ރަށްރަށަށް ފައިސާ ދައުރުކުރަން ސަރުކާރު ކުންފުނިތައް ހަމައެކަނި ވަސީލަތަކަށް ހެދޭކަށް ނެތް ކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސްގެ ތެރެއިން ބާއްވާ ކައުންސިލްތަކުގެ އިންވެސްޓެމެންޓް ފޯރަމްގައި ވާހަކަ ދައްކަވަމުން ރައީސް ނަޝީދު ވިދާޅުވީ، މިހާރު ވެސް ބައެއް ރަށްރަށުގައި ގްރޭޑް 1ގައި ކިޔަވާނެ ދަރިވަރުން ނެތް ކަމަށެވެ. ކުރިއަށް އޮތް ތަނުގައި އިތުރު ގްރޭޑުތައް ވެސް ނެތެމުންދާކަމަށާއި ރަށްރަށް ދަނީ ފަޅުވަމުންކަމަށް އެމަނިކުފާނު ވިދާޅުވިއެވެ.
މާލޭ ސަރަހައްދުގައި މާލެ ކިޔައިގެން އެކި ނަންނަމުގައި އިތުރު މާލެތައް ތަރައްގީކުރަމުން އަންނައިރު، ރާއްޖޭގެ ރައްޔިތުން އެތަންތަނަށް ވަޒީފާތަކަށާއި ދަރިންނަށް ތައުލީމު ހޯދައިދޭށާއި ބޭސްފަރުވާއަށް އަދި ރަނގަޅު ދިިރުއުޅުމެއް ހޯދުމަށް އަންނާނެ ކަމަށް އެމަނިކުފާނު ވިދާޅުވިއެވެ. އަދި އެއީ އެންމެން ވެސް ކުރަންޖެހޭނެ ކަމެއް ކަމަށް އެމަނިކުފާނު ވިދާޅުވިއެވެ.
އެހެންނަމަވެސް، އެމްޑީޕީގެ އަމާޒަކީ ރަށްރަށުގައި އެ ދިރިއުޅުން ރައްޔިތުންނަށް ހޯދައިދިނުން ކަމަށް ރައީސް ނަޝީދު ވިދާޅުވިއެވެ. އަދި އެ ދިރިއުޅުން ހޯދައިދެވެން އޮތީ ރަށްރަށުގައި ވަޒީފާގެ ފުރުސަތުތައް ހޯދައިދީގެން ކަމަށް ވިދާޅުވިއެވެ.
ރަށްރަށަށް ފައިސާ ދައުރުކުރަން ސަރުކާރު ކުންފުނިތައް ހަމައެކަނި ވަސީލަތަކަށް ހެދެން ނެތް ކަމަށާއި އެކަމުން އެކަނި ރަށެއްގެ އިގްތިސާދު ދެމެހެއްޓިނިވި ގޮތެއްގައި ހިފެހެއްޓިގެން ނުދާނެކަމަށް ވެސް އެމަނިކުފާނު ވިދާޅުވިއެވެ.
”ސަރުކާރު ހިއްސާވާ ކުންފުނިތަކަކީ ހަމައެކަނި ވަސީލަތަކަށް ހެދޭކަށް ނެތް ރަށްރަށަށް ފައިސާ ދައުރުކުރަން. ފެނަކައިން ސަތޭކަ މީހުން ކޮންމެ ރަށަކުން މީހުން ވަޒީފާއަށް ނެގީމާ ރަނގަޅު. އާދެ އެބަ ފައިސާކޮޅެއް ރަށުގައި ދައުރުވޭ. އެހެންނަމަވެސް، އޭގެނެއް ރަށެއްގެ އިގްތިސާދު ދެމެހެއްޓިނިވި ގޮތެއްގައި ހިފެހެއްޓިގެން ނުދާނެ.“
ރަށެއްގެ އިގްތިސާދު ހިފެހެއްޓިގެންދާނީ އަދި އިތުބާރާއެކީ ވަޒީފާގެ ފުރުސަތުތައް ހުޅުވިގެންދާނީ ވެސް ރަނގަޅު ވިޔަފާރިތަކެއް ހިނގުމުން ކަމަށް ވިދާޅުވިއެވެ. އަދި މިހާރު ކޮންގްރެސްގެ އިންވެސްޓެމެންޓް ފޯރަމްގައި ހުށަހަޅާ ޕްރޮޖެކްޓުތަކަކީ ބޭންކަބަލް އަދި ވަޔަބަލް ޕްރޮޖެކްޓުތަކެއް ކަމަށް އެމަނިކުފާނު ވިދާޅުވިއެވެ.
އެހެންނަމަވެސް، އެ ޕްރޮޖެކްޓުތައް ވަޔަބަލް ނުވާ މިންވަރެއް އޮވެދާނެ ކަމަށާއި އެ މިންވަރަކީ ކްރޮސް ސަބްސިޑީން ނުވަތަ ބްލޮކް ގްރާންޓު ނުވަތަ ކައުންސިލުގެ އާމްނަދީން ވިޔަސް ޕްރޮޖެކްޓަށް ފައިސާ ވަންނަންވީ މިންވަރު ކަމަށް އެމަނިކުފާނު ވިދާޅުވިއެވެ.
