ޓެކްނޮލޮޖީއާއި އޭއައި ކުރިއަރައިގެން ދިޔަ ނަމަވެސް ފަނޑިޔާރުން ކުރައްވާ މަސައްކަތްޕުޅު ނުވަތަ ކޯޓަށް ހުށަހަޅާ މައްސަލައަށް ގޮތް ނިންމުމުގައި ފަނޑިޔާރުގެ ދައުރު އަލްގޯރިދަމްއަކަށް ދޫކޮށްލުމަކީ ކުރެވޭނެ ކަމެއް ނޫންކަމަށް އުއްތަމަ ފަނޑިޔާރު ޢަބްދުލްޣަނީ މުޙައްމަދު ވިދާޅުވެއްޖެއެވެ.
އުއްތަމަ ފަނޑިޔާރު މިހެން ވިދާޅުވީ މި މަހުގެ 1 އިން 2 އަށް އުޒްބެކިސްތާންގެ ސަމަރުޤަންދުގައި ކުރިއަށް ދިޔަ އެސޯސިއޭޝަން އޮފް އޭޝިއަން ކޮންސްޓިޓިއުޝަނަލް ކޯޓްސް އެންޑް އިކުއިވަލަންޓް އިންސްޓިޓިއުޝަންސް (އޭ.އޭ.ސީ.ސީ)ގެ 7ވަނަ ކޮންގްރެސްގައި ތަގްރީރުކުރައްވަމުންނެވެ. އެމަނިކުފާނު ތަގްރީރުކުރެއްވީ ”ފްރޮމް ކޭސް ބެކްލޮގްސް ޓު ޓައިމްލީ ޖަސްޓިސް: ޑިޖިޓަލް ޓްރާންސްފޯމޭޝަން ފޮރ ސްޓްރެންތަނިންގ ޖުޑީޝަލް ޕާރފޯމަންސް އެންޑް ޕަބްލިކް ޓްރަސްޓް“ މި މައުޟޫއަށެވެ.
އެގޮތުން، އުއްތަމަ ފަނޑިޔާރު ވަނީ ކޯޓުތަކުގައި ނުނިމި ހުރި މައްސަލަތައް ނިންމުމުގެ ހާއްސަ މަސައްކަތް ރާއްޖޭގައި ކުރިއަށްދާ ގޮތާއި، ޓެކްނޮލޮޖީ އަދި އޭއައިގެ އެހީގައި ކޯޓުގައި ހުރި މައްސަލަތައް ލަސްވާ ސަބަބު ދެނެގަތުމަށް އަދި ޝަރީއަތުގެ މަސައްކަތްތައް އަވަސްކުރެވިދާނެ ގޮތްތަކަށް އަލިއަޅުވާލައްވާފައެވެ.
ޖުޑީޝަރީތަކުން އަމާޒުހިފަންޖެހޭނީ އޭއައި ފަދަ ޓެކްނޮލޮޖީތަކަކީ ޖުޑީޝަރީތަކަށް އެހީތެރިވެދޭ ޓެކްނޮލޮޖީތަކެއް ކަމުގައި ހެދުމަށް ކަމަށް ވިދާޅުވިއެވެ. އޭގެ އިތުރުން ރާއްޖޭގެ ޖުޑީޝަރީގައިވެސް އެ އުޞޫލުން ބައެއް މަސައްކަތް ކުރެވޭކަން ފާހަގަކުރައްވައި، ރާއްޖޭގައި ވަށާޖެހޭ ކޭސް މެނޭޖްމަންޓް ސިސްޓަމެއް ބޭނުން ކުރެވިގެން ދިއުމާމެދު ކުރެވޭ ތަސައްވުރު ހިއްސާކުރެއްވިއެވެ.
އެ ކޮންގްރެސްގެ ހަވާސާގައި ކޮންގްރެސްގައި ބައިވެރިވެވަޑައިންނެވި އެހެން ގައުމުތަކުގެ އުއްތަމަ ފަނޑިޔާރުންނާއި ދުސްތޫރީ ކޯޓުތަކުގެ ފަނޑިޔާރުންނާ ޖުޑީޝަރީތަކުގެ އިސްވެރިންނާ ދެމެދު ބޭއްވުނު މުހިއްމު މަޝްވަރާތަކެއްގައި ދިވެހިރާއްޖޭގެ އުއްތަމަ ފަނޑިޔާރު ބައިވެރިވެވަޑައިގެންނެވިއެވެ. އެ ކޮންފަރެންސްގައި ދުސްތޫރީ ކޯޓުތަކުގައި އޭއައި ބޭނުންކުރުމާ ބެހޭ ގޮތުން ބައިވެރިން އެއްބަސްވާ ހަމަތަކުގެ މައްޗަށް ބިނާވާ ގަރާރެއް ”ސަމަރުޤަންދު ޑިކްލަރޭޝަން“ގެ ނަމުގައި އެކުލަވާލައި ފާސްކޮށްފައިވެއެވެ.
އެ ކޮންގްރެސްގައި އޭއޭސީސީގެ މެމްބަރު 18 ގައުމަކުން އެގައުމުތަކުގެ އެންމެ މަތީ ކޯޓުތަކުގެ އިސްވެރިންވެސް ބައިވެރިވެވަޑަގެންނެވިއެވެ.
