ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ހައްޔަރުކުރި ފަސް ވަނަ މީހާގެ ވަނަވަރު އާންމު ކޮށްފިއެވެ.
ހައްޔަރުކޮށްފައިވާ މީހުންގެ ތެރެއިން ފުލުހުން މީގެ ކުރިން ހާމަކޮށްފައި ވަނީ ހަތަރު މީހެއްގެ މައުލޫމާތެވެ.
ފުލުހުން މިއަދު ފަސް ވަނަ މީހެއްގެ މައުލޫމާތު ހާމަކޮށް ބުނީ އެއީ ނ. މަނަދޫ، ނޫރީގެ، އަލީ ހައިޝަމް ކަމަށެވެ. އެއީ 27 އަހަރުގެ މީހެކެވެ. އޭނާ ހައްޔަރު ކުރީ މި މަހުގެ 11 ވަނަ ދުވަހު އެވެ. މިދިޔަ އާދީއްތަ ދުވަހު އޭނާގެ ބަންދަށް ވަނީ އިތުރު 15 ދުވަސް ކޯޓުން ދީފަ އެވެ.
މީގެ އިތުރުން ފުލުހުން ބުނެފައިވަނީ ބޮމުގެ ހަމަލާއާ ގުޅިގެން ހައްޔަރުކޮށްފައިވާ މުޖާޒް އަހުމަދު، ތަހުމީން އަހުމަދު އަދި އަދުހަމް އަހުމަދު ރަޝީދްގެ ބަންދަށް އިތުރު 30 ދުވަސް ޖޫން 22 ވަނަ ދުވަހު ކޯޓުން ދީފައިވާކަމަށެވެ.
