ރައްޔިތުން މަޖިލީހުގެ ގުރައިދޫ ދާއިރާގެ މެންބަރު އަދި އިދިކޮޅު ޕީޕީއެމްގެ ނައިބު ރައީސް ޣައްސާން މައުމޫން ކޮވިޑް-19 އަށް ނައްސި (ނެގެޓިވް) ވެފައިވާ ކަމަށް އޭނާ ވިދާޅުވެއްޖެއެވެ.
ޣައްސާން ކޮވިޑް-19 އަށް ޓެސްޓް ކުރީ އޭނާގެ ބައްޕާފުޅު ކުރީގެ ރައީސް މައުމޫން އަބްދުލްޣައްޔޫމް ކޮވިޑް-19 އަށް ފައްސިވުމުން ޣައްސާން ޑައިރެކްޓް ކޮންޓެކްޓަކަށް ވެފައި ވާތީއެވެ.
ބައްޕާފުޅު ޕޮޒްޓިވްވުމާއެކު ސޯސަލް މީޑިއާގައި ބައްޕާފުޅަށް ކޮވިޑް ޖެހުނީ ޢައްސާންގެ ފުށުންކަމަށްބުނެ ގިނަ ބަޔަކުދިއައީ ތުހުމަތުގެ އިގިލި ޢައްސާނަށް ދިއްކުރަމުންނެވެ. އެގޮތުން ޕީޕީއެމްއިން މާލޭގައި ކުރި މުޒާހަރާގައި ޢައްސާން ބައިވެރިވެފައިވާތީވެސް ތުހުމަތު އިގިލިވަނީ ދިއްކޮށްފައެވެ.
ޣައްސާން ކުރެއްވި ޓްވީޓެއްގައި ވިދާޅުވީ ބައްޕައަށާއި ކޮވިޑް-19 އަށް ފައްސިވެފައިވާ އެންމެނަށް އަވަސް ޝިފާއެއް ލިބުން އެދި ދުޢާ ކުރައްވާ ކަމަށެވެ.
“ދިވެހި ޑޮކްޓަރުންނާއި ނަރުހުންގެ އިހްލާސްތެރި ޚިދުމަތް ގާތުން ދެކެމުން ހިފެހެއްޓުމެއްނެތި ހިތުގެ ލޯތްބާއި ޝުކުރު ދަންނަވަން.” ޣައްސާން ވިދާޅުވިއެވެ.
Alhugandu #COVID19 ah -ve vefava vaahaka hissaakuran. Alhuganduge lobuvethi Bappa ashai, #COVID19 ah +ve vefaiva emmenah avas shifa akah edhi Dhua kuran. Dhivehi doctarunnai naruhun ge ikhlaastheri khidhumai gaathun dhekemun, hifehettumenethi hithuge loibbai shukuru dhannavan! ❤ pic.twitter.com/s8GmLWLbYZ
— Mohamed Ghassan Maumoon (@mgmaumoon) August 27, 2020
ރައީސް މައުމޫންގެ ބޮޑީގާޑެއްގެ ގޮތުގައި މަސައްކަތް ކުރައްވާ އަހްމަދު ސޮފްވާން ވެސް ވަނީ އިއްޔެ ކޮވިޑް-19 އަށް ޓެސްޓް ކޮށްފައެވެ. އޭނާ ވެސް ކޮވިޑް-19 އަށް ނައްސި ވެފައިވާ ކަމަށް ރޭ ކުރި ޓްވީޓެއްގައި ބުނެފައި ވެއެވެ.
ރައީސް މައުމޫންގެ އެއްވެސް ޑައިރެކްޓް ކޮންޓެކްޓެއް އަދި ކޮވިޑް-19 އަށް ފައްސިވި ކަމުގެ މައުލޫމާތު ލިބިފައެއް ނުވެއެވެ.
ރައީސް މައުމޫން ކޮވިޑް-19 އަށް ފައްސިވިކަން އެނގުނީ އިއްޔެ ރޭގެ ވަގުތެއްގައެވެ. އެމަނިކުފާނު މިހާރު ވަނީ ދަރުމަވަންތަ ހޮސްޕިޓަލްގައި އެޑްމިޓް ކޮށްފައެވެ. ރައީސް މައުމޫން އިއްޔެ ކުރެއްވި ޓްވީޓެއްގައި ވަނީ އެމަނިކުފާނަށް ހެޔޮ ދުއާތައް ފޮނުވި ހުރިހާ ފަރާތްތަކަށް ޝުކުރު އަދާކުރައްވާފައެވެ. ރައީސް މައުމޫން ކޮވިޑް-19 އަށް ފައްސިވެފައި ވީނަމަވެސް އެމަނިކުފާނުގެ ހާލުކޮޅު ރަނގަޅެވެ.
advertisment