ބަޖެޓް ސަޕޯޓުގެ ގޮތުގައި އިންޑިއާ ރާއްޖެއަށް 250 މިލިޔަން ޑޮލަރުގެ ލޯނު ދިނުމާ ގުޅިގެން ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިންޑިއާއަށް ޝުކުރު އަދާކުރައްވައިފިއެވެ.
އިންޑިއާއިން ރާއްޖެ އަށް ދިން 250 މިލިޔަން ޑޮލަރު (3.85 ބިލިޔަން ރުފިޔާ)ގެ ލޯނުގެ ލިއުން ރާއްޖެއާ ރަސްމީކޮށް ހަވާލުކޮށްދެއްވީ އެކަަމަށް ޓަކައި ފޮރިން މިނިސްޓްރީގައި މިއަދު ބޭއްވި ހާއްްސަ ރަސްމިއްޔާތެއްގަ އެވެ.
މިކަމާ ގުޅިގެން ނަޝީދު ކުރެއްވި ޓްވީޓެއްގައި ވިދާޅުވީ ބަޖެޓު ސަޕޯޓު ފަންޑުގެ އެހީތެރިކަން ފޯރުކޮށްދިނުމުން އިންޑިއާގެ ރައްޔިތުންނަށާއި ސަރުކާރަށް ޝުކުރު އަދާކުރާ ކަމަށެވެ.
ނަޝީދު ވިދާޅުވީ މި އެހީ މި ލިބުނީ ވަރަށް އުނދަގޫ ދަނޑިވަޅެއްގައި ކަމަށާއި ރާއްޖޭގެ ސަރުކާރުން އެ ފައިސާ ހޭދަކުރާނީ ވަރަށް ވިސްނުންތެރިކަމާ އެކު ކަމަށް ޔަގީންކުރާ ކަމަށެވެ.
We thank Indian ppl and Govt for the budget support funds. It’s absolutely timely in these difficult days. I am confident that Govt of Maldives will be mindful in the manner it spends it.@PMOIndia, @DrSJaishankar, @HCIMaldives
— Mohamed Nasheed (@MohamedNasheed) September 20, 2020
ސޮފްޓް ލޯނެއްގެ ގޮތުގައި އިންޑިއާއިން ރާއްޖެ އަށް ދޫކުރި އެ ފައިސާގެ ޗެކް ފޮރިން މިނިސްޓަރު އަބްދުﷲ ޝާހިދާ މިއަދު ހަވާލުކުރެއްވީ ރާއްޖޭގައި ހުންނަވާ އިންޑިއާގެ ސަފީރު ސަންޖޭ ސުދިރު އެވެ.
އިންޑިއާ ސަރުކާރުން ރާއްޖެއަށް އެ ލޯނު ދިނުމަށް ނިންމާފައިވަނީ 10 އަހަރު ދުވަހުގެ ތެރޭ ދައްކާ ހަލާސްކުރާ ގޮތަށެވެ. އަދި އެ ލޯނުގެ އިންޓަރެސްޓްގެ ގޮތުގައި ނަގަނީ 3.5 ޕަސަންޓެވެ.
މި ސަރުކާރު ވެރިކަމަށް އައި ފަހުން އިންޑިއާ އިން އަންނަނީ ރާއްޖެ އަށް ގިނަ އެހީތަކެއް ފޯރުކޮށްދެމުންނެވެ.