މާ ގިނަ ފައިސާތަކެއް ހަރަދުނުކޮށް ވިޔަފާރީގެ ފައިދާ ހޯދުމުގެ ފުރުސަތު ރަށްރަށުގައި އެބައޮތް ކަމަށް އެމްޑީޕީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެމްޑީޕީގެ ކޮންގްރެސްގެ ތެރެއިން ބާއްވާ އިންވެސްޓްމެންޓް ފޯރަމްގައި ވާހަކަ ދައްކަވަމުން ރައީސް ނަޝީދު ވިދާޅުވީ، އެ އިންވެސްޓެމެންޓް ފޯރަމްގައި ހުށަހަޅަނީ މާ ބައިވަރު ފައިސާތަކެއް ބޭނުންވާ މަޝްރޫއުތަކެއް ނޫން ކަމަށެވެ.
އޭގެ އިތުރުން، އެ ފޯރަމްގައި ހުށަހަޅާ މަޝްރޫއުތަކަކީ މަދު ފައިސާކޮޅަކުން ބޮޑު ފައިދާއެއް ހޯދޭނެ ފަދަ މަޝްރޫއުތަކެއް ކަމަށާއި ފަސް ލައްކަ ރުފިޔާ ވަރު އަތުގައި އޮތަސް ވެސް ބޮޑު ރިޓާންއެއް ހޯދިދާނެ ކަމަށް ވިދާޅުވިއެވެ.
”އަޅުގަނޑު އަޅުގަނޑުމެންގެ ރާއްޖޭގެ ފައިސާކޮޅު ގެންގުޅޭ ހުރިހާ ބޭފުޅުންނަށް ދަންނަވަން އޮތީ، ހަގީގަތުގައި ވަރަށް ބޮޑު ރިޓާންއެއް ފައިދާއެއް ހޯދެން އެބަ އޮތް، ފަސް ލައްކަ ރުފިޔާ ވަރު އަތުގައި އޮތަސް ވެސް ބޮޑު ރިޓާންއެއް މި ކައުންސިލްތަކުގައި ލިބެން އެބަ އޮތް،“
އެމަނިކުފާނު ވިދާޅުވީ، އެހެން އެއްވެސް ތަނެއްގައި ނެތް ވަރަށް ރާއްޖޭގެ ރަށްތަކުގައި ވިޔަފާރީގެ ފައިދާ ހޯދުމުގެ ފުރުސަތު އެބަ އޮތް ކަމަށެވެ. އަދި އެއީ އެހެން އެއްވެސް ކަމެއް އެތަންތަނުގައި ނެތުމުން ކަމަށް އެމަނިކުފާނު ވިދާޅުވިއެވެ. ނަމަވެސް، ހުރިހާ ގުދުރަތީ ވަސީލަތްތަކެއް އެބަހުރި ކަމަށާއި ގުދުރަތީ މުއްސަނދިކަން އެބަހުރިކަން ފާހަގަކުރެއްވިއެވެ.
ރައީސް ނަޝީދު ވިދާޅުވި ގޮތުގައި ރާއްޖޭގެ ރަށްރަށް ދިމާވަނީ ހަމައެކަނި ވިޔަފާރީގެ ވިސްނުމާއި ގާބިލުކަން ހުރި މީހުންނާއި ކެޕިޓަލް ނެތުމުގެ މައްސަލަ ކަމަށެވެ. އިންވެސްޓްމެންޓް ފޯރަމްގެ ތެރެއިން ހައްލު ހޯދަން އުޅޭ މައްސަލައަކީ އެއީ ކަމަށް އެމަނިކުފާނު ވިދާޅުވިއެވެ.
އޭގެ އިތުރުން، އެމްޑީޕީގެ ޕްރޮޖެކްޓް ޑިޕާޓްމެންޓުގެ އަމާޒަކީ ރަށްރަށުގައި ހިނގާ އާމްދަނީ ލިބޭ މަސައްކަތްތައް ވިޔަފާރިއަކަށް ބަދަލުކޮށް ވިޔަފާރީގެ އުސޫލުން ނަފާ ލިބިގެން ހިންގޭނެ ގޮތްތަކެއް ކައުންސިލުތަކަށް ހޯދައިދިނުން ކަމަށް ވެސް އެމަނިކުފާނު ވިދާޅުވިއެވެ.
އެ އިންވެސްޓެމެންޓް ފޯރަމަށް 76 ޕްރޮޕޯސަލެއް ހުށަހަޅާނެ ކަަމަށް އެމްޑީޕީން ބުނެފައިވާއިރު، އޭގެ ތެރެއިން 40 ހުށަހެޅުމެއްގައި މަޝްރޫއުއަށް ހޯދާ އިންވެސްޓްމެންޓްގެ އަދަދު 306 މިލިއަން ޑޮލަރަށް އަރައެވެ.
