ފުލުހުންގެ ބެލުމުގައި ހުރި، ކޮވިޑް-19އަށް ޕޮޒިޓިވް ވެފައިވާ ދެ މީހަކު އެޗްޕީއޭގެ ބެލުމުގެ ދަށުން ކޮވިޑް ފެސިލިޓީއަށް ގެންދަނިކޮށް ފިލައިފައިވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ ރޭގެ ވަގުތެއްގައި ފުލުހުންގެ ބެލުމުގެ ދަށަށް ގެނައި ކޮވިޑް-19 އަށް ޕޮޒިޓިވްވި ދެ މީހަކު، ބަންދުން ދޫކޮށްލުމަށްފަހު އެޗްޕީއޭގެ ބެލުމުގެ ދަށުން ކޮވިޑް ފެސިލިޓީއަށް ގެންދަނިކޮށް ފިލާފައިވާ ކަމުގެ މައުލޫމާތު ލިބިފައިވާ ކަމަށެވެ.
ފުލުހުން ބުނީ އެ ދެ މީހުން ހޯދުމުގެ މަސައްކަތް ކުރަމުން އަންނަ ކަމަށެވެ.
މީގެކުރިން ވެސް ކޮވިޑަށް ޕޮޒިޓިވް ބައެއް ބިދޭސީން ފިލައިގެން ފުލުހުން ވަނީ ހޯދުމުގެ މަސައްކަތް ކޮށްފައެވެ. އޭގެ ތެރެއިން ބައެއް މީހުން ހޯދި ނަމަވެސް، އެކަމުގައި އެއްވެސް ފިޔަވަޅެއް އަޅާފައެއް ނުވެ އެވެ.