ޔުނައިޓެޑް އެރަބް އެމިރޭޓްސް (ޔޫއޭއީ)ގެ އީގަލް ހިލްސްއާ ގުޅިގެން ރާސްމާލޭގައި ތަރައްގީކުރާ ”މޯލްޑިވްސް ވޯޓަރފްރަންޓް އެންޑް މެރީނާ“ މަޝްރޫއަކީ ރާއްޖޭގެ އިގްތިސާދަށް އިންގިލާބީ ބަދަލެއް ގެނެސްދޭނެ މަޝްރޫއެއްކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވެއްޖެއެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ހަލީމް ވަނީ ދައުލަތް ދަރަނިނުވެ، އެ މަޝްރޫއިން ފާހަގަކޮށްލެވޭ މުހިންމު ކަންކަން ފާހަގަކުރައްވާފައެވެ.
އެގޮތުން 3 ކޮޓަރީގެ 5،000 ޔުނިޓް ޑިވެލޮޕަރުގެ ހަރަދުގައި ބިނާކުރެވޭނެކަމަށާއި، ދިވެހީންނަށް 54,000 އަށްވުރެ ގިނަ އައު ވަޒީފާގެ ފުރުސަތުތައް އުފެދިގެންދާނެކަން އޭނާ ފާހަގަކުރެއްވިއެވެ. މީގެ އިތުރުން، މަޝްރޫއުގެ ޑިވެލޮޕްމަންޓް މުއްދަތުގައި ދައުލަތަށް 11 ބިލިއަނަށްވުރެ ގިނަ ޑޮލަރު ލިބޭނެކަން އޭނާ ފާހަގަކުރެއްވިއެވެ.
މީގެ އިތުރުން، އެ މަޝްރޫއުން ބިމުގެ މިލްކުވެރިކަން ދޫނުކޮށް، މުޅި މަޝްރޫއު ހިންގޭނީ ދިވެހިރާއްޖޭގެ ގާނޫނުތަކުގެ ހިމާޔަތުގެ ދަށުން ކަން ވެސް އޭނާ ފާހަގަކުރައްވާފައިވެއެވެ.
ހަމައެއާއެކު، 2025 ވަނަ އަހަރުގެ މީރާގެ ރެކޯޑުތަކަށް ބަލާއިރު، ފަތުރުވެރިކަމުގެ ދާއިރާގެ ޖުމްލަ އިންވެސްޓްމަންޓަކީ 13.7 ބިލިއަން އެމެރިކާ ޑޮލަރުކަން ފާހަގަކުރައްވައި، ރަސްމާލޭގެ އީގަލް ހިލްސް އިންވެސްޓްމަންޓުން ދިވެހި ދައުލަތަށް 179 ރިސޯޓާއި، 16 ހޯޓަލާއި، 920 ގެސްޓްހައުސް އަދި 165 ސަފާރީ އުޅަންދު ހިމެނޭހެން، މުޅި ފަތުރުވެރިކަމުގެ ދާއިރާއިން ދައުލަތަށް ލިބޭ ޖުމްލަ އާމްދަނީއަށްވުރެވެސް އިތުރު އަދަދަކަށް ވާނެކަން ޔަގީންކުރެވޭކަމަށް ހަލީމް ވިދާޅުވިއެވެ.
އިދިކޮޅު ފަރާތްތަކުން އެ މަޝްރޫއާ ދެކޮޅަށް ވާހަކަދައްކައި، ރައްޔިތުންނަށް ދޮގު މައުލޫމާތު ފެތުރުމަށް އެހާ ބޮޑަށް މަސައްކަތްކުރަނީވެސް އެ ސަބަބާހުރެކަމަށް ވިދާޅުވެ ހަލީމް ވަނީ ސިޔާސީގޮތުން ހިޔާލު ތަފާތުވިޔަސް، ގައުމަށް ލިބޭ މިފަދަ ފުރުސަތުތަކާ ދެކޮޅަށް ދޮގު މައުލޫމާތު ފަތުރާ ގައުމުގެ ތަރައްގީ ހުއްޓުވަން މަސައްކަތްކުރުމަކީ ގައުމާމެދު އިދިކޮޅު ފަރާތްތަކުގެ އެއްވެސް އިހްލާސްތެރިކަމެއް ނެތުންކަމަށް ވިދާޅުވެފައެވެ.
ހަލީމް ވަނީ އެ މަޝްރޫއަކީ އިގްތިސާދީ ކުރިއެރުމާއި، ދިވެހީންގެ ފާގަތި މުސްތަގްބަލަކަށް އެޅޭ މުހިންމު ފިޔަވަޅެއްކަން ދިވެހި ރައްޔިތުން އަދި އަދުގެ ޒުވާނުން ގަބޫލުކުރާކަމަށް ވިދާޅުވެފައެވެ.
