހައްމަދު ހުސެއިން ޝަރީފް (މުންދު) ވިދާޅުވެއްޖެއެވެ.
އީގަލް ހިލްސް މަޝްރޫއާ ގުޅޭގޮތުން ސޯޝަލް މީޑިއާގައި ފާޑުކިޔުމާ ގުޅިގެން ޔޫއޭއީއަށް ނުވަދެވޭ ގޮތަށް 15 ދިވެއްސަކު ބްލެކް ލިސްޓުކޮށްފައިވާކަމަށް ބުނެ ފެތުރި ޕޯސްޓަކަށް ވަނީ ގިނަ ބައެއްގެ ސަމާލުކަން ލިބިފައެވެ.
އެކަމާ ގުޅިގެން ”ސަންގުން“ ސުވާލުކުރުމުން، މީގެ ކުރިން ޔޫއޭއީގައި ރާއްޖޭގެ ސަފީރަކަށް ހުންނެވި މުންދު ވިދާޅުވީ، އެފަދަ މައުލޫމާތެއް މިހާތަނަށް ވެސް ސަރުކާރަށް ލިބިފައި ނެތް ކަމަށެވެ.
މުންދު ވިދާޅުވީ، ޔޫއޭއަށް ނުވަދެވިގެން މީހަކު އެފަދަ ކަމެއް ރަސްމީކޮށް ސަރުކާރަށް އަންގާފައި ނުވާ ކަމަށެވެ. އަދި ޔޫއޭއީގެ ފަރާތުން ވެސް އެފަދަ މައްސަލައެއް ރަސްމީކޮށް އަންގާފައި ނެތް ކަމަށެވެ.
ޕްރައިވެޓް ކުންފުންޏެއްގެ މުއާމަލާތަކާ ގުޅިގެން ސީދާ ޔޫއޭއީގެ ސަރުކާރުން ދިވެހި ވަކިވަކި ރައްޔިތުންތަކަކާ މެދު ފިޔަވަޅު އަޅާފާނެ ކަމަށް ގަބޫލެނުކުރެވޭ ކަމަށް ވެސް މުންދު ވިދާޅުވިއެވެ.
އެހެންނަމަވެސް، އެކިއެކި އެހެނިހެން ސަބަބުތަކާ ހެދި ގައުމުތަކުން ދިވެހި ރައްޔިތުން ބްލެކްލިސްޓުކުރާ ކަމަށާއި އެފަދަ މައުލޫމާތުތައް ހުންނާނީ އެ ސަރުކާރެއްގައިކަން އޭނާ ފާހަގަކުރެއްވިއެވެ.
މިކަމާ ގުޅޭގޮތުން މިހާރު ޔޫއޭއީގައި ހުންނަވާ ސަފީރު ތޯރިގް އިބްރާހިމްގެ ބަހެއް ހޯދަން ”ސަންގުން“ ގުޅުމުން ފޯނު ނަންގަވާފައި ނުވެއެވެ.
ރަސްމާލެއިން ބޮޑު ބައެއް ޔޫއޭއީގެ އީގަލް ހިލްސް ކުންފުންޏަށް ދޫކުރުމުން ސަރުކާރަށް ފާޑުކިޔުން އަމާޒުވެފައިވަނީ، އެ އެއްބަސްވުމުގެ ދަށުން، އެ ކުންފުނިން ތަރައްގީކުރާ ތަންތަން އެހެން ފަރާތްތަކަށް 99 އަހަރަށް ކުއްޔަށް ދެވޭ ގޮތަށް ވެސް އޮތުމާ ގުޅިގެން ގައުމުގެ ސިޔާދަތަށް އެކަމާ ގުޅިގެން ނުރައްކާވާނެކަމަށް ބުނެއެވެ.
އޭގެ އިތުރުން، ބޯހިޔާވަހިކަމުގެ މައްސަލަ ހައްލުކުރަން ހިއްކި ބިމެއްގެ ބޮޑު ބައެއް ލަގްޒަރީ ރިއަލް އެސްޓޭޓް މަޝްރޫއެއް ހިންގަން ދޫކުރީ އިސްރާއީލާ ގުޅުންހުރި ކުންފުންޏަކަށް ކަމަށް ބުނެ ސޯޝަލް މީޑިއާގައި ދަނީ ފާޑުކިޔަމުންނެވެ.
