އެތެރޭގެ އިންތިހާބުތަކާއި ދިމާކޮށް އެހެން ޕާޓީގެ މީހުން ޕާޓީއަށް ވަދެ، އެމްޑީޕީގެ އެތެރޭގެ އިންތިހާބުތަކަށް ނުފޫޒު ނުފޯރުވޭ ގޮތް ހެދުމަށް ވޯޓުލާން ރެޖިސްޓްރީވާންޖެހޭ މުއްދަތަށް އެމްޑީޕީގެ ޕީޖީ ލީޑަރު އިބްރާހިމް ނާޒިލް އިސްލާހުތަކެއް ހުށައަޅުއްވައިފިއެވެ.
އެމްޑީޕީގެ ކޮންގްރެސްގައި ފައްޔާޒް ހުށައަޅުއްވާ އަދި އީވާ އަބްދުﷲ ތާއިދު ކުރެއްވި އާ އަސާސީ ގަވައިދުގެ އިސްލާހަށް ނާޒިލް ވެސް ވަނީ އިސްލާހެއް ހުށަހަޅުއްވާފައެވެ. އެގޮތުން ނާޒިލް ވަނީ އަސާސީ ގަވައިދަށް ހުށައަޅައިފައިވާ އިސްލާހުގެ 105 ވަނަ މާއްދާ ބަދަލުކުރަން ހުށަހަޅުއްވައިފައެވެ.
ނާޒިލް އެ މާއްދާތައް އިސްލާހުކުރަން ހުށަހެޅި ގޮތް:
- ޕާޓީގެ އަސާސީ ގަވައިދުގެ 105 ވަނަ މާއްދާގެ (ހ): ޕާޓީގެ އެތެރޭގެ އިންތިހާބުތަކުގައި ވޯޓު ދިނުމުގެ ހައްގު ލިބިގެން ވަނީ އެ އިންތިހާބުގައި ވޯޓުލާ ދުވަސް ކަމަށް ކަނޑައަޅައިފައިވާ ދުވަހާއި ހަމައަށް، މަދުވެގެން ފާއިތުވި 90 ދުވަހުގެ ކުރިން ޕާޓީގެ ރަސްމީ ދަފްތަރުގައި ރަޖިސްޓްރީ ވެފައިވާ މެމްބަރުންނަށެވެ.
- (ށ): ޕާޓީގެ ހުރިހާ މެމްބަރުން ވޯޓުލާ އިންތިހާބުތަކުގައި އެ އިންތިހާބެއް ބޭއްވުމުގެ މަދުވެގެން 120 ދުވަސް ކުރިން އިއުލާނު ކުރަންވާނެއެވެ. އެގޮތަށް ކުރާ އިއުލާނުގައި އިންތިހާބުގައި ވާދަކުރުމުގެ ފުރުސަތު ހުޅުވާލިކަމާއި އިންތިހާބުކުރާ ފަރާތުގެ ޝަރުތުތަކާއި، ފުރިހަމަ ކުރަންޖެހޭ ކަންތައްތަކާއި، ކުރިމަތިލުމަށް އެދި ހުށައެޅުމުގެ މުއްދަތާއި އެ އިންތިހާބުގައި ވޯޓުލުމުގެ ދުވަސް ކަނޑައަޅައި ބަޔާންކުރުން.
- (ނ): މި މާއްދާގެ (ށ)ގައި އެހެން ބަޔާންކޮށްފައި ވީނަމަވެސް، އަސާސީ ގަވައިދަށް ގެނެވޭ އިސްލާހު ފާސްކޮށް އަމަލުކުރަން ފެށުމަށްފަހު ގައުމީ މަޖިލީހަށް މެމްބަރުން ހޮވުމަށް ފުރަތަމަ ބާއްވާ އިންތިހާބަށް އެ މާއްދާތަކުގައި ބުނާ މުއްދަތުތައް ނުހިނގާނެއެވެ. އެ އިންތިހާބުގައި އަމަލުކުރާނީ އަސާސީ ގަވައިދުގައި އިސްލާހު ގެނައުމާއި ހަމައަށް އަމަލުކުރާ ގޮތެވެ.
އެ އިސްލާހު އެހެން ހުށަހެޅި މައިގަނޑު ސަބަބަކީ ޕާޓީގެ އެތެރޭގެ އިންތިހާބު ބާއްވާއިރު، އެކި އިންތިހާބުތަކާއި ދިމާކޮށް ގިނަ ބަޔަކު ޕާޓީއަށް ވަދެ ނިކުމެ، އެތެރޭގެ އިންތިހާބުތަކުގެ އަދަދު ބޮޑުތަނުން ބަދަލުވާތީ ކަމަށް ނަޒިލް ވިދާޅުވިއެވެ.
