ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ލިޔުއްވި “ދެ ރަދުން” ފޮތް ނެރުމަށް ބޭއްވި ހަރަކާތަކީ ސިޔާސީ ޕާޓީއަކުން އިންތިޒާމް ކުރި ސިޔާސީ ހަރަކާތެއް ނޫން ކަމަށާއި، އެހެންކަމުން އެކަމުގައި އިލެކްޝަންސް ކޮމިޓީއަށް ފިޔަވަޅު ނޭޅޭނެ ކަމަށް އެ ކޮމިޝަނުން ބުނެފިއެވެ.
އީސީން އިދިކޮޅު ފަރާތްތައް ޖޫރިމަނާ ކުރި ނަމަވެސް ރައީސް ނަޝީދާމެދު އެއްވެސް ފިޔަވަޅެއް އަޅާފައި ނުވާތީ ގިނަ ބަޔަކު އަންނަނީ ފާޑުކިޔަމުންނެވެ.
ސަންގު ޓީވީގެ “ހަބަރަށް ފަހު” ޕްރޮގްރާމްގައި ބައިވެރިވެވަޑައިގެން އިލެކްޝަންސް ކޮމިޝަންގެ ރައީސް އަހުމަދު ޝަރީފް ރޭ ވިދާޅުވީ، އެ ކޮމިޝަނަށް ފިޔަވަޅު އެޅުމުގެ ބާރު ލިބިފައި އޮންނަނީ ސިޔާސީ ޕާޓީއަކުން ހިންގާ ސިޔާސީ ހަރަކާތްތަކަށް ކަމަށެވެ. އެއީ ސިޔާސީ ޕާޓީއަކުން ހިނގާ ހަރަކާތެއްގައި ގާނޫނާއި ގަވާއިދު ހިލާފު ވުމުން ކަމަށް ޝަރީފް ވިދާޅުވިއެވެ.
“އެހެންވީމަ އެފަދަ ސިޔާސީ ހަރަކާތްތަކުގައި ހަމަ އަމަލުކުރަން ޖެހޭނީ އެޗްޕީއޭގެ ގައިޑްލައިން އާއި ގާނޫނުތަކާ ގަވާއިދުތަކާ އެއްގޮތަށް ކަމަށް. ހަމަ ޕީޕީއެމް ޕީއެންސީއަށް ފޮނުވި މޭރުމުން މިހާރު ހުރިހާ ސިޔާސީ ޕާޓީތަކަށް ވެސް ހުންނާނީ ފޮނުވާފައި،” ޝަރީފް ވިދާޅުވިއެވެ.
“ދެ ރަދުން” ނެރުއްވުމަށް ފަހު، އެ ފޮތް ގަތް މީހުންނަށް އޮޓޯގްރާފް ދެއްވުމަށް އެކި ތަންތަނުގައި ބޭއްވި އިވެންޓުތަކުގައި ނަޝީދު މާސްކު ނާޅައި ހުންނެވި މައްސަލާގައި އެއްވެސް ފަރާތަކުން މިހާތަނަށް ފިޔަވަޅު އަޅާފައެއް ނުވެއެވެ.
advertisment