މިފަހަރުގެ ކޮވިޑް-19 ގެ ރާޅުގައި ކުޑަކުދިން ވަރަށް ބޮޑަށް ބަލިވަމުން އަންނަ ކަމަށް، އައިޖީއެމްއެޗުގެ ކުޑަކުދިންގެ ޑޮކްޓަރު، ޑރ. އަހްމަދު ފައިސަލް ވެސް ވަނީ ވިދާޅުވެފައެވެ. ޑރ. ފައިސަލް މިހެން ވިދާޅުވެފައިވަނީ ރާއްޖޭގައި ކޮވިޑް-19 ޖެހިގެން ފުރަތަމަ ފަހަރަށް ކުޑަ ކުއްޖަކު ނިޔާވުމާ ގުޅިގެންނެވެ. މިއަދު ރާއްޖެއިން ކޮވިޑް-19 ޖެހިގެން ފަރުވާ ދެމުން ދިޔަ 10 އަހަރުގެ އަންހެން ކުއްޖެއް ވަނީ ނިޔާވެފައެވެ. މި ކުއްޖާ މަރުވެފައިވަނީ އައިޖީއެމްއެޗްގެ އިމަޖެންސީ ރޫމްގައި ފަރުވާ ދެމުން ދަނިކޮންނެވެ. އެކުއްޖާ މަރުވެފައިވަނީ ރޭ 12:10 ހާއިރުއެވެ.
ޑރ. ފައިސަލް ކުރެއްވި ޓްވީޓެއްގައި ވިދާޅުވީ ޚާއްޞަކޮށް؛ ދިފާޢީ ނިޒާމް ދަށް ކުދިންނާއި (ސުޓެރައިޑް ފަދަ ބޭހުން ވިޔަސް ނުވަތަ ކެންސަރު ނޫނީ އުފެދުމުގައި ހުންނަ ކަމަކުން ވިޔަސް) ކިޑްނީ ބަލި، ބަރުދަން މާމަތި އަދި އެދުމަތިވެފައި ތިބޭ ކުދިން ބަލިވަމުން އަންނަ ކަމަށެވެ.
ކޮވިޑް ޖެހުމުން ބޮޑުވަރުވާ މިންވަރުދައްކުރުމަށް ރާއްޖޭގައި ދެމުންއަންނަ ވެކްސިން އަކީ 18 އަހަރުން ދަށުގެ ކުދިންނަށް ދިނުމަށް ހުއްދަދީފައިވާ ވެކްސިންއެއް ނޫންކަމުން ރާއްޖޭގެ އާބާދީގެ ކުޑަކުދިންނަށް ވެކްސިންގެ ރައްކާތެރިކަން އަދި ލިބިފައެއް ނުވެއެވެ.
އެހެންކަމުން ބޭރަށް ނުކުމެ އުޅުން މަދުކުރުމަށާއި ވެކްސިންއަށް ޝަރުތު ހަމަވާ ފަރާތްތަކުން ވެކްސިންގެ ދެ ޑޯޒް ފުރިހަމަ ކުރުމަށް ހާއްސަ އިސްކަމެއް ދިނުމަށް އެޗްޕީއޭއިން އިލްތިމާސްކުރައްވައެވެ. އެޗްޕީއޭއިން ބުނީ ބައްޔަށް ހުށަހެޅޭ މިންވަރު ކުޑަވެ، ކުޑަކުދިންނަށް ރައްކާތެރިކަން އިތުރުވެގެން ދާނެ ގޮތަކީ އެއީ ކަމަށެވެ.
އޭޕްރިލް މަހުން ފެށިގެން ރާއްޖޭގައި ކޮވިޑް-19ގެ ހާލަތު ގޯސްވެ ދުވާލަކު ޕޮޒިޓިވް ވާ މީހުންގެ އަދަދު ވަނީ 2000 އާ ގާތްކޮށްފައެވެ. އަދި ފާއިތުވި މެއި މަހުގެ ތެރޭގައި ކޮވިޑް ބަލީގައި މަރުވާ މީހުންގެ އަދަދުވެސް ވަނީ ރެކޯޑް އަދަދަކަށް އިތުރުވެފައެވެ. އެގޮތުން އެއްދުވަހުގެ ތެރޭގައި މި ބަލީގައި 13 މީހުންވެސް ވަނީ މަރުވެފައެވެ. ބަލި މީހުން އިތުރުވެ ފަރުވާ ދޭނެ ސިއްހީ ހިދުމަތްތެރިންނަށް ބޭނުންޖެހި ރާއްޖޭގައި މިހާރު ވަނީ ވަރުގަދަ ފިޔަވަޅުތަކެއް އަޅާފައެވެ.